د پاکستان پوځ د عامه اړیکو دفتر (ای اېس پي ار) ادعا کړې چې د ګلزار امام چې د شمبې په نوم پېژندل کېږي، يې د يوې کاروايي پر مهال نيولی دی.
البته د اپرېل اوومې په بيان کې دا نه دي راغلي چې نوموړی یې چېرې او کله نیولی دی.
د پوځ په وینا، ګلزار امام د "بلوچ نیشنل ارمي" په نوم د هغې ناقانونه وسلوالې ډلې بنسټ ایښودونکی او مشر" وو چې د دوو نورو وسلوالو ډلو "بلوچ رېپبلېکن ارمي او یونایېټېد بلوچ ارمي د یو ځای کېدو په نتیجه کې جوړه شوه."
په بیان کې تور پورې شوی دی چې بلوچ نیشنل ارمي پر قانون پلي کوونکو ادارو د بریدونو په ګډون په پاکستان کې د "لسګونو خونړيو حملو مسووليت پر غاړه لري."
تر اوسه د ای اېس پي ار په بیان کې یادو شویو بلوڅ بېلتونپالو ډلو د پوځ د دعوو په اړه غبرګون نه دی څرګند کړی خو د ۲۰۲۲ز کال په نومبر مياشت کې د "بلوچ نیشنلېسټ ارمي" په نوم يوې ډلې رسنيو ته په لېږدولي بيان کې ادعا کړې وه چې ګلزار امام تر "لادرکه کېدو وروسته د پاکستان د استخباراتي ادارو په ولکه" کې دی.
The Baloch Nationalist Army (BNA) has broken months of silence and confirmed the arrest of one of its founders, Gulzar Imam alias Shamby, at the hands of Pakistani intelligence agencies. The confirmation was released through BNA mouthpiece “Baask”. pic.twitter.com/EVs3PALaSH
— The Khorasan Diary (@khorasandiary) November 22, 2022
د پاکستان په بلوچستان صوبه کې له کلونو راهيسې بلوڅ بېلتون غوښتونکي فعاليت کوي او هغوی له پاکستانه پر خپلو وسايلو واک او د صوبې د خپلواکۍ غوښتنه کوي.
هغه وسلوالې ډلې وخت ناوخته د پاکستان پر امنيتي سرتېرو، دولتي چارواکو او داراز، د چین-پاکستان اقتصادي لارې د پروژو پر چینايي کارکوونکو او نورو چینايي وګړو د حملو ذمه وارۍ هم مني.
بلوڅ بېلتونپالې ډلې تور پورې کوی چې چينايان د پاکستان حکومت په مرسته د بلوچستان پر وسايلو د قبضې هڅې کوي نو ځکه ورباندې حملې کوي.
بیجنګ د چین – پاکستان اقتصادي لارو د پروژو په ترڅ کې په بلوچستان کې د ګوادر بندر ترڅنګ د پاکستان په مختلف سيمو کې د اربونو ډالرو پانګونه کړې ده.
د پاکستان پوځ او نیمه پوځي ځواکونو سرتېري له شاوخوا دوو لسیزو راهیسې په بلوچستان کې ځای پر ځای دي او هلته یې د وسلوالو ډلو پرضد اقداماتو ته دوام ورکړی دی.
د پاکستان تر جوړېدو وروسته په تېرو ۷۴ کلونو کې یوشمېر بلوڅ ډلو په مختلفو وختونو کې پینځه ځلې د رياست پرضد وسله پورته کړې ده چې په غبرګون کې يې هر وار حکومت پوځي عملیات کړي دي.