د لاسرسي ځای

تازه خبر

خبرونه

امریکا: کووېډ-۱۹ ناروغۍ په ۲۴ ساعتونو کې تر ۲،۰۰۰ زیات کسان وژلي

په امریکا کې په تېرو درو میاشتو کې د لومړي ځل لپاره پر یوه ورځ د کووېډ-۱۹ ناروغۍ څه باندې ۲،۰۰۰ کسان وژلي دي.

امریکا کې په وروستیو اوونیو کې د کورونا وایرس پېښې په زیاتېدو دي.

د اګست پر شپږمه په هغه هېواد کې په ۲۴ ساعتونو کې د څه باندې ۵۸۰،۰۰ نویو پېښو او د ۲،۰۶۰ کسانو د مړینې شمېر ثبت شو.

په یوه شپه او ورځ کې د مړینې دا شمېر په تېرو درو میاشتو کې دومره نه وو ختلی، وروستی ځل د مې پر اوومه نېټه په ۲۴ ساعتونو کې څه باندې ۲،۰۰۰ امریکایان کووېډـ۱۹ مړه کړي ول.

په نړۍ کې د کووېډ-۱۹ تازه شمېرې

په نړۍ کې د کورونا وایرس ناروغۍ (کووېډ-۱۹) له وجې د مړو شمېر ۷۱۵،۱۶۳ ته رسېدلی دی.

د کووېډ-۱۹ ارقامو په اړه د امریکا جانز هاپکېنز پوهنتون د ځانګړې ووبپاڼې په وینا، د اګست تر اوومې په نړۍ کې د رسمي مثبتو پېښو شمېر ۱۹.۱ میلیونه ته لوړ شوی دی خو تر ۱۱ میلیونه زیات کسان له ناروغۍ جوړ شوي هم دي.

کورونا وایرس په نړۍ کې تر ټولو زیاته امریکا، ورپسې برازیل او بیا هند ځپلي دي.

د کورونا وایرس لومړۍ پېښې د ۲۰۱۹ز کال په ډېسېمبر کې د چین په ووهان کې اعلان شوې چې د څو میاشتو په موده کې ناروغي د نړۍ تر شاوخوا هرې سیمې ورسېده.

په مارچ کې د روغتیا نړیوال سازمان د وایرس خپرېدو ته په کتو جهاني وبايي حالت اعلان کړ.

د نننۍ ورځې ټول خبرونه وګورئ

پولیس: جنوبي وزیرستان کې د طالبانو مرکز کې چاودنه شوې

په جنوبي وزیرستان کې د وسله والو طالبانو په مرکز کې چاودنې پنځه وسله وال وژلي او ۱۰ نور یې ژوبل کړي دي.

د جنوبي وزیرستان پولیسو د اکتوبر پر ۳۱مه مشال راډیو ته وویل چې یوه ورځ وړاندې د اکتوبر پر ۳۰مه، کشمیر ګټ سیمه کې د تحریک طالبان ګنډاپور وسله والې ډلې په یو مرکز کې دغه چاودنه شوې ده.

د تحریک طالبان پاکستان یو قوماندان د نوم نه ښودلو په شرط مشال راډیو ته وویل، دا برید د بې هوابازه الوتکې (ډرون) په واسطه ترسره شوی دی. دغه تن د خپلې غاړې د پنځو طالبانو د ژوبلېدو خبره تایید کړه.

د جنوبي وزیرستان د پولیسو مشر شوکت علي د اکتوبر پر ۳۱مه مشال راډیو ته وویل، په مرکز کې چاودنه د طالبانو د خپل بم د چاودېدو له کبله شوې ده. نوموړي وویل، دا خبره نه شي تاییدولی چې ګینې حمله به د پاکستان د بې پایلټه الوتکې لخوا ترسره شوې وي.

تر دې وړاندې د اکتوبر پر ۲۷مه، دپېښور د دیر کالونۍ په یوه مدرسه کې شوې چاودنه کې لږ تر لږه اته کسان موژل شوي او خوا اوشا ۱۰۰ کسان ژوبل شوي ول. تر اوسه د دې چاودنې ذمه واري چا نه ده منلې.

ارمینیا او ازرباییجان منلې چې ولسي سیمې به نه نخښه کوي

په لانجمنه سیمه ناګورنو قره باغ کې د سېپټمبر له ۲۷مې نېټې راهېسې جګړه روانه ده.

ارمينيا او اذرباييجان پر دې سلا شوي چې ولسي ابادۍ به نه په نښه کوي او په لانجمنې سیمې ناګورنو قره باغ کې د جګړې د ودرولو لپاره به په جنېوا کې له نړيوالو منځګړو سره خبرې کوي.

دواړه خواوې دا ژمنه په داسې حال کې کوي چې تر دې وړاندې د اوربند لپاره درې وارې هڅه شوې چې کومه نتیجه یې نه ده ورکړې.

د ارمينيا او اذرباييجان د بهرنيو چارو وزيران د اکتوبر پر ۳۰مه، پر دې هم سلا شول چې د جنګ په میدان کې پراته مړي به یو بل ته سپاري او په یوه اوونۍ کې دننه به د یو بل د قیدیانو فهرست هم تبادله کوي.

په لانجمنه سیمه ناګورنو قره باغ کې د روغې جوړې هڅې د "مېنسک ډلې" لخوا روانې دي چې پکې روسیه، فرانسه او امریکا په شریکه د جنګ د ودرولو لپاره پلانونه سنجوي.

