د لاسرسي ځای

تازه خبر

خبرونه

روس او سعودي‌ د تېلو بيو په مسله کې ځان خرابوي: ټرمپ

ولسمشر ډونلډ ټرمپ

د امريکا ولسمشر ډونلډ ټرمپ وايي د تېلو د بيو پر سر په روانه کشاله کې سعودي عرب او روس خپل ځانونه خرابوي.

ولسمشر ټرمپ د اپرېل په څلورمه په وايټ هاوس کې خبريالانو ت وويل چې که ضرورت وو نو د امريکې د تېلو انډسټري ژغورلو لپاره د سعودي او روس پر تېلو اضافي ټيکس لګولی شي.

د کورونا وایرس خورېدو له وجې په نړۍ کې تېل ارزانه شوي. روس او سعودي عرب تېره مياشت د تېلو پېداور کمولو لپاره سره نه وو سلا شوي او پلان شوې وه چې د تېلو توليدونکي هېوادونه د اپرېل په شپږمه د تېلو قیمتونو او پېداوار کمولو په اړه سره خبرې وکړي خو دغو هېوادونو وويل چې دوی دا ملاقات نه کوي.

تر دې مخکې ټرمپ ويلي وو چې سعودي عرب او روس سره یو داسې جوړ جاړي ته ورسېد چې له مخې يې دغه دوه هېوادونه د تېلو توليد کمولو ته تیار شول.

ولسمشر ټرمپ زیاته کړه چې د سعودي وليعهد او روس ولسمشر سره یې د اپرېل په دويمه په ټيليفون خبرې وکړي او هغوی دې ته تيار شول چې د تېلو پېداوار د ورځې په حساب له لس ميلیونو څخه پنځلسو ميليونو بيرلو پورې کم کړي.

د نننۍ ورځې ټول خبرونه وګورئ

میدان وردګ نښته کې ۲۱ وسله وال طالبان 'وژل' شوي

افغان چارواکي وايي، میدان وردګو ولایت کې ۲۱ طالبان وژل شوي دي.

د دغه ولایت د والي محیب‌الله شریف زوی نن مشال راډيو ته وویل چې دغه وسله‌وال له افغان امنیتي ځواکونو سره په مخامخ جګړه کې هله ووژل شول چې پر یوشمېر امنیتي پوستو یې ډله‌ییز برید کاوه.

نوموړی وايي، تېره شپه لسګونه وسله‌والو طالبانو د سیداباد ولسوالۍ په عبدالمحی الدین سیمه کې غوښتل چې پر د امنیتي ځواکونو برید وکړي چې د افغان امینتي ځواکونو د غبرګون په پایله کې ۱۶ وسله‌وال مخالفین وژل شوي.

شریف زوی زیاتوي د دې تر څنګ د نرخ ولسوالۍ په دراني سيمه کې هم د قاري اسماعیل په ګډون ۵ کسه وسله‌وال مخالفین وژل شوي هغه مهال ووژل شوه چې غوښتل يي دغلته پر امنیتي پوستو برید وکړي.

دغه چارواکي وايي، چې یو شمېر وسلې او مهمات يې د امنیتي ځواکونو لاس ته ورغلي دي.

په همدې حال کې په افغانستان کې د امریکايي ځواکونو ویاند ساني لګېت پر خپل ټوېټر په نرخ کې د برید په اړه خبر خپور کړی دی.

هغه لیکلي چې د امریکا هوايي ځواک بېګا د افغان امنیتي او دفاعي ځواکونو په ملاتړ او د امریکا – طالبانو د دوحې تړون په اساس د میدان وردګو په نرخ ولسوالۍ کې هوايي برید وکړ او ۵ طالب وسله وال یې ووژل.

وسله‌والو طالبانو تر اوسه په دي اړه څه نه‌ دي ویلي.

د ولسمشر غني سلاکار عمر داودزی پاکستان ته تللی

د پاکستان لپاره د افغان ولسمشر ځانګړی استازی عمر داودزی اسلام اباد ته تللی دی. نوموړي په اسلام اباد کې د پاکستاني وزیراعظم د ملي امنیت له سلاکار معید یوسف سره لیده کاته کړي.

افغان او پاکستاني چارواکو وايي چې د دې لیدو کتو مهمه موضوع د افغان سولې په اړه د پاکستان رول وو.

ټاکل شوې چې عمر داودزی له نورو لوړپوړو پاکستانیو چارواکو سره هم وویني او هم له نن څخه د افغان او پاکستانیو تجارو په پېلدونکې دوه ورځنۍ غونډه کې هم ګډون وکړي.

کورمه برید: د یوې کورنۍ څلور تنه وژل شوي

د کورمې په شلوزان کې پر موټر ګاړي د شوي بريد له امله څلور تنه وژل شوي دي.

د مالوماتو ترمخه د اکتوبر پر ۲۵مه نېټه شپې مهال په یوه موټر ګاډي کې ناست د يوې کورنې پر غړو هله بريد شوی چې هغوی د خپل نوي کور په جوړولو اخته مزدورانو لپاره ډوډۍ وړله.

