د قیرغیزستان ولسمشر سورونبای جېنبېګوف د هېواد د پارلېماني انتخاباتو په رسمي نتیجو کې د نوموړي او د ده د حکومت پلویو ګوندونو د بریا د اعلان په غبرګون تر پراخو مظاهرو وروسته استعفا ورکړې.
نوموړي د اکتوبر پر ۱۵مه په بیان کې ویلي چې ځکه یې د استعفا فیصله کړې چې د هېواد "سوله او یووالی له هرې څوکۍ زیات مهم دي."
جېنبېګوف په بیان کې ویلي چې "نه غواړي د قیرغیزستان په تاریخ کې د خپلو ولسي وګړو د ویشتونکي یو خونړي ولسمشر په نوم یاد شي."
دا په داسې حال کې ده چې د اکتوبر پر ۱۴مه نوموړي د پارلېمان له لوري د هېواد د نوي وزیراعظم په توګه د صادر جپاروف ټاکنه تایید کړه.
جپاروف د مظاهرو پر مهال له زندانه خوشې شو. دی د اغوا په جرم سزا شوی وو.
د وزیراعظم په توګه د جپاروف تاییدېدلو قیرغیزستان د اکتوبر څلورمې انتخاباتو تر رسمي نتیجو وروسته د هغه بحران هواري پر لار روان کړ چې د مظاهرو له وجې پیدا شوی وو.
تر احتجاج وروسته انتخاباتي کمېشن نتیجې لغوه کړې ځکه چې مظاهره چیانو په پیسو د رایو اخیستو او نامناسبه کړنو تورونه پورې کړل او د اکتوبر پر شپږمه یې حکومتي ودانۍ ونیولې.