ناګورنو قره باغ د اذرباييجان برخه منل شوې خو ارمينايي توکمه يې کنټرولوي او ګېر چاپېره سيمې يې هم ارمينايي ځواکونو نيولي دي. د دواړو خواوو ترمينځ اوسنۍ جګړه د ۲۰۲۰ کال د سېپټمبر پر ۲۷مه نېټه پیل شوې.

په ځینو اسلامي هیوادونو کې د فرانسې خلاف مظاهرې شوي

په پاکستان کې د فرانسې خلاف د مظاهرې یوه څنډه.

د فرانسې د ولسمشر اېمانوېل مېکرون لخوا د دې بیان ورکولو وروسته چې د اسلام د پیغمبر د خاکو د خپرولو دفاع به کوي، په یو شمېر اسلامي هیوادونو کې مظاهرې راپارېدلې دي.

په پاکستان، افغانستان، بنګله ديش او د مسلمانې نړۍ په یو شمېر نورو هیوادونو کې د فرانسې د ولسمشر پر وروستي دریځ سخت غبرګونونه مخې ته راغلي دي. په اسلامي هیوادونو کې خلک غصه ښکاره کوي او پر مظاهرو یې لاس پورې کړی دی.

په کابل کې د مېکرون د څرګندونو خلاف لاریون وشو.
په کابل کې د مېکرون د څرګندونو خلاف لاریون وشو.

د اکتوبر پر ۲۹مه یو بریدګر په نیس ښار کې د یو چرچ یا کلیسا دننه درې کسان د چړو په ګوذارونو ووژل، تر هغې وروسته د اکتوبر پر ۳۰مه، په فرانسه کې د امنيتي خطر کچه لوړه اعلان شوه.

د فرانسې ولسمشر دا پېښه اسلامي ترهګريزه حمله بللې ده. په نيس ښار کې د ياد چرچ مخې ته د خبرو پر مهال اېمانوېل مېکرون وويل، په فرانسویانو دا برید د هغوی د اقدارو او د عقیدې د ازادۍ د پاللو له وجې شوی دی. هغه وویل، هغوی به د خپل دریځ څخه په شا نه شي.

په ډاکه کې هم خلکو پراخې مظاهرې کړي.
په ډاکه کې هم خلکو پراخې مظاهرې کړي.

د نيس تر پېښې نږدې دوه اونۍ مخکې د پاریس په مضافاتو کې د منځني ښوونځي یو ښوونکی د ۱۸ کلن بریدګر لخوا ووژل شو. برید کوونکي له هغه سر پرېکړی و.

په ظاهره داسې ښکارېده چې بریدګر پر دې خپه و چې ياد استاد په صنف کې د ولسي ټولنې د کار په اړه د ښوونې پرمهال د اسلام د پېغمبر خاکې ښودلې وې.

د اکتوبر پر ۳۰مه، په پاکستان کې په زرګونو مظاهره کوونکو د فرانسې پر ضد نعرې ووهلې، د مېکرون عکسونه يې وسوزول او غوښتنه يې وکړه چې پاکستان دې له فرانسې خپل سفير راوغواړي.

په افغانستان کې هم زرګونو خلکو مظاهره وکړه او په کابل کې يې د فرانسې د سفارت د تړلو او له یاد هیواده د وارداتو د بندولو غوښتنه وکړه.

همدا شان په زرګونو کسانو د بنګله ديش د سرښار ډاکې په کوڅو کې مارش وکړ او د فرانسې د مصنوعاتو د بايکاټ کولو نعرې يې وهلې. د مظاهره چيانو سره په بېنرو ليکل شوي وو چې مېکرون د نړۍ تر ټولو غټ ترهګر دی.

فرانسه له خپلو ارزښتونو نه په شا کېږي: مکرون

یو امنیتي سرتېری په نیس کې تر برید وروسته پهره ورکوي

د فرانسې ولسمشر اېمانوېل مکرون ویلي هېواد یې هېڅکله هم خپل "ارزښتونه" نه پرېږدي.

نوموړي دا خبره تر هغې وروسته کړې چې د اکتوبر پر ۲۹مه د نیس ښار په یوه کلیسا کې بریدګر درې کسان په چاړه وژلي.

مکرون دا "اسلامپاله ترهګر برید" بللی.

چارواکي وايي، بریدګر یوې کلیسا ته ننوت او د یو سړي مرۍ یې غوڅه کړې او له یوې زړې ښځې سر یې پرې کړی او بله ښځه یې زښته ژوبله کړه چې بیا یې له کلیسا سره نېږدې په چایخانه کې سا ورکړه.

د نیس ښاروال کرېستیان اېستروسي ویلي مشکوک بریدګر تیونسی وګړی وو او چې پولیسو وویشت او ژوبل یې کړ نو د "الله اکبر" نعرې یې وهلې.

په سمدستي ډول د حملې تر شا عوامل نه دي معلوم خو اېستروسي دا حمله د اکتوبر پر ۱۶مه له پلازمېنې پاریسه بهر د یوه استاد سیموېل پیتي له وژلو سره تړلې.

پر هغه ورځ یوه چېچن توکمه وګړي د ښوونځي استاد سر پرې کړی وو.

بریدګر ویلي ول چې هغه پیتي ته په ټولګي کې زده کوونکو ته د اسلام د پیغمبر خاکو ښوولو په غبرګون سزا ورکول غوښتل.

امریکا کې تېر شواروز ۹,۱۰۰۰ کسان کورونا وایرس وهلي

کورونا وایرس وهلی ناروغ کس تر درملنې لاندې دی.

په امریکا کې په تېرو ۲۴ ساعتونو کې ۹۱،۰۰۰ کسانو ته کورونا وایرس لګېدلی چې بېساری شمېر ګڼل کېږي.