د پاړه چنار تاڼې ايس ايچ او ممتاز وايي، په پېښه کې درې تنه پر هغه ځای مړ شوي ول او يو بل تن نن په هسپتال کې ساه ورکړه.

هغه وايي، په مړو کې د دوو کالو يو ماشوم هم شامل دی.

د ا تنان د ډاکټر ممتاز له کورنې سره تعلق لري چې د چارواکو په خبره، ذاتي دښمني يې لرله او ممکن ده چې پر دغه خبره وژل شوي وي.

ايس ايچ او دا هم وايي، په پېښه کې ښکېل دوه تنه يې نيولي او له هغوي يې تفتيش روان کړی دی.

د بنګله دیش دیني عالمانو د افغانستان روانه جګړه حرامه وبلله

غزني کې د وسله والو طالبانو یو انځور-01 May 2019

د افغانستان د بهرنیو چارو وزارت وايي د بنګله دیش دیني عالمانو او مفتیانو د افغانستان روانه جګړه حرامه او له شرعي نصوصو سره په ټکر کې بللې ده.

دا خبره یاد وزارت نن په یوه اعلامیه کې کړې ده.

د اعلامیې له مخې بنګله دیشي عالمان او مفتیان جمعه په ډاکا کې د افغانستان د سولې لپاره یو کنفرانس جوړ کړی و.

د بهرنیو چارو وزارت وايي، چې د بنګله دیش دیني عالمانو په قطر کې د افغانستان د سولې په تړاو د روانو خبرو د ملاتړ تر څنګ په دننه هېواد کې د وژنو په سمدستي درېدو ټینګار کړی دی.

تر دې مخکې په ۲۰۱۸ کال کې اندونیزیا او تر هغه را وروسته دوه واره سعودي عربستان د افغانستان د سولې په تړاو د دیني عالمانو لویې غونډې جوړې کړې وې.

سره له دې چې د نړۍ دیني عالمانو په افغانستان کې روانه جګړه مردوده ګڼلې خو بیا هم په دغه هېواد کې جنګ روان دی او تر اوسه د اوربند د ټينګښت هڅو نتیجه نه ده ورکړې.

م م په افغانستان کې 'بشردوستانه اوربند' غوښتی

په کابل کې د شنبې ورځې خونړي ځانمرګي برید کې وژل شوي کسان خاورو ته سپارل کېږي. ۲۰۲۰، ۲۵ اکتوبر

ملګري ملتونه وايي، په افغانستان کې د 'بشردوستانه اوربند' ټینګښت به ټول په دې برلاسي کړي چې د ګډ ( دښمن ) یعنې کوویډ – ۱۹ پر ضد مبارزه وکړي.

په کابل کې د دغه سازمان د استازولۍ دفتر یوناما نن پر ټوېټر لیکلي چې 'بشردوستانه اوربند' به له ژمي مخکې ټولو اړمنو افغانانو ته د مهمو بشري مرستو د رسېدو زمینه برابره کړي.

ملګرو ملتونو له دې مخکې هم په وار وار په افغانستان کې د جګړې له ښکېلو خواو په تېره بیا له طالبانو غوښتي چې 'بشردوستانه اوربند' ته غاړه کښېږدي.

سره له دې چې په دوحه کې د افغان حکومت او طالبانو د ټیمونو ترمنځ خبرې روانې دي خو په دغه هېواد کې جګړو زور اخیستی دی.

په کوټه کې یوې چاودنې لږ تر لږه درې تنه وژلي دي

د کوټې پولیسو یو لوړپوړي چارواکي اظهر اکرم چې چاودنه د اکتوبر پر ۲۵مه (پرون) ناوخته په موټرسایکل کې په اېښودل شویو باروتو شوې ده.

دې چاودنې دوه تنه نور ټپي کړي او یو شمېر موټرو ته یې زیان اړولی دی.

دا په داسې حال کې وه چې پرون په کوټه کې د اپوزېشن ګوندونو د جلسې پرمهال سخت امنیتي ګامونه پورته شوي وو.

خو چاودنه د جلسې له ځایه څو کلومیټره لرې د سبزیو په یوه مارکېټ کې چې پرون زیاتره وخت تړلی وو شوې ده.

چا د دې پېښې ذمه واري نه ده منلې.

کورونا وایرس په اروپا او امریکا کې په تېزۍ د خپرېدو په حال کې دی

په مسکو کې روغتیاپالان د کووېډ-۱۹ یو ناروغ روغتون ته وړي.

په اروپا او امریکا کې د کورونا وایرس پېښې په زیاتېدو دي.

دا په داسې حال کې ده چې حکومتونه د وبا کنټرولولو په موخه نور اقدامات کوي.

روانه اوونۍ د روغتیا نړیوال سازمان (ډبلیو اېچ او) د وایرس د پېښو د خورا زیاتېدو خبرداری ورکړ چې په وینا یې روغتیايي نظامونه ښايي تر لا زیات فشار لاندې راولي.

په امریکا کې د یوې اوونۍ په موده کې د کووېډ-۱۹ پېښو اوسط شمېر نېږدې ۷۰،۰۰۰ ته ورسېد چې د جولای په میاشت کې په یوه اوونۍ کې د ناروغانو له اوسطه زیات دی.

