نړیوال بانک وایي د پاکستان په بېلا بېلو برخو کې نېږدې ۲۰ میلونه ماشومان له ښوونځیو بهر دي.
بانک د مې پر دویمه په خپاره کړې راپور کې ویلي چې په پاکستان کې د غربت او د خلکو د خراب اقتصادي وضعیت له امله ماشومانو ته پوره خواړه هم نه رسیږي.
بانک ویلي، که حکومت د اقتصاد ودې لپاره کار وکړي او د دې لپاره مناسبې تګلارې جوړې کړي نو له دې سره د پاکستانیو ژوند او تعلیمي وضع ښه کېدلای شي.
نړیوال بانک که څه هم له سکولونو د بهر ماشومانو شمېر په میلیونو کې ښاېې خو د خیبر پښتونخوا حکومت تېر کال ویلي ول چې په هغه صوبه کې ۴۸ لاکه ماشومان ښوونځیو ته نه ځي.
د ملګرو ملتونو د تعلیمي، ساینسي او کلتوري چارو ادارې (یونېسکو) پخوانی چارواکی جاویدعلي وایي، غربت او ترهګري له تعلیم څخه د ماشومانو په لیري پاتې کولو کې غټ رول لوبولی دی.
جاید علي د یونېسکو لپاره په خیبر پښتونخوا او د پاکستان په نورو برخو کې ۱۲ کاله په تعلیمي پروژو کې کار کړی دی. نوموړي د مې پر څلورمه مشال راډیو ته وویل '' لومړۍ بدامني وه، ورپسې کرونا راغله، د هغې نه پس د ګرانۍ دور تېریږي، دې کار ډېر خلک مجبوره کړي دي چې خپل ماشومان سکولونو ته ونه لیږي.''
جاوید علي وویل وړاندې وویل، په زیاتره سکولونو کې د زده کړو اړوند اسانتیاوې هم نشته او دا هم د ماشومانو له سکولونو د لېرې پاتې کېدو وجه ده.
د نړیوال بانک په راپور کې دا هم ویل شوي چې حکومتونو له پکار دي چې اوږد مهاله او عوام دوسته کړنګلارې جوړې کړي او داسې پالیسانې جوړې کړي چې د ماشومانو د خوړو کمښت ستونزې حل کړي او هر ماشوم ته ښوونځي ته د تلو لاره برابره کړي.
