د لاسرسي ځای

تازه خبر

شمالي وزیرستان کې یو ماشوم ګوزڼ وهلی دی


له شمالي وزیرستان سره پر پوله په پروت بنو ښار کې یوه روغتیايي کارکوونکې یو ماشوم ته واکسیني څاڅکي ورکوي - پخوانی انځور.
له شمالي وزیرستان سره پر پوله په پروت بنو ښار کې یوه روغتیايي کارکوونکې یو ماشوم ته واکسیني څاڅکي ورکوي - پخوانی انځور.

د شمالي وزیرستان روغتیا ادارې په یو ماشوم کې د ګوزڼ ناروغي تایید کړې چې ورسره په هغه ضلع کې د سږنیو مثبتو پېښو شمېر څلور ته رسېدلی دی.

د روغتیا ادارې مشر ډاکتر وزیر خان ساپي د مې پر ۲۶مه مشال راډیو ته وویل، د پولیو وایرس د میرلي په اېسوړي کلي کې په یوه ۱۳ کلن ماشوم کې معلوم شوی دی.

دی وايي، دا په داسې حال کې ده چې په هغه سیمه کې د ګوزڼ ناروغۍ واکسیني کیمپېن روان دی.

ساپي ویره څرګنده کړه چې په سیمه کې نورې مثبتې پېښې هم ثبتېدای شي.

ده زیاته کړه چې په شمالي وزیرستان کې یې د روغتیاپالانو ډلې فعاله کړې دي چې تر پینځو کلونو پورې عمر لرونکي ماشومان واکسین کړي.

په شمالي وزیرستان کې په اپرېل کې د پولیو ناروغۍ دوه مثبتې پېښې ثبت شوې. دا په څه د پاسه یو کال کې په پاکستان کې د پولیو لومړۍ نوې پېښې وې چې هغه مهال یې د خیبر پښتونخوا چارواکي په شمالي وزیرستان او ورسره لګېدلي ښار بنو کې دوه ورځني بیړني واکسینې کیمپېن ته اړ کړل.

تر دې وروسته د پاکستان حکومت د مې پر ۲۳مه د ټول هېواد پر کچ پینځه ورځنی واکسیني کیمپېن پیل کړ. حکومت وايي، هڅه کوي چې په کیمپېن کې تر ۴۳ مېلیونه زیاتو ماشومانو ته څاڅکي ورکړي.

د خیبر پښتونخوا روغتیايي چارواکو د مې پر اتمه مشال راډيو ته ویلي ول چې پلټنو ښوولې چې په شمالي وزیرستان کې د پولیو واکسیني کارکوونکو له څاڅکو ورکولو پرته د یوشمېر ماشومانو ګوتې رنګ کړې وې. دوی د ناواکسینه ماشومانو د کره شمېر اټکل و نه شو کړای خو ویلي یې ول چې دا کار د هغې ضلعې په ځینو کلیو کې شوی وو.

په پاکستان کې چې ماشومان د پولیو واکسیني څاڅکي وخوري نو روغتیايي کارکوونکي یې نوم او پته په رجسټر کې درجوي او ګوته یې رنګوي چې دا د هغوی د واکسینېدو یو ثبوت وي.

هغه مهال روغتیايي چارواکو اټکل کړی وو چې ښايي د پولیو وایرس تر ۲۰۰ ماشومانو پورې رسېدلی وې چې له کبله یې په شمالي وزیرستان کې د نورو مثبتو پېښو ویره ده.

چارواکي وايي، هڅه کوي چې د دیني عالمانو په مرسته میندې او پلرونه د بچیو واکسینولو ته وهڅوي. له دې پرته د پاکستان حکومت د واکسیني ډلو د امنیت لپاره پولیس هم ځای پر ځای کوي چې په تېرو کلونو کې ورباندې لسګونه بریدونه شوي دي.

پاکستان او افغانستان د نړۍ یوازیني هېوادونه دي چې پکې د پولیو وایرس لا هم موجود دی.

XS
SM
MD
LG