د جنوبي وزیرستان په مسيدو سيمو کې روغتیايي کارکوونکو د ناامنۍ له کبله د پولیو يا ګوزڼ ضد څاڅکو ورکولو په کيمپېن کې له برخې اخيستو انکار کړی دی.
د سروکۍ تحصیل چېرمېن شاه فیصل غازي د ډېسېمبر پر شپږمه مشال راډیو ته وویل چې د روغتیايي کارکوونکو تر انکار وروسته هلته د واکسیني بهیر ځنډېدلی او تر پینځو کلونو پورې عمر لرونکي ماشومان له څاڅکو بې برخې پاتې شوي دي.
دا په داسې حال کې ده چې د خیبر پښتونخوا د پولیو مخنیوي پروګرام ادارې په دوو پړاوونو کې د صوبې په ډېریو برخو کې د پوليو څاڅکو واکسیني کیمپېن ته دوام ورکړی دی چې لومړی پينځه ورځنی کيمپېن يې د نومبر له ۲۸مې او دويم پينځه ورځنی کيمپېن يې د ډېسېمبر پر پینځمه پيل کړ. د ادارې په وينا په دې کيمپېن کې به تر ۲۱ لکه زیاتو ماشومانو ته د پوليو واکسین ورکوي.
د جنوبي وزيرستان ځايي خلک او ولسي استازي وايي چې له هغه وخت راهیسې چې پوځ د پولیو روغتيايي کارکوونکو د امنیت مسووليت پولیسو ته سپارلی نو هغوی د جنوبي وزیرستان د مسیدو په سیمو کې د پولیو ضد کيمپېنونه نه دي کړي.
بلخوا د ضلعې انتظامي مشر (ډېپټي کمېشنر) فرحان خان وايي چې د وزیرو او مسیدو په سیمو کې د پولیو ضد جلاجلا کيمپېنونه کېږي.
ده د ډېسېمبر پر شپږمه مشال راډیو ته وویل، د مسیدو په سیمه کې د روغتیايي کارکوونکو د امنیت په اړه اندېښمن دی او په دې ترڅ کې یې اړوند چارواکي خبر کړي او "ډېر ژر به يو متبادل" واکسیني بهیر پيل کړي.
فرحان خان زياته کړه چې د جنوبي وزیرستان د مسیدو سیمو پر دوو سب ډېوېژنونو لدې او سروکۍ برسېره به په واڼه کې د کيمپېن پر مهال ۷۰،۰۰۰ ماشومان واکسینېږي.
دا په داسې حال کې ده چې سږ کال په پاکستان کې د پوليو ۲۰ پېښې ثبت شوې دي چې ۱۷ ناروغان د شمالي وزیرستان، دوه د لکي مروت او یو د جنوبي وزیرستان دی.
په ۲۰۲۰ز کال کې په خيبر پښتونخوا کې د پوليو ۲۲ پېښې ثبت شوې وې خو په ۲۰۲۱ز کال کې پکې د پوليو هېڅ پېښه نه وه رېکارډ شوې البته هغه کال د هېواد یوازینۍ مثبته پېښه د بلوچستان په کلا عبدالله کې ثبت شوې وه.
روغتیايي چارواکو سږ کال زیاتېدونکو پېښو ته په کتو په خیبر پښتونخوا کې یوشمېر بیړني واکسیني کیمپنونه وکړل. له دې پرته د پاکستان حکومت د ټول هېواد پر کچ هم واکسیني کیمپېنونه کړي دي.
پاکستان او افغانستان د نړۍ یوازیني هېوادونه دي چې پکې د ګوزڼ وایرس موجود دی. دواړه هېوادونه له کلونو راهیسې د ناروغۍ د ختمولو هڅه کوي.
په عين حال کې د ملګرو ملتونو د ماشومانو چارو د ادارې (یونېسېف) د جنوبي اسيا سيمه ييز مشر جارج لاييا اجې د ډېسېمبر پر پینځمه په يو بيان کې تمه څرګنده کړې چې د ۲۰۲۳ز کال تر پایه پورې به پاکستان له پوليو وايرسه پاک شي.