بلخوا په اروپا کې د وبا دویمه څپه په تېزۍ خپرېږي او هېوادونه د نورو اقداماتو په ذریعه د وایرس مخنیوي هڅې په دې هیله کوي چې ځانونه له بشپړ ټولبنده وژغوري.

په پسرلي کې ټولبندونو د ګڼو هېوادونو اقتصادونه ځپلي ول.

د اېټالیې وزیراعظم جوزیپي کونتي د اکتوپر پر ۲۵مه تر هغې وروسته د کورونا وایرس وبا مخنیوي په موخه محدودیتونه اعلان کړل چې په تېرو ۲۴ ساعتونو کې په هغه هېواد کې شاوخوا ۲۰،۰۰۰ مثبتې پېښې ثبت شوې.

افغان امنیتي ځواکونو د القاعدې یو مهم مشر ابو محسن المصري وژلی

المصري د امريکا د فيدارالي تحقيقاتي ادارې د اېف بي اي تر ټولو مطلوب ترهګرو نوملړ کې شامل و. (انځور: د افغان ځواکونو تمرینات)

افغان امنیتي ځواکونو د القاعدې یو لوړ پوړی مشر ابو محسن المصري وژلی چې امريکا ته هم مطلوب وو.

د افغانستان د ملي امنیت ادارې د اکتوبر پر ۲۴مه پر ټوېټر پاڼه ليکلي، المصری په غزني ولایت کې ځانګړو ځواکونو وژلی.

المصری د القاعدې وسله والې ډلې دويم نمبر مهم مشر ګڼل کېده.

افغان ځواکونو د المصري د وژنې په اړه نور تفصيلات نه دې ورکړي چې کله يې وژلی دي.

المصري چې د حسام عبدالروف په نامه هم پېژندل کېده، مصری وګړی دی او د هند په نیمه وچه کې د القاعده ډلې جګپوړې مشر وو او د ترهګرې ډلې د رسنیو چارو رهبري یې کوله.

المصري د امريکا د فېدارالي تحقيقاتي ادارې (اېف بي ای) د تر ټولو مطلوب ترهګرو نوملړ کې شامل وو.

نوموړی په داسې حال کې وژل شوی چې طالبانو او د افغانستان حکومت د نېږدې ۱۹ کلونو جنګ د ختمولو په مقصد په قطر کې د سولې خبرو ته دوام ورکړی.

ولسمشر ټرمپ د ولسمشرۍ انتخاباتو لپاره خپله رایه وکاروله

ولسمشر ټرمپ په داسي حال کې له وړانډي رايي کارولې چې په دري رقابتي رياستونو کې د خپل ډيموکريټ سيال جو بايډن ضد کمپاين پيلوي.

د امريکا ولسمشر ډونلډ ټرمپ پرون په فلوريډا رياست کې د ولسمشرۍ انتخاباتو لپاره تر نېټې مخکې خپله رايه وکاروله.

په امريکا کې د نومبر پر درېيمه د ولسمشرۍ ټاکنې کېږي.

ولسمشر ټرمپ په داسي حال کې له رايه کارولې چې په درې رقابتي رياستونو کې د خپل ډيموکريټ سيال جو بايډن ضد کمپاين پيلوي.

د ولسمشرۍ ټاکنو ته یوازې ۱۰ ورځې پاتې دي، او ټرمپ د نږدې ۵۵ ميلیونه امریکایانو څخه یو دی چې له وړاندې یې د کورونا وايرس وبا له وجې په شخصي یا د ډاک (پوستې) له لارې رایې ورکړې دي.

کارپوهان اټکل کوي چې د ووټ اچولو شرح به تاريخي وي او شاوخوا ۱۵۰ ميليونه خلک به رايي ورکړی چې ۶۵ فيصده جوړيږي.

په نيويارک، چې د ډيموکرايټانو پلوی رياست دې، د اکتوبر پر ۲۴مه خلک په ګېنټو په قطارونو کې ولاړ وو چې تر نېټې مخکې رايې واچوي.

همداراز په نورو رياستونو کې خلک رايي اچولو لپاره مرکزونو ته ورغلي.

ډیموکراټان تمه لري چې د رایې ورکوونکو لوړه کچه او پراخه پوسټ رایه ورکول به دوی په سپینه ماڼۍ او کانګرس کې بریا ته ورسوي.

خو رېپبليکن ګوند وايي چې د دوی ملاتړکوونکي به د ټاکنو په ورځ راوځي چې د دوی په ګټه به وي. د ټرمپ او بايډن انتخاباتي کمپاين کې د کورونا وايرس وبا تر ټولو مهمه موضوع وه او دواړو مشرانو په دې لړ کې خپل ليدونه وړاندي کړي.

ټرمپ د کورونا وايرس پر وړاندي د مبارزي د اقداماتو دفاع کړي او ادعا کوي چې هېواد يې وايرس کنټرول کولو ته نېږدې شوی دی.

دا په داسې حال کې ده چې د اکتوبر پر ۲۳مه په امريکا کې ريکارډ ۸۳،۰۰۰ کسان پر کورونا وايرس اخته شوي.

