د سيند صوبې چارواکي وايي د اپريل په ۲۶مه په کراچۍ پوهنتون کې د شوي بريد په تړاو یې يو مهم کس نیولی دی.
د جولای په پينځمه، د دې صوبې د اطلاعاتو وزير شرجيل انعام مېمن، د سیند حکومت وياند مرتضی وهاب، د ترهګرۍ ضد پوليسو مشر عمران يعقوب منهاس او د سیند صوبې رينجرز ځواکونو کرنل نصرالله په کراچۍ کې په يوه خبري غونډه کې وويل چې نیول شوی کس دادبخش عرف شعیب دی.
دوی زیاته کړه چې دادبخش د جولای په دوهمه د کراچۍ له هاکس نيولی شوی. چارواکو ادعا وکړه چې دغه کس د اپريل په مياشت کې د ځانمرګي بريد ترسره کوونکې ښځې، شاري بلوڅ له مېړه سره په رابطه کې وو او پخپله هم د چاوديدونکو موادو د جوړولو ماهر دی.
مېمن ادعا وکړه چې نیول شوی کس په پاکستان کې د کاالعدم او ترهګرې اعلان شوې ډلې، بلوچ ليبريشن فرنټ د کراچۍ مشر دی چې د کراچۍ پوهنتون بريد یې د بلوچ ليبريشن ارمي (بي ايل اې) سره په شريکه پلان کړی وو. هغه زیاته کړه چې نيول شوي تن ورته د خپلو پټو ملګرو په اړه یې له پولیسو سره مهم معلومات شريک کړي دي. مېمن ادعا وکړه چې دادبخش ورته ويلي چې د کراچۍ د بريد پلانونکی بشير زېب بلوڅ وو.
بشير زېب بلوڅ له پاکستانه ازادۍ اخیستو لپاره وسله واله مبارزه کوونکې ډلې، بلوچ ليبريشن ارمي مشر دی. دې ډلې د اپريل په ۲۷مه په پرله پسې ډول رسنيو ته د شاري بلوڅ تصویرونه او ويډيوګانې لېږلې وي. په دې ويډيوګانو کې شاري بلوڅ پر کراچۍ پوهنتون د بريد او بلوڅانو لپاره د ازادۍ خبرې کوي. د بلوڅانو بېلابېلې ډلې له ۱۹۴۸ کال راهیسې له پاکستانه د ازادۍ اخيستو او خپلو حقونو لپاره جنګيږي خو شاري بلوڅ یې لومړۍ ځانمرګي بريدګره ده.
د اپريل پر شپږویشتمه شوې دې حمله کې د کراچۍ پوهنتون د چين د کلتور او ژبو مرکز ګاډی په نښه شوی وو. په بريد کې درې چينايي استادان او د هغوی پاکستانی ډرايور وژل شوي وو. چين پر دې حمله سخت خفګان ښودلی وو او د پاکستان له حکومته یې غوښتنه کړې وه چې د دې حملې پلانوونکي ونيسي او هغوی ته سخته سزا ورکړي.
تر اوسه پورې بلوچ ليبريشن ارمي د سيند صوبې د چارواکو د تازه ادعاوو په اړه څه نه دې ويلي. خو دې ډلې په بېلابېلو وختونو کې ويلي چې چينايي وګړي یې ځکه هدف دي چې هغوی د پاکستان حکومت سره يو ځای د بلوڅانو وسايل خوري. د پاکستان امنيتي ادارو په بيا بيا ويلي چې د چينايي وګړو حفاظت به کوي او بلوڅ وسله والې ډلې به امنيت خرابېدو ته نه پريږدي.