د جانز هاپکنز پوهنتون د شمېرو له مخې په امریکا کې د اکتوبر پر ۲۹مه نېټه د کورونا وایرس وهلو کسانو شمېر ۸ میلیونو او نهه لاکو ته ورسېد او له دې د مړو شمېر تر ۲۲۸،۰۰۰ اوښتی دی.

د امریکا د براون پوهنتون د عامې روغتیا مشر ډاکټر اشیش جا رویټرز اژانس ته وویل: "اوس په امریکا کې حالت زښت کړکېچن دی."

د اروپا په ګڼو هېوادونو کې د کورونا وایرس دویمې څپې د دې لویې وچې ګڼ هېوادونه بیا سخت ټولبند لګولو ته اړ کړي دي.

په وروستیو کې فرانسې رستورانونه او ځینې نور کاروبارونه بند کړي.

اخوا په جرمني کې هم د نومبر له دویمې نېټې ورته ټولنبد لګول کېږي.

هند کې کرونا وړجني تر اتیا لکو زیات شول

هند کې روغتیايي کارکوونکي د کرونا ویروس د ناروغانو د موندلو لپاره د ازموینې پر مهال.

په هند کې د اکتوبر تر ۲۹مې نېټې په دغه هېواد کې د کرونا وړجنو شمېر تر ۸ میلیونو واوښت.

تر اوسه په دغه هېواد کې چې یو ارب او ۳۰ کروړه وګړي لري، یو لک او ۲۰ زره تنه له کرونا وبا مړه شوي.

دا مهال تر هند یوازې د امریکا په متحده ایالاتو کې د کرونا ړایرس پېښې ډېرې دي.

د امریکا حکومت د شمېرو له مخې، په دې هېواد کې د کرونا وایرس نهه میلیونه او ۱۰۰ زره مثبتې پېښې ثبت شوې دي.

عدالت عمران خان پر پارلمان د حملې مقدمه کې بري کړ

وزیر اعظم عمران خان

نن د اکتوبر پر ۲۹مه په اسلام اباد کې د ترهګرۍ ضد یوه عدالت پر پارلمان د حملې په مقدمه کې وزیراعظم عمران خان بري کړ.

په دغه مقدمه کې پر نوموړي تور وو چې شپږ کاله وړاندې یې د پاکستان پر پارلمان د ګوند د ځینو نورو مشرانو او د خپلو پلویانو ترڅنګ حمله کړې وه. دا مقدمه د ترهګرۍ ضد د یو قانون لاندې د ۲۰۱۴م کال د اګست پر ۳۱مه نېټه د هغه وخت د مسلم لیګ ن ګوند په حکومت کې درج شوې وه.

په دغه مقدمه کې د تحریک انصاف ګوند پر مشرانو دا تور هم دی چې د پاکستان د سرکاري ټیلیوېژن ودانۍ ته ورغلي وو او د ټیلیوېژن کنټرول روم یې په خپل کنټرول کې اخېستی وو او له دغې وجې ټیلیوېژني پروګرامونه هم د لږ وخت لپاره بند شوي وو.

د ګوند پر ځینو نورو مشرانو يې تور پورې شوی وو چې په ۲۰۱۴م کال کې یې د خپلې احتجاجي ناستې په ورځو د پاکستان پر قامي اسمبلۍ حمله کړې وه.

بلخوا نن د دغه مقدمې د اورېدنې پر وخت عدالت د موجوده وفاقي کابینې ځینې وزیران تورن کړي. په دغو کې د دفاع وزیر پروېز خټک ، د بهرنیو چارو وزیر شاه محمود قریشي، د تعلیم وزیر شفقت محمود او د منصوبه بندي وزیر اسد عمر شامل دي. عدالت د پاکستان عوامي تحریک مشر طاهر القادري په دغه مقدمه کې مفرور ګرځولی. بلخوا ولسمشر عارف علوي چې په دغه مقدمه کې یې نوم شامل دی خو نوموړي ته د پاکستان د ایین ترمخه استثنا حاصله ده.

مسلم ليګ نواز ډلې يو مخکښ او د قامي اسمبلۍ غړي محسن شا نواز رانجها په زيارت ورځ مشال رېډيو ته وويل چې د ۲۰۱۴ م کال په اګست مياشت کې چې د عمران خان په مشرۍ پرلتوالو په پارلېمان ودانۍ کومه حمله کړې وه نو د هغو ويډيو ګانې هم شته دی. نوموړی وايي پرازيکيوټر يا حکومتي وکيل چې د حکومت ماتحت وي او د قانون او انصاف وفاقي وزارت يې په څوکيو ګماري ،هغه پشا شو نو ځکه عمران خان په پارلېمان ودانۍ حملې کيس کې بري شو: ((پرازيکيوټرز او شهادتونه به د حکومت لخوا وړاندې کېدل. په دې مقدمه کې حکومت مدعي دی او حکومت ته شهادتونه او ګوهان وړاندې کول و خو حکومت دا وخت د عمران خان دی نو هغه څنګه کولای شي چې د ځان خلاف تبوتونه او ګواهان عدالت ته وړاندې کړي.))

