پاکستان

شهباز شریف: د سپریم کورټ د ټولو قاضیانو جرګګۍ دې د عمران خان تورونه وپلټي

شهباز شریف وايي، عمران خان دې د خپلو تورونو ثبوت وړاندې کړي - پخوانی انځور.

د پاکستان وزیراعظم شهباز شریف د سپریم کورټ له مشر قاضي غوښتي چې د تحریک انصاف د مشر عمران خان د تورونو پلټنو لپاره د هغه عدالت د ټولو قاضیانو کمېشن جوړ کړي.

نوموړي د نومبر پر پینځمه په لاهور کې خبري غونډې ته وویل، د ټولو قاضیانو کمېشن (فول کورټ کمېشن) په اړه به لیک ژر مشر قاضي ته واستوي.

دا په داسې حال کې ده چې د تحریک انصاف مشر عمران خان د نومبر پر درېیمه د پنجاب په وزیراباد د لاریون پر مهال په ډزو کې ژوبل شو. هغه ګوند پر هم هغه ورځ دعوه وکړه چې په برید کې شریف، د کورنیو چارو وزیر رانا ثنا الله او د پوځ یو افسر مېجر جنرال فیصل نصیر شریک کړي.

خان د نومبر پر څلورمه د لاهور له روغتونه په ویډیويي وینا کې دعوه وکړه چې د حکومت ضد لاریون تر پیلولو مخکې یې د "وژلو" پلان او سازش شوی وو. ده د خپلې دعوې ثبوت وړاندې نه کړ خو د وزیراعظم، د کورنیو چارو وزیر او د پوځي افسر نومونه یې یاد کړل چې په وینا یې ورباندې په حمله کې ککړ دي.

د پاکستان حکومت د تحریک انصاف او عمران خان تورونه رد کړي دي او په دې اړه یې د پلټنو ژمنه کړې ده.

د پاکستان د پوځ عامه اړیکو دفتر (ای اېس پي ار) د نومبر څلورمې پر ماښام په بیان کې د تحریک انصاف او د عمران خان تورونه "بې بنیاده" وبلل او رد یې کړل. پوځ وویل چې پر ادارې او "په ځانګړي ډول، د پوځ پر یوه لوړپوړي افسر" د خان تورونه "بې مسوولیته" دي او هېڅ د منلو نه دي.

دا هم وګورئ:

د پاکستان پوځ وايي، د عمران خان "بې بنياده" او "بې مسوولیته" تورونه ورته د زغم وړ نه ديرانا ثنا الله وايي حکومت او پوځ پر عمران خان برید کې لاس نه لريد تحریک انصاف پلویانو یوشمېر ښارونو کې مظاهرې کړې دي

وزیراعظم شهباز شریف په خپله خبري غونډه کې د عمران خان پر تورونو د "خپګان" څرګندونه وکړه او هغه یې درواغ وبلل.

شریف وویل، په پنجاب کې د تحریک انصاف او د هغوی پلویان واکمن دي، نو د لاریون په امنیت کې د نیمګړتیا او ورباندې د ډزو د پېښې پوښتنه باید له صوبايي حکومته وشي.

د ده په خبره، که پنجاب د عمران خان په مشرۍ د حکومت ضد لاریون امنیت نه شو ساتلای، نو له وفاقه به یې مرسته غوښتې وای.

وزیراعظم شهباز شریف په خپلو خبرو کې زیاته کړه چې عمران خان دې د خپلو دعوو په اړه ولس ته ثبوتونه وړاندې کړي او که د وژلو سازش تور یې ثابت کړای شو، نو بیا دی د "وزیراعظمۍ پر څوکۍ د پاتې کېدو حق نه لري."

پاکستان کې د عمران خان پر لاریون د ډزو ضد پراخې مظاهرې شوې دي - د نومبر څلورمې انځور.

د پاکستان وزیراعظم شهباز شریف دا خبري غونډه پر داسې مهال کړې چې د نومبر پر پینځمه هم د تحریک انصاف ګوند پلویانو او سیاستوالانو د عمران خان پر لاریون د ډزو پرضد مظاهرو ته دوام ورکړی وو.

د ګوند غړو او پلویانو په پېښور، کوټه، لاهور، کراچۍ، د اسلام اباد او راولپېنډۍ ترمینځ فیض اباد او یوشمېر نورو ښارونو کې مظاهرې وکړې.

د تحریک انصاف عمومي سېکرټر اسد عمر د لاهور په لېبرټي څلورلاره کې په وینا کې وویل چې عمران خان د هېواد لپاره پیاوړی پوځي غواړي او له نړیوالو رسنیو سره یې په مرکو کې د ریاستي ادارو دفاع کړې ده.

د هغه ګوند یو بل لوړپوړي سیاستوال شاه محمود قریشي په خپلو خبرو کې پر عمران خان د برید په تړاو د هغو کسانو ضد د رپورټ دایرولو غوښتنه وکړه چې ګوند یې یادونه کړې ده.

د پنجاب صوبايي حکومت ویلي دي چې په برید کې یې د ککړتیا په تور یو کس نیولی دی او پلټنو ته یې دوام ورکړی دی.

د عمران خان په مشرۍ تحریک انصاف ګوند د اکتوبر پر ۲۸مه له لاهوره د اسلام اباد پر لوري لاریون پیل کړ چې له ګوجراوالې سره نېږدې په وزیراباد کې تر برید وروسته وځنډېد.

خان وايي، د لاریون یوازینۍ موخه حکومت تر وخت مخکې انتخاباتو ته اړ اېستل دي، خو وفاقي حکومت ټینګار کوي چې خپله قانوني موده پوره کوي او انتخابات به د ۲۰۲۳ز کال په اکتوبر کې کېږي.