کراچۍ کې هندوانو د کم عمره نجونو تښتولو او مذهب بدلولو پرضد مظاهره کړې
په کراچۍ کې د سیند صوبې لسګونه هندوانو د کم عمره نجونو د تښتولو او په زور یې د مذهب بدلولو پرضد مظاهره کړې ده. مظاهرچیانو د مارچ پر ۳۰مه د کراچۍ د خبریالانو له مرکزه د سیند اسمبلۍ تر ودانۍ پورې لاریون وکړ او د هندوو نجونو د تښتونو او مذهب بدلولو پرضد یې نعرې ووهلې. سیند اسمبلۍ په ۲۰۱۶ز کال کې د لږکیو د ساتنې مسوده منظوره کړې وه چې تر اوسه د قانون په حیث نه ده نافذه شوې.