بلخوا د حکومتي ګوند پاکستان تحريک انصاف د قامي اسمبلۍ غړی سليم الرحمان وايي د زيارت پر ورځ د اسلام اباد په ترهګرۍ ضد عدالت کې د عمران خلاف د ثبوتونو او ګواهانو د نشتوالي له کبله نوموړی خوشی شو.د ده په خبره پرازيکيوټر هم وويل چې دغه کيس د درواغو پر اساس جوړ شوی. سليم الرحمان په زيارت ورځ له مشال رېډيو سره په خبرو کې وويل: (( د مسلم ليګ (ن)پخواني حکومت له عمران خان د سياسي انتقام اخستو لپاره د هغه خلاف د پارلېمنټ هاوس حملې کيس جوړ کړی و. که څه هم عدالت په پارلمنټ هاوس حملې کيس کې د پاکستان تحريک انصاف پر نورو غړو د فرد جرم لګولو پريکړه کړې خو زه تمه لرم چې کله دغه کسان په راتلونکې اورېدنه کې عدالت ته حاضر شي نو دغه به هم بري شي ځکه چې په پارلېمنټ هاوس د تحريک انصاف غړو يا پلويانو حمله نه وه کړې))

په پېښور کې د پاکستان سپريم کورټ بار غړی او قانون پوهه نور عالم خان وايي په پارلېمان د حملې په کيس کې د حکومتي وکيلانو پشا کېدو دا خبره ثابته کړه چې په دې هېواد کې د انصاف نظام د ټولو لپاره يو شان نه دی او له دې کار سره په نړۍ کې د پاکستان شهرت ته ډېر تاوان رسېدلی.

نوموړي په زيارت ورځ مشال رېډيو ته وويل چې پارلېمان يوه مقدسه او جمهوري اداره ده نو که پر دې د حملې کيس د عمران خلاف ثابت شوی وی نو نوموړی له غټې سزا سره مخامخېدای شو: (( دا په اصل کې د حکومت عملداري چېلنج شوې وه نو د دې سزا عمرقېد،له څوکۍ لرې کېدل،بنديزونه او تر دې چې د مرګ سزا هم کېداې شوه.))

د يادونې ده چې د ۲۰۱۳ م کال د انتخاباتو په نتيجه کې د مسلم ليګ (ن) رهبر نواز شريف وزيراعظم جوړ شوی و خو د تحريک انصاف ګوند مشر عمران خان چې هغه وخت په اپوزيشن کې و تور يې پورې کړ چې په انتخاباتو کې درغلي شوې او بيا يې وروسته د حکومت خلاف دهرنا پېل کړه او د ۲۰۱۴ م کال په اګست مياشت کې د تحريک انصاف پرلتوالو د پارلېمنټ هاوس او وزيراعظم هاوس لور ته مارچ وکړ او هلته يې له پوليسو سره نښتې وشوې. ډان ورځپاڼه وايي د هغه وخت پرازيکيوټرز يا حکومتي وکيلانو د عمران خان او د ده د ګوند نورو غړو خلاف د کيس جوړولو لپاره په ثبوتونو کې ۶۵ تصويران،کوتکونه او داسې نور شيان له عدالت سره جمع کړي و. دوي ويلي و چې عمران خان خپل پلويان د هغه وخت د حکومت خلاف تشدد ته هڅولو و چې پکې له پوليسو سره په نښتو کې درې کسان مړه شوي او ۲۶ ژوبل شوي و.هغه وخت پوليسو د دوي خلاف د ترهګرۍ دفعې لاندې مقدمه درج کړې وه.

د تورخم لارې بندېدو خبرونه ناسم دي: پاکستان

د پاکستان حکومت په جولای کې د تورخم ور د سوداګرۍ او په محدود ډول د خلکو تګ راتګ لپاره پرانیست.

د پاکستان حکومت ویلي دي چې د تورخم لارې تړلو خبرونه ناسم دي.

دا په داسې حال کې ده چې د اکتوبر پر ۲۸مه په پاکستان کې ځینو رسنیو د حکومتي سرچینو له خولې وویل چې د تورخم لار تړل کېږي. په هغو خبرونو کې د لار تړلو لامل نه وو ښوول شوی.

خو د پاکستان دولتي راډیو پر تورخم پوله د چارواکو د بیان په حواله لیکلي چې د تورخم ور د تګ راتګ او سوداګرۍ په موخه پرانیستی دی.

د سېپټېمبر پر ۲۸مه د افغانستان لپاره د پاکستان وزیراعظم ځانګړي استازي محمد صادق اعلان وکړ چې له افغانستان سره به ټولې لارې د اوونۍ څلور ورځې د خلکو تګ راتګ لپاره خلاصې وي.

تر هغې وروسته په افغانستان کې د پاکستان سفارت او کونسلګریو د ویزو ورکړه پیل کړه.

د پاکستان حکومت په مارچ کې د کورونا وایرس خپرېدو مخنیوي په موخه له افغانستان سره لارې وتړلې خو په جولای کې یې ټولې لارې د سوداګرۍ او د خلکو محدود تګ راتګ لپاره بیا پرانیستې.

د سوات کبل کې ټرافیکي پېښه کې ۲۴ کسان ژوبل شوي

کبل کې د ټرافیکي پېښې ځای چې پکې ۲۴ تنه ژوبل دي. ۲۰۲۰، ۲۹ اکتوبر

د سوات په کبل کې د اکتوبر ۲۹مې پر سهار په یوه ترافیکي پېښه کې ۲۴ کسان ژوبل شوي. د کبل د پولیسو مشر ډي اېس پي شېر افسر خان له پېښې وروسته مشال راډیو ته وویل، په ژوبلو کې زیاتره یې د سکول ماشومان دي.

د چارواکو ترمخه دا پېښه هغه وخت وشوه کله چې په په کبل تحصیل کې نن سهار د سکول ماشومانو یو ګاډې له نورو ګاډیو سره وجنګېد.

