د افغان سولې پروسې په لړ کې د طالبانو يو پلاوي د ملا عبدالغني برادر په مشرۍ د اسلام اباد د سفر پر مهال د اګست پر ۲۵مه د پاکستان له بهرنيو چارو وزير سره وليدل. له ملاقات وروسته د دې هېواد بهرنيو چارو وزارت په يوه بیان کې وويل چې شاه محمود قريشي او طالبانو د بين الافغاني مذاکراتو د ژر پېلېدو په ګډون د سولې پروسې پر نورو اړخونو خبرې وکړې. له کله چې طالبانو د ۲۰۲۰ز کال په فبروري مياشت کې په قطر کې له امريکا سره د سولې تړون لاسليک کړی له هغه راهيسې هڅې روانې دي چې د افغان حکومت او طالبانو ترمنځ مذاکرات پيل شي. خو په دې کې ځينې خنډونه دي. دا خنډونه څه دي او د طالبانو د پاکستان د اوسنی سفر هدف څه دی؟ دا پوښتنې د مشال تر رڼا لاندې بحث کې څېړل شوې دي.
د مشال تر رڼا لاندې
چار شنبه ۲۶ اګست ۲۰۲۰
پاکستان او سعودي عرب ژور او پخواني تعلقات لري خو په وروستيو کې پر ځينو نړيوالو موضوعاتو د دواړو ترمنځ د نظر اختلاف پیدا دی. سږکال اګست پر پینځمه، د پاکستان بهرنيو چارو وزير داسې يو بيان ورکړ چې د کارپوهانو او اپوزيشن په وينا، د رياض او اسلام اباد ترمنځ يې واټن زيات کړ. شاه محمود قریشي ویلي ول چې د کشمير لانجې په اړه دې سعودي عرب د اسلامي هېوادونو سازمان (او ای سي) غونډه وروغواړي، که نه نو پاکستان به مجبور شي چې له سعودي عربه پرته د نورو هېوادونو کنفرانس جوړ کړي. تر دې وروسته د اګست پر ۱۷مه نېټه د پاکستان پوځ مشر جنرال قمر جاويد باجوه سعودي عرب ته ولاړ. د مشال تر رڼا لاندې بحث کې د دواړو هېوادونو په تعلقاتو کې د شته اختلافاتو جاج اخيستل شوی چې تاسې یې د غږ په ځای کې اورېدای شئ.