مایک پامپیو له الیکساندر لوکاشینکا سره خبرې کړې دي

دا په داسي حال کې ده چې په هغه هېواد کې د اپوزشن لخوا د لوکاشينکا د واکمني د ختمولو لپاره د اخري مهلت مخکي پر ټولواکه واکمن فشار لا نور زيات شوي.

د امريکا د بهرنيو چارو وزير مايک پامپيو د بيلاروس اليکساندر لوکاشينکا سره ټيليفوني خبرې کړې دي.

دا په داسي حال کې ده چې په هغه هېواد کې د اپوزیشن له خوا د لوکاشينکا د واکمنۍ د ختمولو لپاره د اخري مهلت مخکې پر ټولواکه واکمن فشار لا نور زيات شوي.

د امريکا د بهرنيو چارو وزارت د اکتوبر پر ۲۴مه د ازادې اروپا راډیو ته وويل چې پامپيو د بيلاروس نژاده امريکايي سياسي سټراتيجسټ خوشې کيدو غوښتنه کړې چې امريکايي حکومت يې نيول غير عادلانه بولي.

د وزارت وياند وويل چې پامپېو د امريکايي وګړي ويتالي شکلياروف په سمدستي توګه خوشې کول او له بيلاروسه د وتلو غږ کړي.

همداراز نوموړي د بيلاروس ولس سره د جمهوري هيلو د مرستو ژمنه تکراره کړې.

تر دې مخکې د بيلا روس سرکاري رسني د پامپيو او لوکاشينکا ترمينځ تيليفونې خبرو په اړه جلا دريځ ورکړي وو.

امريکا او اروپايي ټولني د بيلا روس ولسمشرۍ ټاکنو نتيجې نه دي منلي.

محسن داوړ یو وار بیا د کوټې په هوايي ډګر درول شوی

محسن داوړ

د پاکستان د قامي اسمبلۍ غړی او د پښتون ژغورنې غورځنګ یو مشر محسن داوړ د بلوچستان چارواکو له هوايي ډګره بیرته ګرځولی دی.


د بلوچستان نیشنل پارټۍ مشر اختر مېنګل پر دې کار د خپګان شریکولو سره په ټویټر لیکلي چې محسن دواړ له ایرپورټه د وتلو لپاره درول شوی او له مېلمنو سره داسې چلند باید ونشي. نوموړي لیکلي، د دې پېښې غندنه کوي او هیله ده چې حکومت به محسن داوړ ته په جلسه کې د برخې اخیستو اجازه ورکړي.


محسن داوړ د سېپټمبر پر څلورمه نېټه هم د بلوچستان د یو شمېر ضلعو د دورې کولو لپاره د کوټې هوايي ډګر ته له رسېدو وروسته نیول شوی و خو چارواکو د هغه نیونه رد کړې وه او ویلي یې ول چې داوړ یې د امنیتي ګواښونو له وجې له ایرپورټه بهر نه وو پرېښی.

ویل کېږي چې محسن داوړ په کوټه کې د اپوزیشن ۱۱ ګوندونو اتحاد پي ډي ایم د اکتوبر پر ۲۵مې غونډه کې د ګډون لپاره روان و. بلخوا د بلوچستان حکومت وايي، د امنیتي ګواښونو له وجې باید پي ډي ایم دا غونډه وځنډوي.

عمران خان له افغان پارلیماني پلاوي سره وکتل

د ارشیف انځور

د پاکستان وزیراعظم عمران خان ویلي چې هیواد یې له افغانستان سره په ټولو برخو کې د ورورولۍ اړیکې پیاوړې کول غواړي.

د پاکستان سرکاري راډیو د خبر له مخې د افغانستان د ولسي جرګې سپیکر رحمان رحماني او ۱۷ کسیزه پارلیماني وفد د اکتوبر پر ۲۳مه له وزیراعظم عمران خان سره و لیدل. په دغه موقع عمران خان وویل چې د افغانستان شخړه هېڅ پوځي حل نه لري. عمران خان د سیاسي جوړجاړۍ په ضرورت ټینګار وکړ او په افغانستان کې د سولې او ثبات لپاره د خپل هیواد د دوامدار ملاتړ خبره یې تکراره کړه.

د پاکستان وزیراعظم وویل، په افغانستان کې امن د دواړو هیوادونو لپاره ښه دی دی او زیاته یې کړه چې په تجارت کې همکاري دواړو ته ګټه رسولی شي.

افغان پلاوی چې د پاکستان د قامي اسمبلۍ د سپیکر اسد قیصر په بلنه اسلام اباد کې دی، په خپل شپږ ورځني سفر کې به د اکتوبر پر ۲۶ مه او ۲۷مه د دواړو هیوادونو د سوداګرو په یوه غونډه کې هم ګډون کوي.

افغانستان او پاکستان لا هم له پولیو سره لاس او ګرېوان دي

PAKISTAN-HEALTH-POLIO

د اکتوبر ۲۴مه، د پوليو يا ګوزڼ ناورغۍ مخنيوي نړيواله ورځ لمانځل کېږي. سږ کال د دې ورځې شعار "يوه ورځ، يو کار- د پوليو له منځه وړل" دی.