د سوات د سېدو شریف روغتون مشر ډاکټر سلیم خان نن مشال راډیو ته وویل په ژوبلو کې د څلورو ماشومانو او یو ډراییور حالت نازک دې، او زیاتره ژوبل تنان د درملنې وروسته فارغه کړل شوي دي.

پولیس وایي پېښه د تېز رفتارۍ له وجې شوې ده.

د افغانانو په مشرۍ د سولې بهیر ملاتړي یو: هند او منځنۍ اسیا هېوادونه

قطر کې د افغانستان دولت او طالبانو ترمنځ د سولې خبرو پرانیست غونډه

د هند او منځنۍ اسیا هېوادونو د بهرنیو چارو وزیرانو په ګډه غونډه کې په افغانستان کې پر داسې سولې ټینګار وشو چې واک‌ یې د افغانانو وي.

په دې غونډه کې چې د چهارشنبې په ورځ انلاین ترسره شوه، اصلي اجنډا یې د هند او منځنۍ اسیا هېوادونو ترمنځ د سوداګرۍ پراختیا وه.

د افغانستان بهرنیو چارو سرپرست وزیر محمد حنیف اتمر د مېلمه په توګه په دې غونډه کې برخه واخیسته.

د هند، ترکمنستان، ازبکستان، تاجکستان، قرغزستان او قزاقستان د بهرنیو چارو وزیرانو تر غونډې وروسته په ګډ بیان کې وویل چې دوی په افغانستان کې د سولې د داسې بهیر ملاتړ کوي چې مشري یې د افغانانو وي، مالکیت‌یې د افغانانو وي او واک ‌یې هم له افغانانو سره وي.

پر 'ورانکارو' ډزې وکړئ: د بېلاروس کورنیو چارو وزیر

د بلاروس د کورنیو چارو وزیر یوري کرایف

د بېلاروس کورنیو چارو وزیر ویلي، امنیتي ځواکونه پر هغو کسانو ډزې کولای شي چې په "ورانکارۍ" کې برخه واخلي.

یوري کرایف دغه خبرداری داسې مهال ورکوي چې د الکساندر لوکاشینکا پرضد لاریونونه اوس د هېواد په لر او بر کې په هړتالونو او کاربندیز اوښتي.

لوکاشینکا بیا دغه هړتالونه "د پلان شویو رخنه ګرو ډلو" کار بللی دی.

د بېلاروس د کورنیو چارو وزیر چې د مظاهره‌چیانو د ځپلو لپاره پرې اروپایي ټولنې بندیزونه لګولي په یوه مرکه کې ویلي، د سوله‌ییزو مظاهره‌چیانو پرضد به وسله نه‌کارېږي خو په خبره‌یې که یوڅوک ګډوډي یا ترهګریز فعالیت وکړي، د پولیسو له‌خوا به‌ یې په لاس یا وسله باندې مخه نیول کېږي.

بېلاروس کې د سیاسي مخالفانو عوامي هړتال له هغه وروسته پیل شو چې الکساندر لوکاشینکا د مخالفانو له پرله‌پسې غوښتنو سره سره وویل چې استعفا نه ‌ورکوي.

د پاکستان د ویزو په اړه د ستونزو پر هواري د اتمر او قریشي خبرې

د افغانستان د بهرنیو چارو وزارت وايي قریشي (ښي لوري) ته د اکتوبر پر ۲۷مه له اتمر سره خبرې وکړې.

د افغانستان او پاکستان د بهرنیو چارو وزیرانو د پاکستان د ویزو په برخه کې د ستونزو پر هواري خبرې وکړې.

حنیف اتمر او شاه محمود قریشي د ټېلېفوني خبرو پر مهال په افغانستان کې د پاکستان د کونسلي چارو د پياوړتیا پر امکان بحث کړی دی.

د افغانستان د بهرنیو وزارت ویاند ګران هېواد د اکتوبر پر ۲۸مه مشال راډیو ته وویل چې ټېلېفوني خبرې د اکتوبر ۲۷مې پر ماښام وشوې.

هغه زیاته کړه: "د بهرنیو چارو سرپرست وزیر محمد حنیف اتمر له خپل پاکستاني سیال شاه محمود قریشي سره د دوه اړخیزو اړیکو پر پیاوړتیا، د افغان وګړو د ویزو د مشکلاتو پر حل او د کونسلي خدماتو د ظرفیت په لوړولو خبرې وکړې."

د ویزو د ستونزو د هواري په اړه ډېر جزییات نه دي ورکړل شوي، خو له دې وړاندې پاکستاني چارواکو ویلي، د دغه بهیر د اسانه کولو هڅه کوي.

پاکستان شاوخوا اته میاشتې د افغانانو لپاره ویزې بندې کړې وې او اوس ګڼ افغانان د ویزو تقاضا لري.

تېره اوونۍ جلال اباد کې د ویزې اخیستو پر مهال ټېل ماټېل کې لږ تر لږه ۱۵ کسان مړه شول او یو شمېر ټپیان شول.

د افغانستان د بهرنیو چارو وزارت په خبرپاڼه کې راغلي چې د وزارت سرپرست حنیف اتمر له قریشي سره د دوه اړخیزو اړیکو په پیاوړتیا او سولې بهیر کې د پرمختګونو په اړه هم غږېدلی دی.

ایران په نطنز کې د اټومي بټۍ تعمیراتي کار پیل کړی

تر چاودنې وروسته د نطنز اټومي بټۍ وداني - د ۲۰۲۰ز کال د جولای انځور.

د ملګرو ملتونو د اټومي چارو د څار اداره وايي، ایران له خپل نطنز اټومي مرکز سره نېږدې د اټومي بټۍ د برخو یوځای کولو د ځمکلاندې کارخانې (پلانټ) پر جوړولو کار پیل کړی.

