د لاسرسي ځای

تازه خبر

خبرونه

کلېنټن: له افغانستانه د پوځیانو وتل باید مشروط وي

د امریکا ولسمشرۍ پخوانۍ نوماندې هېلري کلېنټن

د امریکا ولسمشرۍ پخوانۍ نوماندې هېلري کلېنټن ویلي، له افغانستانه د امریکايي پوځیانو وتل باید مشروط وي.

نوموړې د مارچ پر ۱۰مه په نیویارک کې د ملګرو ملتونو په ودانۍ کې د افغانستان سولې په بهیر کې د ښځو ونډې په اړه غونډې ته وویل د پوځیانو وتل باید د طالبانو له لوري د ژمنو له عملي کولو سره تړلي وي.

کلېنټن وویل، امریکا باید یو اندازه پوځیان هلته پرېږدي چې طالبان د تاوتریخوالي کمولو ته قانع کړي.

نوموړې دا څرګندونې په داسې حال کې کړې دي چې د فبرورۍ پر ۲۹مه امریکا په دوحه کې له طالبانو سره د سولې هوکړه لاسلیک کړه.

د نننۍ ورځې ټول خبرونه وګورئ

روس او چین شام ته د بشري مرستو رسولو قرارداد مخه ونیوله

د شام له راس العین ښار سره یوه ښځه ولاړ ده. په اکتوبر کې ترکیو الوتکو په سیمه بمباري وکړه. (ارشیف)

د ملګرو ملتونو سلامتي کونسل کې د جولای پر۱۰مه شام ته د بشري مرستو د رسولو په اړه قرارداد منظور نه شو.

د جولای پر ۱۰مه دغه قرارداد ویټو کړ.

دا دویم ځل و چې بیجنګ او ماسکو د ترکیې په دوه لارو شام ته د مرستو رسولو په اړه قرارداد ویټو کولو سره درولو.

د سلامتي کونسل ۱۵ غړیو په هیوادونو کې ۱۳ هغو یې د جرمني او بلجیم لخوا تیارې شوې مسودې په حمایت کې رایې ورکړې خو چین او روس یې په مخالفت کې ووټ ورکړ.

د دې په مقابل کې د ماسکو لخوا تیاره شوی مسوده وه چې دریو هیوادونو یې په ملاتړ کې رایې ورکړې.

په مسوده کې د مرستو لپاره لاره یوې ته راکمه شوې وه.

ملګرو ملتونو او یوې بلې غیر حکومتي ادارې اکسفیم ویلي، د مرستو په نه رسېدو سره به د شام په میلینونو کورنۍ متاثره شي.

طالبان وايي، ۱۷ افغان سرتېري یې خوشي کړي دي

طالبان وایي، د جولای پر ۱۱مه په غور کې له خپل زندانه یې ۱۷ افغان سرتېري خوشې کړي. (ارشیف)

طالبان وایي، د جولای پر ۱۱مه یې د افغانستان په غور ولایت کې له خپل زندانه ۱۷ پولیس او پوځیان خوشي کړل.

د طالبانو د قطر دفتر ویاند سهیل شاهین پر خپله ټویټرپاڼه ولیکل، دغو کسانو ته یې د سفر لګښت ورکړی او خپلو کورنیو ته لېږل شوي دي.

شاهین مشال راډیو ته وویل، دوی تراوسه د افغان حکومت ۷۶۹ زندانیان خوشې کړي دي، خو افغان چارواکي بیا دا شمېر نه مني او وایي، د طالبانو له خوا څه باندې ۵۰۰ زندانیان ازاد شوي دي.

افغان حکومت هم له خپله اړخه د طالبانو څه باندې ۴۰۰۰ زندانیان پریښي، خو دې وروستیو کې داسې راپورونه خپاره شول چې د طالبانو شاوخوا ۵۰۰ زندانیان چې حق العبدي قضیې لري ممکن خوشې نه شي.

حکومتي سرچینو مشال راډیو ته وویل، له طالبانو یې غوښتي چې د دغو کسانو پر ځای به یې نور زندانیان خوشې کړي او طالبانو دا لېست هم ور سپارلی، خو سهیل شاهین وایي، دوی کوم نوی لېست حکومت ته نه دی ورکړی.