په نړۍ کې يوازې پاکستان او افغانستان هغه هیوادونو دي چې اوس هم پکې د پولیو ناروغي موجوده ده.

پنجاب حکومت د اکتوبر پر ۲۶مه د پوليو ضد شپږ ورځنی کمپاين پيلوي. د پاکستان سرکاري راډيو ترمخه په دې مهم کې به له پنځو کلونو کم عمر ماشومانو ته د پوليو ضد څاڅکي ورکول کېږي.

په پاکستان کې د پولیو مخنیوي ادارې شمېرې ښيي چې په ۲۰۱۹ م کې په دغه هیواد کې ۱۴۷ ماشومان ګوزڼ وهلي وو خو د روان کال د اکتوبر تر ۲۳مې دغه شمېر ۷۹ دی.

بلخوا په افغانستان کې د پولیو د له منځه وړلو د ملي پروګرام د عامه پوهاوي مشر میرجان راسخ مشال راډیو ته تایید کړه چې په هغه هیواد کې د ګوزڼ مثبتې پېښې زیاتې شوې دي.

اروپا کې د کرونا وبا دوهمې څپې ګڼ خلک نیولي

چېک کې روغتیاپالان د کرونا وایرس وهلي یوه ناروغ د درملنې پر مهال

په اروپا کې د کرونا وایرس دوهمه څپه زښته په چټکۍ خورېږي او په تېرو ۱۰ ورځو کې نوې پېښې څه باندې دوه برابره شوې دي.

روېټرز ویلي، په پنجشنبه په ټوله اروپا کې د لومړي ځل لپاره په ورځنۍ کچه د کرونا څه باندې دوه لکه پېښې ثبت شوي چې له دې سره په ټوله اروپا کې روغتونونه هم تر فشار لاندې راغلي دي.

په دغه لویه وچه کې تر ټولو زیاتې پېښې په چېک جمهوریت کې شوې دي او حکومت ‌یې هغه پلان تایید کړی چې له ناټو او اروپایي ټولنې دې ۳۰۰ پوځي روغتیایي کارکوونکي د ناروغانو درملنه کې مرسته وکړي.

بلجیم او یو شمېر نورو هېوادونو کې روغتونونه هغه ناروغان نه ‌مني چې سخت ناروغه نه وي.

د پولېنډ په وارسا ښار کې حکومت یو ملي لوبغالی په ګرځنده روغتون اړوي چې د ۵۰۰ ناروغانو درملنه به پ‌کې کېږي.

په فرانسه کې د روغتونونو ۴۴ په سلو کې بسترونه د 'کووېډ-۱۹' په ناروغانو ډک شوي دي.

تخار کې د ۱۲ ماشومانو د وژل کېدو د ادعا خپروونکي ته د صالح خبرداری

د افغانستان ولسمشر لومړی مرستیال امرالله صالح

د افغان ولسمشر لومړی مرستیال وايي، له هغو کسانو سره به قانوني چلند وشي چې په تخار کې د افغان ځواکونو په هوايي عملیاتو کې د ۱۲ ماشومانو وژل کېدو ادعاوې یې خپرې کړې دي.

د تخار د والي ویاند محمد جواد هجري ازادي راډیو ته وویل، د چهارشنبې په ورځ د مرکز تالقان په هزار لق سیمه کې پر یوه جومات د هوايي حملې په نتیجه کې ۱۲ ماشومان وژل شوي او ۱۴ نور ټپیان دي.

خو د ولسمشر لومړي مرستیال امرالله صالح پر فېس‌بوک په یو بیان کې لیکلي، دی باوري اسناد لري چې دا ادعا ناسمه ده.

د ولسمشر ویاند صدیق صدیقي هم په پنجشنبه ازادي راډیو په یوه بحث کې په دې اړه سپیناوی وکړ: "د ولسمشر لومړي مرستیال ویلي چې دا خبره دروغ ده او طالبان هره ورځ دروغ وايي، دوی د خلکو په کورونو کې پټېږي، له جومات څخه ‌یې قرارګاه جوړه کړې. په کوم هېواد کې تاسو لیدلي چې په جومات کې پوځي قرارګاه وي، خو طالبانو په هر جومات کې پوځي قرارګاه جوړه کړې."

ښاغلي صالح په خپل بیان کې د چا نوم نه‌دی یاد کړی، خو ویلي یې دي، له هغو کسانو سره به قانوني چلند وشي چې له اوازو څخه‌یې سرخطونه جوړ کړي.

په کابل کې د ملګرو ملتونو مرستندوی دفتر یا یوناما او د افغانستان د بشري حقونو خپلواک کمېسیون پر ټویټر په جلا بیانونو کې ویلي دي چې د دې ادعاوو په اړه‌یې پلټنې پیل کړې دي.

د ټرمپ او اوباما د امریکا انتخاباتي کمپېن کې یوبل ته سختې خبرې

د امریکا ولسمشر ډونالډ ټرمپ له پخواني امریکايي ولسمشر بارک اوباما سره خبرې کوي.

د امریکا ولسمشر ډانلډ ټرمپ او پخواني امریکایي ولسمشر باراک اوباما په خپلو انتخاباتي غونډو کې یو بل ته سختې خبرې کړې دي.

