د بلوچستان په بارکان کې د درو کسانو په وژلو تورن صوبايي وزیر سردار عبدالرحمان کېتراڼ له بنده خوشې شوی دی.
د هغه د خوشې کولو امر د بارکان یو ځايي عدالت د مارچ پر ۱۰مه نېټه کړی وو.
خو د مري قبیلې د ټولنې (ال پاکستان مري اتحاد) مشر نصرالله مري د مارچ پر ۱۲مه مشال راډیو ته وویل چې په ضمانت د سردار عبدالرحمان کېتراڼ د خوشې کېدو ضد د بلوچستان های کورټ ته ځي.
خو د بلوچستان د اعلا وزیر ویاند بابر یوسفزي مشال راډیو ته وویل چې د خوړو او د نفوسو بهبود چارو صوبايي وزير په خوشې کولو کې د حکومت هېڅ لاس نه وو بلکې هغه ته ضمانت عدالت ورکړی دی.
سردار عبدالرحمان کېتراڼ د فبرروۍ پر ۲۲مه پولیسو تر هغې نیولی وو چې په بارکان کې د درو کسانو مړي وموندل شول. د مري قبیلې ټولنې ویلي ول چې هغه کسان د کېتراڼ په خپل شخصي زندان کې بندیان ول.
د دې پېښې پرضد مري اتحاد په کوټه کې پرلت وهلی وو او له حکومته یې د پېښې د پلټنو تر څنګ د کېتراڼ د نیولو او پرضد یې د مقدمې دایرولو غوښتنه کړې وه.
کېتراڼ پر ځان لګېدلي تورونه ردوي او وايي، دا تر انتخاباتو مخکې د ده پر وړاندې د "سازش" هڅه ده.