ټرمپ په نیو هیمپشر کې د ولسمشرۍ انتخاباتي کمپاین ځنډولی

ټرمپ په نیو هیمپشر کې د ولسمشرۍ انتخاباتي کمپاین د نه کولو پرېکړه کړی. (ارشیف)

د امریکا ولسمشر ډونلډ ټرمپ د جولای پر ۱۱مه په نیو هیمپشر ریاست کې د ولسمشرۍ انتخاباتي کمپاین جلسې د نه کولو پرېکړه کړی.

دا په داسې حال کې ده چې امریکا د کورونا وایرس کېسونو زیاتېدو په صورتحال کې پر وبا د کنټرول حاصلولو هڅې کوي.

چارواکو وویل، د یوې یا دوه اوونیو لپاره د کمپاین جلسې د ځنډولو فیصله د کورونا وایرس له کبله نه ده شوې بلکې لامل یې یو راتلونکې طوفان دی.

ولسمشر ټرمپ په نومبر کې د صدراتي انتخاباتو مخکې درې اوونۍ وړاندې د اوکلاهوما ریاست په ټلسه ښار کې جلسه وکړه.

د جلسې زیاترو ګډونوالو د ماسکونو اچولو او خلکو ترمنځ د سماجي فاصلې اصول له پامه غورځولي وو.

په ښار کې د جلسې دوه درې اوونۍ پس د کورونا وایرس کېسونه زیات شول.

د امریکا جانز هاپکنز پوهنتون له شمېر سره سم په دغه هیواد کې د جولای پر ۱۰مه د کورونا وایرس کېسونو کې له ۶۳۰۰۰ زیاتوالي سره د وایرس کېسونو مجموعي شمېر درې اشارعیه یو میلیون ته ورسېد.

په دغه هیواد کې له وایرسه ۱۳۴۰۹۷ کسان مړه شوي خو تر نهه لکه ۳۸ زره زیات کسان ترې بېرته رغېدلي هم دي.

د خيبر پښتونخوا د اطلاعاتو سلاکار اجمل وزير له دندې ګوښه کړل شو

اجمل وزير

د اطلاعاتو او عامه اړیکو لپاره د خيبر پښتونخوا د اعلا وزير سلاکار اجمل وزير له دندې لرې کړل شوی دی.

د خيبر پښتونخوا د چيف سکټري له دفتره د جولايي پر ۱۱مه، اعلامیه کې ويل شوي چې اجمل وزير د اعلا وزير د اطلاعاتو سلا کار له دندې نه په سمدستي توګه لېري کړل شوی. خو په هغه نوټيفکشن کې د اجمل وزير لېرې کولو وجوهات نه دي ښودل شوي.

په اعلامیه کې راغلي چې د خیبر پښتونخوا د بلدیاتو، انتخاباتو او کلیوال پرمختګ سلاکار کامران بنګش ته د اطلاعاتو د سلار اضافي دنده سپارل شوې ده.

له دې وروسته نن د حکومت په یوه بله اعلامیه کې ویل شوي چې د یو اډیو برسېره کېدو پس اجمل وزیر له دندې لېرې کړل شوی په کومه کې چې پر وزیر تور پورې شوی چې له چا کمېشن یا رشوت غواړي.

د خیبر پښتونخوا اعلی وزیر محمود خان د اډیو د پلټنې امر کړی.

اجمل وزیر د روان کال په مارچ میاشت کې د اعلی وزیر د اطلاعاتو سلاکار ټاکل شوی و.

په نړۍ کې د کورونا وایرس پېښې پر زیاتېدو دي: ډبلیو اېچ او

د نړۍ په کچه د کورونا وایرس پېښې په زیاتېدو دي.(ارشیف)

د روغتیا نړیوال سازمان (ډبلیو اېچ او) د جولای پر ۱۰مه د نړۍ په کچه د کورونا وایرس د یو وار بیا زیاتیدو راپور ورکړ چې له مخې یې په امریکا، هند او جنوبي افریقا کې زیات خلک پرې اخته شوي دي.

