د خیبر پښتونخوا د باجوړ چارواکي وايي چې هلته نامعلومه وسلوالو د پولیسو يو ځايي مشر په ډزو وژلی دی.
د باجوړ د پولیسو ویاند محمد اسرار د فېبرورۍ پر ۱۵مه مشال راډیو ته وويل چې وسلوالو بېګا د واړه ماموندو پر تاڼې برید وکړ چې پکې اېس اېچ او ګل محمود دین وژل شوی دی.
هغه زیاته کړه چې د پولیسو تر ځوابي ډزو وروسته وسلوال وتښتېدل. تراوسه هېڅ یوې ډلې د پېښې ذمه واري نه ده منلې.
له تېرو څو کلونو راهیسې د باجوړ په ګډون د خیبر پښتونخوا په بېلابېلو برخو کې ناامني، وسلوال بریدونه او له امنیتي ځواکونو او پولیسو سره د وسلوالو نښتې خورا زیاتې شوې دي.
په هغه صوبه کې خلکو وخت پر وخت د احتجاجونو پر مهال حکومت او امنیتي ادارې تورنې کړې دي چې د وسلوالو پر فعالیتونو يې سترګې پټې کړې دي.
خو د پاکستان حکومت او پوځ دا دعوه ناسمه بولي او وايي، د "ترهګرۍ پرضد له مبارزې" نه په شا کېږي او د وسلوالو پر وړاندې هدفي عملیاتو ته دوام ورکوي.
