د خيبر پښتونخوا د ملاکنډ ډېوېژن د نهو ضلعو سوداګرو سیمې ته د پاکستان د ټیکسونو (مالیو) او ګمرکي (کسټمز) محصولاتو د نظام د ممکنه نفاذ ضد کاربنديز شوی دی.
د مې پر ۱۴مه د کاربنديز پر مهال دوکانونه او کاروباري مرکزونه تړل شوي دي.
پر دې مهال د نهو ضلعو شخصي تعليمي ادارو مشرانو، وکيلانو او د ځايي حکومتونو منتخب استازو هم له سوداګرو سره يوځای د کاربنديز ملاتړ کړی دی.
د پاکستان حکومت په ۲۰۱۸ز کال کې قبایلي ضلعې او ملاکنډ ډېوېژن ځانګړی حیثیت ختم کړی وو نو تر پينځو کلونو پورې یې ورته ټیکسونه معاف کړي ول خو پخواني حکومت د سیمې د سوداګرو، سیاستوالانو او ولسي مشرانو تر مخالفت وروسته وویل چې هلته د ټیکسونو نظام نه غځوي.
د وزیراعظم د هغه وخت سلاکار امیر مقام د ۲۰۲۳ز کال د جون پر نهمه ویلي ول چې قبایلي ضلعې او ملاکنډ ډېوېژن د ۲۰۲۳-۲۴ز مالي کال لپاره له مالیو مستثنا دي.
په پاکستان کې نوی مالي کال د جولای پر لومړۍ نېټه پیلېږي او وفاقي حکومت عموماً په جون یا کله نا کله په مې میاشت کې قامي اسمبلۍ ته د راتلونکي مالي کال بودیجه وړاندې کوي.
اوس چې په پاکستان کې وفاقي حکومت د ۲۰۲۴-۲۵ز مالي کال د بجټ تیارولو بهیر ته دوام ورکړی دی نو د ملاکنډ سوداګر اندېښمن دي چې ښايي اسلام اباد سږ کال هلته د مالیو نظام وروغځوي.
د باجوړ سوداګرو د مې پر ۱۳مه تر یوې غونډې وروسته خبرداری ورکړ چې که حکومت په دې ضلع کې نوي ټیکسونه ولګول نو دوی به يې پرضد احتجاج پیل کړي.
د غونډې ګډونوال او د عنایت قلعې بازار د اتحادیې مشر عمران ماهر مشال رېډیو ته وویل چې حکومت له دوی سره د ټیکسونو نه اخیستو ژمنه کړې وه خو اوس داسې اوازې دي چې په باجوړ کې به هم ټیکسونه لګول کېږي چې دوی ته د بدو مالي حالاتو له وجې د منلو وړ نه دي.
ورته غونډه د مې پر ۱۲مه، د سوات په مینګوره کې شوي چې پکې تاجرانو ویلي، ترهګرۍ او قدرتي افتونو ورته ډیر زیان رسولی دی او ترڅو یې چې کاروبارونه او پرمختیا د هېواد د نورو برخو په څیر نه وي، تر هغې ټیکسونه نه مني.
تر دې وړاندې، د ملاکنډ د سوداګرو ټولنې، د یوشمېر ګوندونو سیاستوالانو او د سوات، بر او کوز دیر، بر او کوز چترال، ملاکنډ، بونېر، باجوړ او شانګلې ضلعو مشرانو د مې پر اوومه په مینګوره کې بیړنۍ غونډه وکړه او خبریالانو ته یې وویل چې هغې سیمې ته د ټیکسونو د غځېدو مخالفت کوي.
د پاکستان حکومت تر اوسه د سوداګرو د تازه غوښتنو او اندېښنو په اړه څه نه دي ويلي.
