په اسلام اباد کې د عدالت لخوا په ضمانت تر خوشې کېدو وروسته د پښتون ژغورنې غورځنګ (پي ټي اېم) مشر منظور پشتين "ناڅرګنده" ځای ته وړل شوی دی.
د پي ټي اېم يو مخکښ ادريس پشتين نن (د جنورۍ پر پينځمه) مشال راډيو ته وويل چې هغوی تېره شپه شاوخوا ۱۱ بجې په زيات شمېر کې له اډيالې زندانه د منظور پشتين د خوشې کېدو او د هغه د هرکلي لپاره ورغلي ول، خو د نوموړي په وينا د پنجاب پوليسو پشتين له زندانه د ناڅرګند مقام پر لوري په خپلو ګاډو کې بوتلی.
نوموړي زياته کړې چې غورځنګ به د وکيلانو له ډلې سره تر سلا مشورو وروسته يو اقدام کوي.
د پاکستان يو نوموتي خبريال اعزار سيد پر خپله اېکس پاڼه يوه ويډيو خپره کړې چې پکې ښکاري چې پوليسو منظور پشتين په خپله ګاډي کې کښېنولی دی او د پي ټي اېم د پلويانو پر احتجاج سربېره هغه يو ناڅرګند لوري ته انتقالوي.
منظور پشتین کو اڈیالہ جیل راولپنڈی سے رہائی کی کاغذی کاروائی مکمل کرنے کے بعد دوبارہ گرفتار کرلیاگیا۔ یہ اقدام انتہائی افسوسناک اور قابل مذمت ہے ، حیرت ہے ایسے واقعات پر زنجیر عدل ہلتی ہے نہ کوئی جج رات کو آکر عدالت لگانے کا سوچتا ہے۔ سب مائع ہے pic.twitter.com/ssPyORwmKx
— Azaz Syed (@AzazSyed) January 4, 2024
پوليسو تر اوسه د پشتين د بيا ګرفتارۍ او د هغه پرضد د مقدمې په اړه څه نه دې ويلي او نه يې هم نوموړی عدالت ته وړاندې کړی دی.
دا تر هغه وروسته ده چې د جنورۍ پر څلورمه، په اسلام اباد کې يو عدالت د بهرني تمویل په اړه مقدمه کې هم د پشتين ضمانت منظور کړ.
د تحقیقاتو وفاقي ادارې (اېف ای اې) په قضیه کې پر پشتين تور پورې کړی وو چې غورځنګ یې له بهره پیسې ترلاسه کوي خو د پشتين يو وکيل ايمل خان مندوخېل مشال راډيو ته وويل چې په څلورمه مقدمه کې يې هم پر موکل لګېدلي تورونه بې بنياده ثابت شول.
د جنورۍ پر څلورمه، د پښتون ژغورنې غورځنګ د مرکزي کمېټۍ غړي حاجي صمد تر عدالتي اورېدنې وروسته مشال راډيو ته وويل چې د منظور پشتين خلاف په اسلام اباد کې نورې مقدمې نه شته او اسلام اباد های کورټ د جنورۍ پر درېيمه پوليسو ته امر کړی دی چې پشتين دې نور نه نيسي.
د پښتون ژغورنې غورځنګ يو مخکښ ادریس پشتين د جنورۍ پر څلورمه پر خپله اېکس پاڼه ليکلي وو، که د اسلام اباد د پولیسو مشر د اسلام اباد های کورټ پر امر سربېره د منظور پشتين خلاف څه کاروايي وکړه، نو دا به "د عدالت سپکاوی" وي.
نوموړي د جنورۍ پر پينځمه پر خپله اېکس پاڼه يو ليک خپور کړی چې د ۲۰۲۳ز کال د ډېسېمبر پر ۲۹مه د پنجاب پوليسو د مشر لخوا د پاکستان کورنيو چارو وزارت ته ليکل شوی دی. په ليک کې راغلي چې د منظور احمد پشتين خلاف د لاهور په ګډون د پنجاب په هېڅ تاڼه کې درج شوې مقدمه نه شته.
According to the report presented to the Islamabad High Court by the Inspector General of Punjab, there are no registered cases against Manzoor Pashteen in any police station in Punjab. Despite being granted bail from the court, he was abducted from Adiala Jail yesterday. This… pic.twitter.com/Y3KZKdEqmR
— IDrees Pashteen (@Pashteenidrees1) January 5, 2024
پر منظور پشتين ټولې څلورې مقدمې وې. د ډېسېمبر پر ۲۶مه عدالت د ترهګرۍ په دوو مقدمو کې د هغه ضمانت ومانه خو وروسته یې په يوه بله مقدمه کې د ترنول پولیسو ته په دوه ورځني جسماني رېمانډ وسپاره. تر دې وړاندې، د ډېسېمبر پر ۱۸مه او ۲۳مه د پشتين د قضيې اورېدنه د جج د نه موجودیت له امله ځنډېدلې وه.
د منظور پشتين او د پي ټي اېم د ځينو نورو غړيو د نيولو پرضد د جنورۍ پر پينځمه د کوز جنوبي وزيرستان په واڼه کې د غورځنګ سلګونو پلويانو احتجاجي مظاهره وکړه.
پر دې مهال د غورځنګ مشرانو وويل چې منظور پشتين په غیر قانوني طریقه ګرفتار کړل شوی دی. د هغوی وينا وه، تر څو چې منظور پشتين او د پي ټي اېم نور نيول شوي غړي نه وي خوشې کړل شوي، احتجاجي مظاهرې به يې روانې وي.
د بلوچستان پوليسو منظور پشتين د ډېسېمبر پر څلورمه په چمن ښار کې هغه مهال ونیو چې کله هغه احتجاجي ناستې ته تر وینا وروسته په تربت کې د بلوڅانو په احتجاجي پرلت کې د ګډون لپاره روان وو. وروسته نوموړی د اسلام اباد پوليسو ته وسپارل شو.
د چمن ډېپټي کمېشنر راجا اطهر عباس مشال راډیو ته ويلي ول چې د پشتین خلاف مقدمه ځکه درج شوې او ځکه نیول شوی چې ساتونکو یې پر پوليسو ډزې کړې دي.
خو د پښتون ژغورنې غورځنګ دا تور ردوي او وایي چې ډزې د منظور پشتین پر موټر شوې چې نښې یې له ورايه ښکاري.
د پاکستان پوليسو منظور پشتين تر دې مخکې هم څو ځلې نیولی دی او پر هغه یې تور پورې کړی دی چې نوموړی د ریاست پر ضد د خلکو پارولو هڅه کوي خو نوموړی دا تورونه ردوي او وايي چې د پاکستان د ايين په چوکاټ کې دننه د پښتنو د حقونو لپاره مبارزه کوي او پر خپله سيمه امن غواړي.