د لاسرسي ځای

تازه خبر

چین: پاکستان دې د کراچۍ برید کې د ککړو کسانو ضد سخته کارروايي وکړي


پولیسو د اپرېل پر ۲۶مه په پوهنتون کې د برید شاوخوا سیمه کلابنده کړه.
پولیسو د اپرېل پر ۲۶مه په پوهنتون کې د برید شاوخوا سیمه کلابنده کړه.

چین د سیند د مرکز کراچۍ په پوهنتون کې پر چینايي وګړو د ځانمرګي برید غندنه کړې او له اسلام اباده یې غوښتي چې په پېښه کې د ککړو کسانو پرضد دې "سخته کارروايي" وکړي.

د چین د بهرنیو چارو وزارت ویاند وانګ وېنبېن د اپرېل پر ۲۷مه په بیجنګ کې د خبري غونډې پر مهال وویل چې چینايي حکومت پر ښوونکو برید "زښت اندېښمن" کړی دی.

دا په داسې حال کې ده چې د اپرېل پر ۲۶مه په کراچۍ پوهنتون کې په برید کې د درې چینايانو په ګډون څلور کسان ووژل شول.

بلوڅ بېلتونپالې ډلې بلوچ لېبرېشن ارمي د حملې ذمه واري منلې.

د چین د بهرنیو چارو وزارت ویاند وانګ وېنبېن د چینايي دولتي ټېلېوېژن د خبریال پوښتنې په ځواب کې وویل، تر حملې "سمدستي" وروسته د بهرنیو چارو وزارت او په پاکستان کې د چینايي سفارت او قونصلګریو "د بیړني غبرګون مېکانېزم" فعال شو او په هغه هېواد کې یې سفارتي چارواکي "د پېښې ځای معاینې ته واستول."

د ده په خبره، بیجنګ "له بېلابېلو لارو" له پاکستانه وغوښتل چې د "سمدستي د پېښې سمې پلټنې وکړي، پکې ککړ کسان ونیسي او له قانون سره سمه ورته سخته سزا ورکړي."

په کراچۍ کې بلوچ ځانمرګې بریدګره څوک وه؟
تم شئ

هېڅ میډیايي سرچینه اوس نشته

0:00 0:01:17 0:00

امریکا غږ ډیوه راډیو په یوه خبر کې لیکلي چې وزارت په بیجنګ کې د پاکستان سفیر هم وربللی وو او ورسره یې په هغه هېواد کې د چینایو وګړو د امنیت په اړه خپلې اندېښنې شریکې کړې.

وېنبېن زیاته کړه چې حکومت یې له اسلام اباده غوښتي چې په پاکستان کې دې د چینايي وګړو او ادارو د خوندیتوب لپاره اقدامات وکړي او د "دې ډول پېښو د تکرار مخه دې ونیسي."

د بلوڅ وسله والو ډلو د زیاتېدونکو بريدونه لاملونه څه دي؟
تم شئ

هېڅ میډیايي سرچینه اوس نشته

0:00 0:25:41 0:00

د کراچۍ پوهنتون د اپرېل پر ۲۶مه رسنیو ته په استولي بیان کې ویلي ول چې په ځانمرګي برید کې د چینايي ژبې د زده کړې او فرهنګي کنفیوشس مرکز مشر هووانګ ګویپېنګ او دوه ښوونکي دېنګ موپېنګ او چېن سای ووژل شول. بیان وايي، وژل شوی پاکستانی وګړی خالد نومېده چې د چینایانو ډرېور وو.

د کراچۍ پولیس وايي، په پېښه کې بل چینايي وګړی وانګ یوپېنګ او پاکستانی ساتونکی حامد ژوبل شوي دي.

د پاکستان حکومت هم په کراچۍ کې د برید غندنه کړې.

د چین د بهرنیو چارو وزارت ویاند وانګ وېنبېن په خبري غونډه کې وویل چې وزیراعظم شهباز شریف د اپرېل پر ۲۶مه ماخوستن مهال په اسلام اباد کې د چین سفارت ته ورغلی وو او هلته یې د چینايي وګړو د مړینې د غمرازۍ ترڅنګ ډاډ ورکړ چې حکومت یې د پېښې "پوره پلټنې" کوي.

ده د شهباز شریف له خولې زیاته کړه چې د پاکستان چارواکي به په برید کې "د ککړو کسانو تر نیولو او ورته د سختې سزا تر ورکولو په ارام نه کښېني."

د بلوڅ لېبرېشن ارمي په ګډون نورې بلوڅ بېلتونپالې وسله والې ډلې د چین – پاکستان اقتصادي لار (سيپیک) د هغو پروژو مخالفه ده چې زیاتره برخه یې په بلوچستان کې عملي کېږي. هغو ډلو په تېرو وختونو کې هم په پاکستان کې د سیپیک پروژو پر چینايي کارکوونکو او چینايي وګړو بریدونه کړي دي.

XS
SM
MD
LG