د اټومي انرژۍ د څار نړیوالې ادارې (ای اې اي اې) مشر رافایل ګروسي د اکتوبر پر ۲۸مه د جرمني په مرکز برلېن کې په یوه مرکه کې وویل چې دا د هغه ځای نعم البدل ښکاري چې په جولای کې پکې چاودنه شوې وه.

تهران هغه د سبوتاژ یوه حمله بللې وه.

ګروسي وویل، ایران د بټۍ برخو یوځای کولو باندې کار روان کړی خو لا پوره شوی نه دې ځکه چې دا یو اوږد بهیر دی.

ادارې د اکتوبر پر ۲۸مه له سیټلایټه (سپوږمکۍ) اخیستي انځورونه هم خپاره کړل او ویې ویل چې دا یې د تعمیراتي کار ثبوت دی.

ګروسي زیاته کړه ایران په لویه پيمانه د ټیټې درجې غني اورانییم هم ذخیره کړي دي، خو داسې نه برېښي چې دا د اټومي وسلې د جوړولو لپاره کافي دي.

د ایران د اټومي پروګرام مشر علي اکبر صالحي تېره میاشت پر سرکاري ټېلېویژن ویلي ول چې د تباه شوي اټومي پلانټ پر ځای "له نطنز سره نېږدې د غرونو په منځ کې" نوې کارخانه جوړېږي.

ګروسي وویل ایران د اټومي انرژۍ د څار نړیواله اداره له تعمیراتي کاره خبر کړې ده او دوی اوس هم د ایران اټومي مرکزونو ته د تګ رسايي لري.

ایران له دغو تورونو انکار کوي چې ګواکې اټومي ولسې جوړول غواړي او وايي، اټومي پروګرام یې سوله ییزې موخې لري.

کندهار د زعفرانو ازمویښتي پټي کري

آرشیف

په کندهار کې د کرنې او مالدارۍ وزارت وايي په ولایت کې پر لس جریبه کرهڼیزه ځمکه د زعفرانو لس ازمویښي پټي کري.

د وزارت ویاند اکبر رستمي په چارشنبه له مشال راډیو سره په خبرو کې وویل، چې پر هر جریب ځمکه به د زعفرانو ۵۰۰ کیلو ګرامه کرل کېږي.

نوموړی زیاتوي، که په کندهار کې د زعفرانو کښت ښه پایله ورکړي نو دا به د دې سیمې د بزګرانو په اقتصادي وده کې مثبت رول ولري.

د کرنې وزارت د معلوماتو په اساس، سږکال په افغانستان کې د زعفرانو په کښت کې ۷ سلنه زیاتوالی راغلی.

دغه وزارت وړاندوینه کوي چې سږ کال به د زعفرانو حاصلات به نږدې ۲۴ مټریک ټنه ته لوړ شي.

تېر کال بیا د زعفرانو د حاصلاتو کچه ۲۰ متریک ټنه وه.

د افغانستان د زعفرانو ۹۰ سلنه په لویدیځ هرات کې تولیدېږي.

اوسمهال د کرونا وبا له لاسه د افغانستان یو کیلو زعفران تر څلویښت زره افغانیو په ټیټه بیه خرڅېږي.

هند د افغانستان د زعفرانو تر ټولو لوی پېرېدونکی دی او د افغان زعفرانو څه باندې اتیا سلنه دغه هېواد ته صادرېږي.

هند په افغانستان کې د خپل رول دفاع وکړه

د هندوستان د بهرنیو چارو وزیر سوبرا مینیام جې شنکر

د هند بهرنیو چارو وزیر د امریکا د متحدو ایالتونو د بهرنیو چارو او دفاع وزیرانو سره په کتنه کې په افغانستان کې د خپل هېواد د رول دفاع وکړه.

سوبرا مینیام جې شنکر په سېشنبه په نوي ډیلي کې له مایک پامپیو او مارک ایسپر سره تر کتنې وروسته، د افغانستان په ګډون د سیمې د څو هېوادونو پر وروستیو تحولاتو خبرې وکړې.

هغه وویل: "د افغانستان په امن او ثبات کې د هند ونډه څرګنده ده، دا زموږ تمایل هم دی، چې په دې هدف په روانو نړیوالو هڅو کې ونډه ولرو."

تر دې مخکې د پاکستان وزیر اعظم عمران خان د دوشنبې په ورځ ویلي ول، هېواد یې اندېښمن دی، چې هند ښايي د افغانستان له خاورې د پاکستان د بې ثباتۍ لپاره کار واخلي.

خو د افغانستان د بهرنیو چارو وزارت ویاند ګران هېواد په سېشنبه د عمران خان د څرګندونو په تړاو مشال راډیو ته وویل، حکومت به یې هېڅکله خپله خاوره د یوه بل هېواد پرضد کارولو ته پرېنږدي.

د شمالي وزیرستان سپین وام کې چاودنه، دوه اېف سي عسکر ژوبل

د شمالي وزیرستان ضلعي انتظامیه او ځايي وګړي وايي، نن غرمه د شمالي وزیرستان د سپین تحصیل په چوک کې یوې بمي چاودنې دوه ایف سي اهلکاران ژوبل کړي دي.

له مشال راډيو سره په خبرو کې چارواکو وویل، عسکر پر ګشت ول چې د سړکغاړې ریموټ کنټرول بم پرې وچاودېد.

تر اوسه چا د برید ذمه واري نه ده منلې.

