د افغانستان د هرات ولایت والي وايي، امنیتي او دفاعي ځواکونو د جولای پر ۲۳مه شپه پر کرخ ولسوالۍ د وسلوالو طالبانو حمله پر شا تمبولې ده.
عبدالصبور قانع، د جولای پر ۲۴مه رسنیو ته وویل، د بادغیس له خوا د طالبانو په پلان حمله کې دې ډلې ته مرګ ژوبله اوښتې ده.
نوموړي ویلي، "د نښتې په پایله کې د درې سرګروپانو په ګډون ۷۰ وسله وال طالبان وژل شوي یا ټپي شوي دي."
د افغانستان امنیتي او دفاعي ځواکونو د جولای پر ۲۳مه سهار له وسله والو طالبانو د کرخ ولسوالۍ د مرکز د نیولو خبر ورکړی و.
په بل خبر کې د هرات محلي چارواکي ادعا کوي چې پر سلما بند یې د وسله والو طالبانو حمله پرشا تمبولې ده.
د هرات ولایت د مطبوعاتي دفتر په اعلامیه کې راغلي چې طالبانو پر دغه بند پراخه حمله پلان کړې وه. خو د افغان ځواکونو په کمین کې دوه طالبان وژل شوي او پنځه نور ټپیان دي.
طالبانو په دې اړه څه نه دي ویلي.
