د پاکستان د بهرنیو چارو وزارت او په کابل کې پاکستان سفارت وايي، د افغان حکومت په غوښتنه یې په اسلام اباد کې د سولې په اړه درې ورځنۍ غونډه ځنډولې ده.
د بهرنیو چارو وزارت ویاند زاهد حفیظ چودري د جولای پر ۱۵مه مشال راډیو ته ویلي ول چې د افغانستان د سولې لپاره ځانګړي کنفرانس ته یې د جولای له ۱۷مې څخه تر ۱۹مې پورې نېټې ټاکلې وه چې پکې یې د ګډون لپاره د افغانستان سیاسي مشرانو او حکومتي چارواکو ته بلنه ورکړې وه.
خو د پاکستان لپاره د افغان ولسمشر ځانګړي استازي عمر داوودزي د جولای پر ۱۵مه مشال راډیو ته ویلي ول چې اسلام اباد ته یې وړاندیز کړی چې غونډه وځنډوي او تر لوی اختر وروسته یې جوړه کړي.
تر هغې وروسته د جولای پر ۱۶مه د پاکستان د بهرنیو چارو وزارت او په کابل کې د هغه هېواد سفیر منصور علي خان په بیان کې ویلي چې اسلام اباد کنفرانس ځنډولی او بله نېټه به یې وروسته اعلان کړي.
