د لاسرسي ځای

تازه خبر

پاکستان د پولیو ختمولو کې له دیني عالمانو کومک غواړي


د حکومت دا هڅې په داسې حال کې روانې دي چې په ۲۰۲۱ز کال کې په پاکستان کې د پولیو یوه مثبت پېښه مخې ته راغلې ده. انځور- ارشیف

د اکتوبر ۲۴مه په نړۍ کې د ګوزڼ ضد د اګاهۍ د ورځې په توګه لمانځل کېږي. د خیبر پښتونخوا حکومت هڅه کوي د ګوزڼ د څاڅکو خلاف د منفي پروپاګند د ختمولو لپاره له علماوو کومک واخلي.

د خیبر پښتونخوا د وزیراعلی محمود خان ویاند خورشید خان د اکتوبر پر ۲۲مه مشال راډیو ته وویل، هغوی د اکتوبر پر ۲۱مه د قبایلي ضلعې خیبر په جامعه جنیدیه غفوریه کې یوه غونډه وکړه.

هغه وايي:" په دې غونډه کې، د خیبر قبایلي ضلعې او د صوبې د نورو ۲۷۵ مدرسو په استازیتوب، ۳۰ عالمانو برخه واخېسته. موږ په سر کې عالمانو ته د پولیو د ګټو په حواله معلومات ورکړل او بیا مو ترې وغوښتل چې د پولیو په حواله د منفي تاثر په ختمولو کې دې راسره کومک وکړي. له هغوی مو وغوښتل چې د جمعې په خطبو کې دې خلک د پولیو د څاڅکو پر ارزښت خبر کړي."

د حکومت دا هڅې په داسې حال کې روانې دي چې په ۲۰۲۱ز کال کې په پاکستان کې د پولیو یوه مثبت پېښه مخې ته راغلې ده. پاکستاني چارواکي وايي، په دې هڅه کې دي چې خپل ملک له پولیو نه پاک وګرځوي.

د پولیو د پروګرام نیشنل کوارډینېټر ډاکټر شهزاد بیګ د اکتوبر پر ۲۲مه مشال راډیو ته وویل، په پاکستان کې په کراچۍ ښار، کلا عبدالله او د خیبر پښتونخوا په جنوبي سیمو کې خلک د پولیو د ختمولو سلسله کې د حکومت سره لازمه مرسته نه کوي. هغه وايي، هڅه یې ده چې په دغو درو سیمو کې له پولیو انکاري کورنۍ رضا کړي او ښه کمپاین وچلوي.

د خیبر پښتونخوا د پولیو پروګرام یو پخوانی مشر ډاکټر افتخار علي وايي، له کله نه چې حکومت د پولیو د څاڅکو په ارزښت د دیني عالمانو د کومک اخېستو لړۍ پیل کړې، له پولیو د انکاري کورنیو شمېره مخ په کمېدو ده.

نوموړی وايي، د جوماتونو امامان، د کلو ملکان او د ټولنې مخور کسان په دې لړ کې خپل اغېز استعمالولی شي.

د پولیو پر ضد د منفي پروپاګند په ترڅ کې ویل کېدل چې ماشومانو ته دغه څاڅکي ورکول، حرام دي خو د اکتوبر پر ۲۱مه د خیبر په جامعه جنیدیه غفوریه کې جوړې شوې غونډې ته د یادې ادارې مهتمم احسان الله جنیدي وویل، ناپوهه او سختدریځه کسان د خلکو په ذهنونو کې دا ډول شکونه اچوي، دا بې بنیاده خبرې دي چې دا څاڅکي حرام دي او یا هم د استعمالولو له وجې یې خلک بې اولاده پاتې کېږي. نوموړی زیاتوي چې دا څاڅکي بلکل حلال دي.

د نړیوال پروټوکول له مخې په کوم هیواد کې چې په پرله پسې توګه درې کاله د پولیو کومه مثبته پېښه ونه څارل شي، هغه هیواد له پولیو پاک ګرځول کېږي. دا مهال افغانستان او پاکستان هغه هیوادونه دي چې لا هم پکې پولیو موجوده ده.

XS
SM
MD
LG