شمالي وزیرستان کې په دا وروستیو کې پر امنیتي عسکرو د سړکغاړې بمي چادونې او له وسله والو سره نښتې زیاتې شوي دي، بل په سیمه کې هدفي بریدونه هم زیات شوي دي. سږ کال دغلته د هدفي بریدونو شمېر ۳۶ ته رسېدلی دی.

ځايي ولس د دغه بدامنیو پرضد وخت په وخت احتجاجونه هم کوي او له سرکار د امن ډاډمنولو غوښتنه کوي. خو حکومت او پوځ په وار وار ویلي چې په سیمه کې یې امنیت باوري کړی، وسله وال یې شړلي او د لږ ډېر داسې پېښو مخنیوي لپاره یې مخصوص عملیات هم دوام لري.

جنوبي وزیرستان: د ټي ټي پي د دوو مهمو قومندانانو د وژلو ادعا

د جنوبي وزیرستان پولیس وايي، د اکتوبر پر ۲۷مه سهار په ځانګړه سیمه کې د عملیاتو پر مهال د تحریک طالبان پاکستان دوه مهم غړي وژل شوي دي.

په سیمه کې د پولیسو مشر شوکت علي مشال ریډيو ته ویل چې د استخباراتو پر اساس امنیتي ځواکونو پر وسله والو چاپه وهلې چې وروسته دواړو خواوو پر یو بل ډزې وکړې او په نتیجه کې د طالبانو دوو قومندانان غالب او رهبر وژل شوي خو پوځیانو ته ځاني زیان نه دی رسیدلی.

شوکت علي زیاتوي، ولي خان چې په غالب مشهور دی، پر امنیتي ځواکونو په حملو کولو تورون وو او حکومت ته مطلوبه وو. حکومت د غالب پر سر لس لکه انعام ایښودې وو. بلخوا تحریک طالبان پاکستان لا په دې اړه څه نه دې ویلي.

د پاکستان قامي اسمبلۍ په فرانس کې د پیغمبر اسلام خاکې خپرول وغندل

د پاکستان قامي اسمبلۍ وداني

قامي اسمبلۍ د اکتوبر پر ۲۶ مه په فرانس کې د پیغمبر اسلام د خاکو د خپرولو خلاف یو قرارداد په اکثریت منظور کړی دې چې د بهرنیو چارو وزیر شاه محمود قریشي وړاندې کړی وو.

پر دغه وخت ځینو مخالفو سیاسي مشرانو پر حکومت نیوکې وکړې چې ولې یې په ځنډ راوړ، خو شاه محمود قریشي وویل باید پر دې مسله ټول سیاسي ګوندونه متفقه رای ورکړي. له دې وړاندې د پاکستان سېنېټ هم په دې اړه یو مذمتي قرارداد منظور کړی.

دا له هغې وروسته ده چې په فرانس کې د یو استاد د وژنې د پېښې پرضد په مظاهرو کې ځینو خلکو د پیغمبر اسلام په اړه ځېنې خاکې ښودلې وې. شاه محمود قریشي په اسمبلۍ کې وییلي په دغه اړه یې په اسلام اباد کې یې د فرانس سفیر هم وربللی دی.

په خوست کې چاودنې څلور تنه ژوبل کړي

ارشیف

په خوست ښار کې نن مازیګر یوه چاودنه شوې ده.

د امنیه قومندانۍ ویاند عادل حیدر ازادي راډیو ته وویل چې چاودېدونکي مواد په یوه موټرسایکل کې ځای پر ځای شوي و او څلور کسان یې ټپیان کړي دي.

چاودنه په خوست ښار کې د بې پولې ډاکترانو زیږنتون ته څېرمه شوې.

چا د دې بمي چاودنې مسوولیت په غاړه نه دی اخیستی.

میدان وردګ نښته کې ۲۱ وسله وال طالبان 'وژل' شوي

افغان چارواکي وايي، میدان وردګو ولایت کې ۲۱ طالبان وژل شوي دي.

د دغه ولایت د والي محیب‌الله شریف زوی نن مشال راډيو ته وویل چې دغه وسله‌وال له افغان امنیتي ځواکونو سره په مخامخ جګړه کې هله ووژل شول چې پر یوشمېر امنیتي پوستو یې ډله‌ییز برید کاوه.

نوموړی وايي، تېره شپه لسګونه وسله‌والو طالبانو د سیداباد ولسوالۍ په عبدالمحی الدین سیمه کې غوښتل چې پر د امنیتي ځواکونو برید وکړي چې د افغان امینتي ځواکونو د غبرګون په پایله کې ۱۶ وسله‌وال مخالفین وژل شوي.

شریف زوی زیاتوي د دې تر څنګ د نرخ ولسوالۍ په دراني سيمه کې هم د قاري اسماعیل په ګډون ۵ کسه وسله‌وال مخالفین وژل شوي هغه مهال ووژل شوه چې غوښتل يي دغلته پر امنیتي پوستو برید وکړي.

دغه چارواکي وايي، چې یو شمېر وسلې او مهمات يې د امنیتي ځواکونو لاس ته ورغلي دي.

په همدې حال کې په افغانستان کې د امریکايي ځواکونو ویاند ساني لګېت پر خپل ټوېټر په نرخ کې د برید په اړه خبر خپور کړی دی.

هغه لیکلي چې د امریکا هوايي ځواک بېګا د افغان امنیتي او دفاعي ځواکونو په ملاتړ او د امریکا – طالبانو د دوحې تړون په اساس د میدان وردګو په نرخ ولسوالۍ کې هوايي برید وکړ او ۵ طالب وسله وال یې ووژل.

وسله‌والو طالبانو تر اوسه په دي اړه څه نه‌ دي ویلي.

