د ګلګت بلتستان پولیس وايي په سیلانۍ سیمه، هونزه کې د يو ګاډي د ټکر له وجې ۱۸ کسان زخمي شوي دي.
د هونزه پوليس مشر ايس ايس پي ظهور احمد د مې په اتمه نيټه مشال راډيو ته وويل چې د مې پر اوومه ناوخته له هونزه څخه ګلګت ته تلونکي د غير ملکي سيلانيانو يو ګاډی په سمایرنګر سیمه کې د سړک حفاظتي ديوال سره وجنګيد.
د هغه په وينا په زخمیانو کې ۱۵ بهرنيان هم شامل دي. نوموړي زیاته کړه چې په دوی کې ۱۴ د فرانس او ۱ د کاناډا دی.
د هغه په خبره د ټولو زخميانو درملنه روانه ده او د هېچا ټپ مرګونی نه دی.