اوباما په لومړي ځل د خپل پخواني مرستیال ولسمشر جوبایډن لپاره د ګاډو-کاروان په یو انتخاباتي غونډه کې ګډون وکړ او پر ولسمشر ټرمپ یې سخت تنقید وکړ. د اکتوبر پر ۲۱ په فېلا ډېلفیا کې خلکو ته په خپله وینا کې اوباما د کورونا وایرس د وبایي صورتحال پر کنټرولو، خراب اقتصادي حالت او د صحت پالیسیو پر سر پر ولسمشر ټرمپ تنقید وکړ.

پخواني ولسمشر اوباما دا هم وویل چې ولسمشر ټرمپ د خپل کار جدي اخېستو صلاحیت نه لري.

بلخوا د شمالي کېرولاینا په ګېسټونیا کې ولسمشر ټرمپ په اوباما پسخند وواهه چې د ۲۰۱۶م کال د انتخاباتو نتیجو په اړه یې غلطه وړاندوینه کړې وه.

د امریکا انتخاباتو ته اوس تر دوو اونیو لږ وخت پاته دی. د امریکایي ادارې رییل کلییر پولېټکس د نظرپوښتنې ترمخه دا وخت جوباییډن له ولسمشر ټرمپه ۸.۶ فیصده نکتې مخکې دی.

نن برسلز کې د ناټو دفاع وزیرانو ۲ ورځنۍ غونډه پیلېږي

د ناټو یو شمېر دفاع وزیران

نن د بېلجیم په پلازمېنه برسلز کې د ناټو د دفاع وزیرانو دوه ورځنۍ غونډه پیلېږي.

په دې غونډه کې به د نورو موضوعاتو ترڅنګ په افغانستان کې د ناټو پر پوځي شتون خبرې وشي.

په ناټو کې د امریکا سفیرې کي بیلي هاتچیسن د اکتوبر پر ۲۲مه (پرون) د ناټو غونډې په درشل کې وویل: "څه چې له افغانستان سره ارتباط لري، موږ له خپلو متحدانو سره ورباندې سلا مشوره کړې، دا تېره اوونۍ په افغانستان کې زموږ د ځواکونو قوماندان د ناټو ۳۰ سفیرانو ته زموږ د پخوانیو خبرو په اړه چې ځواکونه به کموو، معلومات ورکړل."

په افغانستان کې د ناټو په مشرۍ د غوڅ ملاتړ ماموریت په چوکاټ کې د ۳۸ هېوادونو شاوخوا ۱۲،۰۰۰ سرتېري پراته دي.

کورونا وایرس د امریکا نېږدې درېو برخو ته په خپرېدو دی

نیویارک کې روغتیايي کارکوونکي

کورونا وایرس د امریکا نېږدې درېو برخو ته د خپرېدو په حال کې دی او په اروپا کې یې ډېرې خپرېدا حکومتونه اړ کړي چې نوي بندیزونه ولګوي او د نورو سختو هغو خبرداری ورکړي.

د امریکا په لوېدیځه او منځنۍ برخه کې یې چې د کورونا وایرس په چټکۍ د خپرېدو په حال کې دی، په شپږو ایالتونو کې یې تر ټولو زیاتې نوې پېښې ثبت شوې دي.

په امریکا کې په وروستۍ یوه اوونۍ کې د دغه وایرس له ا مله د مړو شمېر د ورځې په متوسط ډول ۷۵۷ تنو ته رسېږي. له دې سره په ټوله امریکا کې د مړو شمېر۲۲۲،۰۰۰ ته رسېدلی دی.

په اروپا کې د دغه وایرس د نوې څپې د لاخپرېدو د مخنیوي د هڅو په ترڅ کې پولینډ او پرتګال نوي بندیزونه لګولي او خبرداری یې ورکړی چې نور به هم ولګوي.

په هغو هېوادونو کې د ماسک (تمبوزک) کارول ضروري شوي، غونډې محدودې شوي، بارونه (میخانې) او رستورانونه بند شوي، او تقریباً بیا د پوره ټولبند یو حالت پیدا شوی دی.

قرغیزستان کې د بیاځلې پارلېماني انتخابانو نېټه اعلان شوه

د خلکو تر پراخو مظاهرو وروسته د قرغیزستان حکومت ړنګ شو (د ۲۰۲۰ز د اکتوبر پېنځمې انځور.)

د قرغیزستان د ټاکنو کمېسیون د پارلېماني ټاکنو لپاره د ډېسېمبر ۲۰مه نېټه وټاکله.

دا اقدام په داسې حال کې کېږي چې دغه هېواد کې د اکتوبر د څلورمې تر پارلېماني ټاکنو وروسته مظاهرو د قرغیزستان حکومت ړنګ کړ.

د قرغیزستان ولسمشر سورونبای جېنبېګوف د مظاهره کوونکو تر غوښتنو وروسته له دندې استعفا وکړه.

تر دې استعفا وروسته صادر جپاروف د لنډمهالي وزیراعظم په توګه وټاکل شو.

د قرغیزستان له اساسي قانون سره سم، جپاروف نه شي کولای ځان انتخاباتو ته نوماند کړي.

