سږکال په افغانستان کې د زڼغوځيو حاصلات د پام وړ زیات شوي دي.
د کرنې او مالدارۍ وزارت ویاند اکبر رستمي نن ازادي راډیو ته وویل چې د دغه وزارت ارزونې ښيي، چې سږکال د هېواد په کچه ۲۴ زره ټنه زڼغوځيو راټول شوي چې د تېر کال په پرتله ۱۲ سلنه زیاتوالی په کې لیدل کېږي.
تېر کال په ټول هېواد کې د زڼغوځيو حاصل ۲۳ زره ټنه وو.
د زڼغوځيو ځنګلونه د هېواد په ٩ ولایتونو خوست، پکتیا، پکتیکا، ننګرهار، کونړ، لغمان، نورستان، کاپیسا او کابل کې دي.
