د لاسرسي ځای

تازه خبر

افغان ځواکونو په هرات او بلخ کې د طالبانو بریدونه شنډ کړي: چارواکي


افغان ځواکونه د ۲۰۲۱ز کال د اګست پر نهمه په هرات ښار کې د ګزمې پر مهال.

چارواکي وايي، د افغانستان د هرات او بلخ ولایتونو پر مرکزونو یې د طالبانو بریدونه شنډ کړي دي.

د هرات والي عبدالصبور قانع د اګست پر نهمه په یوه خبري غونډه کې وویل، افغان ملي امنیتي ځواکونو د ولایت پر مرکز یې د طالبانو بریدونه شنډ کړي دي.

قانع وویل چې طالبانو ته یې درنه مرګ ژوبله اړولې ده خو په دې اړه یې نور معلومات ور نه کړل.

طالبانو د نوموړي د څرګندونو په اړه څه نه دي ویلي.

دا په داسې حال کې ده چې له بلخ ولایته هم د درنو نښتو خبرونه راغلي دي.

چارواکي وايي چې طالبانو د اګست اتمې او نهمې نېټې ترمنځ نیمه شپه مرکز مزار شریف ته نېږدې پر دهدادي ولسوالۍ ډله ییز برید وکړ چې افغان ځواکونو شنډ کړ.

د طالبانو ویاند ذبیح الله مجاهد پر ټوېټر ادعا کړې وه چې د دوی وسله وال مزارشریف ښار ته ننوتي دي.

بل پلو د سمنګان د ولایتي شورا مرستیال محمد هاشم سروري وايي چې د مرکز ایبک ښار له زندانه شاوخوا ۵۰۰ بندیان تښتېدلي دي.

د سمنګان امنیتي چارواکو تر اوسه په دې اړه څه نه دی ویلي.

XS
SM
MD
LG