د چين په مرکزي برخو کې سختو سېلاوونو لږ تر لږه ۲۵ کسان وژلي او تر دوو لکو پورې کسان له کورونو څخه خوندي ځایونو ته انتقال شوي دي.
د چين دولتي خبري اژانس سینهوا د جولای پر ۲۱مه ویلي چې د هېنان ولایت يو شمير ښارونه د تېرو څو ورځو بارانونو او سېلاوونو ځپلي او په مرکز ژېنګژو کې سېلاوونو خورا زیات تاوان اړولی دی.
په ټولنیزو رسنیو خپرې ویډیوګانې ښيي چې ګاډي او د ړنګو کورونو ملبه سېلاو لاهو کړې، سړکونه یې وران کړي او خلک په اوبو کې بند پاتې دي.
سینهوا وايي، د جولای ۲۱مې تر شپې به په ولایت کې باران دوام ولري او "دا ډول باران عموماً په ۱۰۰ کلونو کې یو ځل کېږي."
په ژېنګژو کې د سېلاوونو د کنټرول مرکزي دفتر په یوه اعلامیه کې ويلي چې "وضعیت ډېر خراب دی."