پاکستان کې د کورونا وایرس ۶۶۰ تازه پېښې ثبت شوي

حکومت خلکو ته سپارښتنه کړې چې د تمبوزک وهلو په ګډون د وایرس مخنیوي ټول احتیاطي تدابیر عملي کړي.

په پاکستان کې په تېرو ۲۴ ساعتونو کې د کورونا وایرس ۶۶۰ مثبې پېښې ثبت شوې دي.

د کووېډ-۱۹ په اړه د پاکستان حکومتي ووبپاڼې د اکتوبر پر ۲۱مه وویلي، ناروغۍ په ۲۴ ساعتونو کې ۱۹ کسان وژلي دي.

له ووبپاڼې سره سم، په هغه هېواد کې د اکتوبر تر ۲۱مې د کورونا وایرس مثبتو پېښو رسمي شمېر ۳۲۴،۷۴۴ ته ورسېد.

خو په پاکستان کې له کووېډ-۱۹ ناروغۍ ۳۰۹،۰۰۰ کسان رغېدلي هم دي.

دا مهال په هېواد کې د ناروغانو شمېر تر ۹،۳۰۰ زیات دی.

د پاکستان حکومت د اکتوبر پر ۲۰مه د هېواد صوبې انتظامي چارواکو ته سپارښتنه کړې چې د وایرس مخنیوي احتیاطي تدابیر عملي کړي.

حکومت په تېرو اوونیو کې په بیا بیا اندېښنه ښوولې چې که خلک احتیاط ونکړي، د کورونا وایرس پېښې لا زیاتېدای شي.

د فرانسې ولسمشر له عراقي وزیر اعظم سره د ترهګرۍ ضد مبارزه پر ارزښت غږېدلی

د فرانس ولسمشر ایمانيول مېکرون او د عراق وزيراعظم مصطفی الکاظمي

د فرانس ولسمشر ایمانيول مېکرون او د عراق وزيراعظم مصطفی الکاظمي د ترهګرۍ پر وړاندې د مبارزې پر ارزښت خبرې کړې دي.

د اکتوبر پر ۲۰مه د مېکرون له دفترخپره شوې خبرپاڼه وايي،دواړو مشرانو د اکتوبر پر ۱۹مه په پېريس کې له يو بل سره وکتل.

مېکرون په سېپټېمبر میاشت عراق ته د سفر پر مهال د دې هیواد د خپلواکۍ ملاتړ کړی و او ویلي یې ول چې د اسلامي دولت ډلې وسله وال او د عراق په چارو کې د بهرنیانو مداخله مهم چېلنجونه دي چې بغداد ورسره مخامخ دی.

په خبرپاڼه کې دا ډول ویل شوي چې دواړو مشرانو د یوه فرانسوي شرکت د هغه پلان ستاینه وکړه چې په بغداد کې د مېټرو جوړولو لپاره یې وړاندې کړې ده.

الکاظمي د روان کال په مې میاشت کې د وزيراعظم په توګه دنده پیل کړه. د هغه حکومت ژمنه کړې چې هغه وسله والې ډلې به وځپي چې د عراق د بې ثباته کولو هڅې کوي.

افغان ولسمشر ولسي جرګې ته نوې کابینه ورپېژندله

د افغانستان ولسي جرګه

د اکتوبر پر ۲۱مه نېټه (نن) د افغانستان ګډ حکومت ټول نوماند وزیران او د دوو ادارو رییسان د باور رایې اخیستو لپاره ولسي جرګې ته وروپېژندل شول.

ولسمشر اشرف غني د کابینې ټول ۲۶ غړي او د دوو ادارو ریسان دې جرګې ته وروپېژندل.

اشرف غني د مارچ په نهمه د ولسمشر په توګه د لوړې په مراسمو کې ژمنه کړې وه چې په دوو اوونیو کې به خپله کابینه ولسي جرګې ته د باور رایې اخیستو لپاره وروپېژني، خو له هغه وخته څه باندې اووه میاشتې تېرې شوې دي.

د ولسي جرګې منشي اسدالله شهباز مشال راډیو ته وویل، د جرګې پنځه کمېسیونونه به د دغو نوماندانو اسناد څېړي او وروسته به ‌یې اداري پلاوي ته سپاري.

په ولسي جرګه کې نوماند وزیرانو ته د باور رایو پخوانیو بهیرونو ته په پام داسې نه‌ ښکاري چې دغه پروسه به له ستونزو خالي وي.

جماعت اسلامي د حکومت پر ضد احتجاج پېلوي

د جماعت اسلامي مشر، سراج الحق

د جماعت اسلامي مشر سینیټر سراج ا لحق وايي ګوند به يي له نومبر مياشتې حکومت خلاف تحریک پېلوي.

نوموړي د اکتوبر په ۲۰مه له مشال رېډیو سره په ځانګړو خبرو کې وویل د وزیراعظم عمران خان په حکومت کې ګراني او بېروزګاري زیاته شوې چې له وجې یې عام خلک له مشکلاتو سره مخ دي. سراج الحق زیاته کړه چې د حکومت ضد اولنۍ جلسه به په باجوړ ضلع کې کوي.

