د ایران دولتي خبري اژانس اېرنا وايي، وسلوالو د اکتوبر پر ۲۶مه په شېراز ښار کې د شیعه ګانو پر یوه لوی مذهبي ځای برید کې ۱۵ کسان وژلي او لسګونه نور یې ژوبل کړي دي.
تر دې وړاندې اژانس د وژل شویو کسانو شمېر لږترلږه ۱۳ کسان یاد کړی وو، خو د ايران د کورنیو چارو وزیر احمد وحیدي ویلي ول، چې ډېری کسان ژوبل شوي او ښايي د مړو شمېر زیات شي.
دا برید په داسې حال کې شوی چې د اکتوبر پر ۲۶مه نېټه د ۲۲ کلنې مهسا اميني د مړینې څلوېښتي وه او پر دې مهال په بېلابېلو سيمو کې د امنيتي ځواکونو او مظاهرچیانو ترمينځ نښتي شوې وې.
مهسا اميني د سېپټېمبر پر ۱۶مه د پوليسو په حراست کې تر بېهوښۍ وروسته مړه شوې وه. هغه تر دې درې ورځې وړاندې د حجاب قانون سرغړونې په تور نيول شوې وه.
اېرنا خبري اژانس د عیني شاهدانو په حواله ویلي چې بریدګرو د شاه چراغ جومات په وره کې پر زیارت کوونکو او کارکوونکو ډزې وکړې.
اژانس بریدګر د "تکفیري ترهګرو" په توګه ياد کړي. په ایران کې چارواکي دا اصطلاح د سختدریځو سني اسلامپالو لپاره کاروي. وروسته اسلامي دولت وسلوالې ډلې (داعش) د بريد ذمه واري ومنله.
د راپورونو له مخې، له درو بريدګرو څخه یې دوه نيول شوي، خو د سيمه ييزو پوليسو مشر وروسته وويل چې حمله يوه وسلوال کړې چې نيولی یې دی.
د کورنیو چارو وزیر احمد وحیدي ویلي مظاهرچیان تورن کړل چې د "ترهګرو بریدونو" لپاره زمینه برابروي.
