د لاسرسي ځای

تازه خبر

د شمالي وزیرستان بې کوره شوي دته خېل او ګربز میاشتنۍ مرستې غواړي


د افغانستان په خوست کې د وزيرستان يو کډوال - انځور له ارشیفه

د شمالي وزیرستان دته خېلو او ګربزو هغو کډوالو احتجاج پیل کړی دی چې لا هم خپلو سیمو ته نه دي ستانه کړل شوي.

دوی د جنورۍ پر نهمه په بکاخېلو کې د پیل کړي احتجاج پر مهال د بنو او میرامشاه ترمنځ غځېدلی سړک تړلی دی. دوی وايي د حکومت له خوا له کډوالو سره کېدونکې میاشتنۍ مرستې بندې شوې دي او تر څو کې دا مرستې بیرته بحال شوې نه وي، دوی به احتجاج کوي.

د کډوالو د کمیټۍ مشر ملک رحمت غلام اختجاج کوونکو ته په وینا کې وویل چې حکومت دوی ته باور ورکړي خو بیا پر خپلو ژمنو عمل نه کوي.

له دې بې کوره کړل شویو خلکو سره مرسته کوونکې د خیبر پښتونخوا د قدرتي افتونو پر وخت د انتظام ادارې ویاند احسان داوړ مشال راډیو ته وویل چې له افغانستان څخه نویو ستانه شویو ۱۱ زره کورنیو او له وړاندې په بکاخېلو کې مېشتو کورنیو ته د میاشتنیو مرستو ورکړه روانه ده. هغه وویل چې بیا هم که کومې کورنۍ پاتې وي د هغوی مرستې به هم جاري کړل شي. خو د نوموړي په وینا، مرستې پر هغو کورنیو بندې دي چې سیمې یې له وسله والو پاکې کړل شوې او د اوسېدو وړ بلل شوې دي.

د خیبر پښتونخوا د بنو په بکاخېلو کیمپ کې د شمالي وزیرستان کډوالو د دیسمبر پر ۱۹مه مشال راډيو سره خبرو کې ويلي وو چې پر ژمنو سربېره ورته حکومت میاشتنۍ پیسې نه ورکوي. دوی زیاته کړې وه چې د پیسو نه لرلو له وجې یې په ژمي کې ژوند سخت شوی دی. د شمالي وزیرستان کډوالو تر دې مخکې هم څو ځلې ورته د مرستو نه رسېدو او يا هم د مرستو بندېدو ګیلې کړې دي.

د پاکستان پوځ د ۲۰۱۴ز کال د جون په نیمايي کې په شمالي وزیرستان کې عملیات پیل کړل چې له وجې یې تر یو مېلیون زیات کسان کډوال شول چې ورڅخه یې زرګونه کورنۍ د افغانستان خوست، پکتیا او پکتیکا ولایتونو ته واوښتې.

د پاکستان حکومت، په ۲۰۱۶ز کال کې د عملیاتو تر ختمېدو وروسته په پړاوونو کې د شمالي وزیرستان زیاتره کورني بېځایه شوي او په افغانستان کې پراته کډوال خپلو کلیو ته ستانه کړي خو سلګونه کورنۍ لا هم هلته مېشتې دي.

XS
SM
MD
LG