د ولسمشر غني سلاکار عمر داودزی پاکستان ته تللی

د پاکستان لپاره د افغان ولسمشر ځانګړی استازی عمر داودزی اسلام اباد ته تللی دی. نوموړي په اسلام اباد کې د پاکستاني وزیراعظم د ملي امنیت له سلاکار معید یوسف سره لیده کاته کړي.

افغان او پاکستاني چارواکو وايي چې د دې لیدو کتو مهمه موضوع د افغان سولې په اړه د پاکستان رول وو.

ټاکل شوې چې عمر داودزی له نورو لوړپوړو پاکستانیو چارواکو سره هم وویني او هم له نن څخه د افغان او پاکستانیو تجارو په پېلدونکې دوه ورځنۍ غونډه کې هم ګډون وکړي.

کورمه برید: د یوې کورنۍ څلور تنه وژل شوي

د کورمې په شلوزان کې پر موټر ګاړي د شوي بريد له امله څلور تنه وژل شوي دي.

د مالوماتو ترمخه د اکتوبر پر ۲۵مه نېټه شپې مهال په یوه موټر ګاډي کې ناست د يوې کورنې پر غړو هله بريد شوی چې هغوی د خپل نوي کور په جوړولو اخته مزدورانو لپاره ډوډۍ وړله.

د پاړه چنار تاڼې ايس ايچ او ممتاز وايي، په پېښه کې درې تنه پر هغه ځای مړ شوي ول او يو بل تن نن په هسپتال کې ساه ورکړه.

هغه وايي، په مړو کې د دوو کالو يو ماشوم هم شامل دی.

د ا تنان د ډاکټر ممتاز له کورنې سره تعلق لري چې د چارواکو په خبره، ذاتي دښمني يې لرله او ممکن ده چې پر دغه خبره وژل شوي وي.

ايس ايچ او دا هم وايي، په پېښه کې ښکېل دوه تنه يې نيولي او له هغوي يې تفتيش روان کړی دی.

د بنګله دیش دیني عالمانو د افغانستان روانه جګړه حرامه وبلله

غزني کې د وسله والو طالبانو یو انځور-01 May 2019

د افغانستان د بهرنیو چارو وزارت وايي د بنګله دیش دیني عالمانو او مفتیانو د افغانستان روانه جګړه حرامه او له شرعي نصوصو سره په ټکر کې بللې ده.

دا خبره یاد وزارت نن په یوه اعلامیه کې کړې ده.

د اعلامیې له مخې بنګله دیشي عالمان او مفتیان جمعه په ډاکا کې د افغانستان د سولې لپاره یو کنفرانس جوړ کړی و.

د بهرنیو چارو وزارت وايي، چې د بنګله دیش دیني عالمانو په قطر کې د افغانستان د سولې په تړاو د روانو خبرو د ملاتړ تر څنګ په دننه هېواد کې د وژنو په سمدستي درېدو ټینګار کړی دی.

تر دې مخکې په ۲۰۱۸ کال کې اندونیزیا او تر هغه را وروسته دوه واره سعودي عربستان د افغانستان د سولې په تړاو د دیني عالمانو لویې غونډې جوړې کړې وې.

سره له دې چې د نړۍ دیني عالمانو په افغانستان کې روانه جګړه مردوده ګڼلې خو بیا هم په دغه هېواد کې جنګ روان دی او تر اوسه د اوربند د ټينګښت هڅو نتیجه نه ده ورکړې.

م م په افغانستان کې 'بشردوستانه اوربند' غوښتی

په کابل کې د شنبې ورځې خونړي ځانمرګي برید کې وژل شوي کسان خاورو ته سپارل کېږي. ۲۰۲۰، ۲۵ اکتوبر

ملګري ملتونه وايي، په افغانستان کې د 'بشردوستانه اوربند' ټینګښت به ټول په دې برلاسي کړي چې د ګډ ( دښمن ) یعنې کوویډ – ۱۹ پر ضد مبارزه وکړي.

په کابل کې د دغه سازمان د استازولۍ دفتر یوناما نن پر ټوېټر لیکلي چې 'بشردوستانه اوربند' به له ژمي مخکې ټولو اړمنو افغانانو ته د مهمو بشري مرستو د رسېدو زمینه برابره کړي.

ملګرو ملتونو له دې مخکې هم په وار وار په افغانستان کې د جګړې له ښکېلو خواو په تېره بیا له طالبانو غوښتي چې 'بشردوستانه اوربند' ته غاړه کښېږدي.

سره له دې چې په دوحه کې د افغان حکومت او طالبانو د ټیمونو ترمنځ خبرې روانې دي خو په دغه هېواد کې جګړو زور اخیستی دی.

په کوټه کې یوې چاودنې لږ تر لږه درې تنه وژلي دي

د کوټې پولیسو یو لوړپوړي چارواکي اظهر اکرم چې چاودنه د اکتوبر پر ۲۵مه (پرون) ناوخته په موټرسایکل کې په اېښودل شویو باروتو شوې ده.

دې چاودنې دوه تنه نور ټپي کړي او یو شمېر موټرو ته یې زیان اړولی دی.

دا په داسې حال کې وه چې پرون په کوټه کې د اپوزېشن ګوندونو د جلسې پرمهال سخت امنیتي ګامونه پورته شوي وو.

خو چاودنه د جلسې له ځایه څو کلومیټره لرې د سبزیو په یوه مارکېټ کې چې پرون زیاتره وخت تړلی وو شوې ده.

چا د دې پېښې ذمه واري نه ده منلې.

نور پورته کړئ

ځانګړې پاڼې

له موږ سره اړیکي

XS
SM
MD
LG