له ۲۸ ورځو راهیسې روان، د بنو جانيخېلو احتجاج حکومتي جرګې سره د يوې لوظنامې تر کولو وورسته ختم شو.
د جون په ۲۷مه د جانيخېلو مشرانو پرلتوالو ته وويل چې له حکومته يې د وعدو د عملي کولو ضمانت اخیستی دی. د دوی يو مشر نور محمد وويل چې د اتمانزو وزیر يوه جرګه به په دې لړ کې د ضامن په توګه د څارنې کار کوي نو ځکه دا ځل د حکومت له خوا د ژمنو د نه عملي کولو ګنجایش کم دی.
هغه پر پرلتوالو غږ وکړ چې ایا دا لوظنامه ورته منظوره ده نو هغوی یې په ځواب کې وويل چې مشرانو یې پرېکړه کړې نو ورته قبوله ده.
د حکومت له خوا په جرګه کې ډپټي کمشنر کيپټن ريټايرډ زبېراحمد نيازي او د خيبر پښتونخوا د ټرانسپورټ وزیر ملک شاه محمود وزیر شامل وو. دوی په بنو کې د جون پر ۲۷مه په يوه خبري غونډه کې وويل چې د مظاهره چيانو ټولې غوښتنې مني چې په دې ډول دي.
منل شوې غوښتنې
- د امن لپاره د ټولو وسله والو پر ضد يو شان کاروايي
- وژل شوو کسانو ته مالي معاوضه
- د پرلتوالو شوی تاوان به حکومت پوره کوي
- د ملک نصیب خان وژونکي به نيول کېږي او سزا به ویني
- د جانيخېلو ټول نيول شوي کسان به خوشې کېږي
- د مارچ د میاشتې لوظنامه به هم عمليکېږي
د دې معاهدې د عمليکولو د څارنې کار يو اوه کسیزې جرګې ته سپارل شوی دی. تر دې لوظنامې وروسته د جانیخېلو خلکو د ملک نصیب خان د مړي ښخولو چاره پيل کړه. نوموړی د مې په ۳۰مه د ناڅرګنده وسله والو له خوا په نښه شوی وو. پوليسو ويلي چې په دې اړه یې پلټنې پيل کړې دي خو د جانيخېلو پرلتوالو پرې باور نه درلود نو ځکه یې د مې له يو دیرشمې څخه احتجاج پيل کړ.
حکومت د دوی د قانع کولو لپاره يوه جرګه ورولېږله خو کله چې مذاکراتو نتيجه ورنه کړه نو د جانیخېلو پرلتوالو اسلام اباد ته لاريون پيل کړ. خو پولیسو یې مخه ونيوله او ډزې یې پرې وکړي. له دې امله يو احتجاج کوونکی ووژل شو او ګڼ نور ونيول شول.
