د ملګرو ملتونو یوه جګپوړي چارواکې ویلي دي چې شمالي غزه د اسراییلو او حماس ترمینځ له شپږ میاشتنۍ جګړې او فلسطین ته د خوراکي توکیو په رسولو باندې د اسراییلو د سختو بندیزونو وروسته اوس له"بشپړ قحط" سره مخ شوې ده.
ملګرو ملتونو د خوراک د نړیوال پروګرام امریکایي مشرې سینډي مکین د مې پر درېیمه اېن بي سي ټېلېویژن ته وویل چې د غزې په تړلو برخو کې بند پاتي شوي ملکي وګړي د قحطۍ سره مخامخ دي.
هغې وویل چې اوربند او د ځمکې او سمندري لارو د مرستو ډېر جریان په غزه کې د مخ په زیاتیدونکي بشري ناورین سره د مقابلې لپاره اړین دی. په غزه کې۲،۳ مېلیونه وګړي اوسېږي.
اسراییل چې غزې ته د ننوتلو په لارو کنټرول لري، سمدلاسه یې په دې لا څه تبصره نه ده کړې خو وايي چې د ځمکې له لارې د خوراکي توکو او نورو بشري مرستو په اجازې ورکولو کار کوي.
تر دې وړاندې د انصاف نړیوال عدالت اسراییلو ته امر کړی وو چې محاصره شوې فلسطیني ابادۍ ته د خوړو او بنیادي توکیو د لېږد د یقیني کولو او د قحطۍ مخنیوي لپاره اړین او موثر اقدامات وکړي.
عدالت د مارچ پر ۲۸مه ویلي ول چې په غزه کې فلسطینیان عملاً له خراب وضعیت او قحطۍ سره مخامخ دي.
حماس، چې امریکا او اروپایي ټولنې ترهګره ډله ګرځولې، د ۲۰۲۳ز کال د اکتوبر پر اوومه پر اسراییلو برید وکړ او شاوخوا ۱،۲۰۰ اسراييلي وګړي يې ووژل او۲۵۰ کسان یې یرغمل کړل.
تر اوسه یوشمېر یرغمل شوي د یو جوړ جاړي له لارې خوشې شوي دي. اسراییلو د حماس د برید په غبرګون کې سختې پوځي کاروايۍ ته دوام ورکړی دی. په جګړه کې لسګونه زره فلسطینیان وژل شوي دي چې زیاتره یې ښځې او ماشومان دي.
