د بلوچستان په کوهلو سیمه کې د ځمکلاندې بم په چاودنه کې د پاکستان پوځ دوه افسران وژل شوي دي.
د پاکستان پوځ د عامه اړيکو ادارې (ای اېس پي ار) په خپله خبرپاڼه کې ليکلي چې دا پېښه د فبرورۍ پر ۱۰مه سهار شوې ده.
د پوځ په خبره، هغه مهال د یو استخباراتي راپور پر اساس په یاده سیمه کې عملیات ترسره کېدل، چې د پوځ ګاډی د سړک پر غاړه په ښخ شوي ماین وربرابر شو.
کوهلو سیمه له مرکز کوټې څخه شاوخوا ۵۲۷ کېلومیټره لیرې ختیځ لوري ته پرته ده.
خبرپاڼه وايي، د ماين چاودنې په نتيجه کې د پوځ يو مېجر او يو کېپټن ووژل شول او درې پوځیان ژوبل شول.
ای اېس پي ار پرمخ لیکلي چې په هغه سیمه کې د "ورانکارو" خلاف د پوځ عملیات دوام لري.
تر دې دمه کومې وسلوالې ډلې د برید مسوولیت نه دی منلی، خو تر دې وړاندې په بلوچستان کې پر امنيتي ځواکونو د زياترو بريدونو ذمه واري بلوڅ بېلتون غوښتونکو ډلو منلې دي.
