په داسې حال کې چې اروپا ته د مهاجرت د یوې نوې څپې په اړه اندېښنې ډیرې شوي، د یونان وزیراعظم او د ترکیې ولسمشر رجب طیب اردغان د افغانستان په اړه خبرې کړې دي.
د ترکیې ولسمشر رجب طیب اردغان، د یونان وزیراعظم کېریاکوس میتسوتاکیس ته د اګست پر ۲۰مه د ټېلیفون له لارې ویلي چې اروپايي ټولنه باید د افغانانو مرسته په افغانستان کې دننه یا په ګاونډيو هیوادونو کې وکړي، ګنې نو د مهاجرت د یوې نوې څپې راتګ به حتمي وګرځي.
د نوموړي له دفتره په یو بیان کې ویل شوي چې که چیرې افغانستان کې کراري رانشي نو د مهاجرت کچه به نوره هم لوړه شي او د ټولو لپاره به یوه ننګونه (چېلنج) وي.
د یونان وزیراعظم هم ویلي چې باید د افغانستان له ګاونډیانو سره مرسته وشي چې دا ډول افغان کډوال خپلو کورونو ته نېږدې پاتې شي.
په افغانستان کې د طالبانو ولکې، مخ په خرابېدونکي اقتصاد او اوږد مهاله بشري ناورین په اروپا کې دا اندېښنې راولاړې کړي چې هسې نه د ۲۰۱۵ز کال د مهاجرت بحران بیا تکرار شي.
په دغه بحران کې تر یو ميلیون ډیرو خلکو په منځني ختیځ کې د بېوزلۍ او جګړو له کبله د ترکیې له لارې یونان او نورو اروپايي هیوادونو ته هجرت وکړ.
دا مهال په ترکیه کې د نړۍ له نورو هېوادونو د بېکوره شویو خلکو په ګډون څلور ميلیونه شامي او درې لکه افغان کډوال ژوند کوي.