نوموړي وویل د اپوزیشن ګوندونو په اتحاد یا پاکستان جمهوري تحریک کې ځکه نه شامېلېږي چې د ده په وینا په دې کې شاملو ګوندونو، مسلم لګ نواز او پیپلز پارټۍ په تیرو دوو کلونو کې د تحریک انصاف د حکومت ملاتړ کړی دی.

دا په داسې حال کې چې پاکستان جمهوري تحریک یا پي ډي ایم د وزیراعظم عمران خان حکومت نسکورولو لپاره د اکتوبر له ۱۶ مې احتجاجي جلسې شروع کړي دي او تر اوسه یې په ګجرانواله او کراچۍ کې جلسې کړي دي

ملګري ملتونو پر اذربايجان او ارمينيا د اوربند ساتلو غږ کړی

د اذربايجان او ارمينيا ترمنځ په نورګونو قره باغ کې د سپتمبر له ۲۷مې جګړه پېل شوې

د ملګرو ملتونو امنیتي کونسل په ارمینیا او اذربایجان غږ کړی چې د نوي اوربند احترام دې وکړي. یادې ادارې دا بیان پرون، د لانجمنې سیمې ناګورنو ـ کاراباغ د وضعیت په اړه د مشاورت د پای ته رسېدو نه پس خپور کړی دی.

د کونسل ۱۵ غړو، د ملګرو ملتونو د مشر انتونیو ګوتیریس هغه غوښتنه هم یو وار بیا تکرار کړه چې پر دواړو خواوو یې غږ کړی و چې د اکتوبر په ۱۷مه د اعلان شوي تړون احترام دې وکړي.

د سپټمبر له ۲۷مې نېټې راهېسې چې په یاده سیمه کې سخته جګړه پیل شوې، دا دوهم ځل دی چې د اوربند هڅه پکې کېږي. دوهم اوربند هم له خطر سره مخامخ دی او پرون په سیمه کې ډزې شوې. ارماني نژاده ځواکونه او ازربایجان پر یو بل تور پورې کوي چې ډزې مقابل لوري پیل کړې وې. روسیه چې دا مهال د ملګرو ملتونو د امنیت شورا نوبتي مشري پر غاړه لري، د فرانسې د خبري اژانس په وینا، په یو بیان کار کوي چې پر دواړو خواوو به د اوربند د عملي کولو غږ کوي.

د ازربایجان ولسمشر الهام علي ییف او د ارمینیا ولسمشر نیکول پشینین د روسیې تاس خبري اژانس ته ویلي، هغوی په مسکو کې خبرو ته تیار دي.

د امریکا ولسمشرۍ مباحثې ته نوی چوکاټ: هممهاله خبرې بندې

ولسمشر ډونالډ ټرمپ او د هغه انتخاباتي سیال جو بایډن د ۲۰۲۰ ز کال ولسمشریزه کمپاین په ترڅ کې خپله لومړنۍ مباحثه کې برخه واخېستله.

د امریکا ولسمشریزو انتخاباتو د مباحثو کمېشن وايي د ولسمشرۍ امیدوارانو ډونلډ ټرمپ او جو بایډن ترمنځ راتلونکیو مباحثو کې به چې یو تن خبرې کوي نو د بل مایک به بندوي چې دا راز د یو بل په خبرو کې مداخلت نه کېږي.

یاد کمېشن دا بدلون پرون ( د اکتوبر ۱۹ مه) په داسې حال کې اعلان کړ چې د ولسمشرۍ انتخاباتو لپاره شوې اولنۍ مباحثه کې دواړو امیدوارانو پر یوه بل لفظي حملې وکړې او په نتیجه کې یې د دغه بحث ځینې برخې د ګډوډۍ ښکار شوې وې.

له هغه سمدستي وروسته د ولسمشریزو انتخاباتو د مباحثو کمېشن د مایک بندولو وړاندیز مخې ته راوړه چې مقصد یې د اکتوبر په ۲۲ مه کیدونکې مباحثه په درناوي ترسره کول دي.

د یاد کمېشن په یو بیان کې هیله څرګنده کړل شوې چې دواړه ولسمشریز امیدواران به د یو بل د خبرو لپاره ټاکل شوي وخت احترام وکړي چې په ترڅ کې به یې د کتونکو لپاره ګټه ور بحث پرمخ لاړ شي.

د ولسمشر ټرمپ انتخاباتي ډلې په دې بدلون نیوکه کړې خو ویلی یې دي چې نوموړی به په مباحثه کې برخه اخلي.

د مایک بندولو په ترڅ کې به هر امیدوار د مباحثې په سر کې بغیر له مداخلې دوه، دوه منټه وخت ولري چې ورپسې به بیا د ازاد بحث لپاره د دواړو مایکونه خلاص کړل شي.

د امریکا د ولسمشریزو انتخاباتو مباحثې هره برخه ۱۵ منټه وخت لري. په دغه هېواد کې ولسمشریز انتخابات د نومبر په درېیمه کېدونکي دي او له دې وړاندې بله مباحثه به د دغو انتخاباتو اخرنۍ مباحثه وي.

نور پورته کړئ

ځانګړې پاڼې

له موږ سره اړیکي

XS
SM
MD
LG