یاد سازمان وايي، په تېرو شپږو اوونیو کې د نړۍ په کچه د کوویډ ـ ۱۹ پېښې یو په دوه زیاتې شوې او هره ورځ په اوسط ډول د ۲۲۸ زرو نه د زیاتو کسانو په بیمارېدو ټوله شمېره ۱۲ اعشاریه درې میلیونو ته پورته شوې ده.

همدا رنګه نېږدې پنځه لکه ۵۷ زره کسانو مړینه ثبت شوې ده.

هلته په امریکا کې د واشنګټن پوهنتون یوې نمونیې وړاندوینې کې ویل شوي، په عام محضر کې د ماسکونو استعمال د کورونا وایرس یو بل ته د لګېدو پېښې اتیا په سلو کې او د کویډ ـ ۱۹ ناروغۍ د مړینې کچه ۶۰ په سلو کې کمولای شي.

د جانز هاپکېنز د جولای پر ۱۱مې تازه شمېرې ښايي چې په ټوله نړۍ کې پر کورونا وایرس د اخته شویو کسانو شمېر ۱۲.۵ میلیونو ته نېږدې شوی دی.

کورونا تر ټولو زیات کسان په امریکا، برازیل، هند او روسیه کې وهلي دي.

د جانز هاپکېنز د معلوماتو له مخې تر دې مهاله کویډ ۱۹ ناروغۍ په نړۍ کې نېږدې پنځه لکه او ۶۰ زره کسان وژلي خو څه کم اووه میلیونه ترې بیرته ښه شوي هم دي.

کورونا وایرس د ۲۰۱۹م کال په ډېسېمبر مياشت کې د چين په ووهان ښار کې راڅرګند شو چې د روغتيا د نړيوال سازمان په وينا د نړۍ تقريباً ټولو هېوادونو ته خپور شوی دی.

انګور اډه د تجارت لپاره پرانیستل شوه

د افغانستان او پاکستان ترمنځ تجارتي لاره انګور اډه د جولای پر ۱۰مه بيا پرانيستل شوه

د پاکستان او افغانستان ترمنځ د انګور اډې سرحدي لاره د جولای پر۱۰مه د دوه اړخیزې سوداګرۍ او خلکو د تګ راتګ لپاره خلاصه شوه.

د جنوبي وزیرستان مرستیال کمشنر حمیدالله خټک د لارې خلاصېدو په اړه مشال راډیو ته وویل چې دغه لاره د جولای پر ۱۰مه د سیمې اوسېدونکو غوښتنو په رڼا کې خلاصه شوه چې د کورونا وایرس پر ټولو احتیاطي لارښوونو یا ایس او پیز باندې به پوره عمل کېږي.

د سیمې تاجرانو د لارې خلاصېدو د پریکړې هر کلی کړی دی.

دوی وايي، له شاو خوا څلورو میاشتو راهیسې د لارې تړل کېدو له امله یې کاروبار اغېزمن شوی و.

د پاکستان حکومت د کورونا وایرس د مخنیوي لپاره د روان کال (۲۰۲۰م) په مارچ مياشت کې له افغانستان سره سرحدي لارې وتړلې خو وروسته په اپرېل او مې میاشت کې پر ځینو لارو باندې نرمي اعلان شوه.

پاکستان له افغانستان سره یو شمېر تجارتي لارې لري چې تورخم، چمن، غلام خان، انګور اډه او خرلاڅو یې مهمې بلل کېږي.

د افغانستان ولسي جرګې ۲۰ غړي په کورونا اخته شوي

د افغانستان ولسي جرګه

افغان چارواکو د جولای پر ۱۰مه وویل چې د هغه هیواد د ولسي جرګې۲۰ غړي پر کورونا وایرس اخته شوي دي.

د دغې جرګې غړې نیلوفر جلالي کوفي د جولايي پر لسمه مشال راډیو ته وویل، له تېرو ۱۸ ورځو راهیسې 'کوویډ-۱۹' ناروغۍ اخته شوې او لاهم نښې نښانې لري.

د جرګې بله غړې شینکۍ کړوخیل بیا وايي چې اکثره وکیلان د کورونا وایرس له ویرې مجلس ته نه حاضري.

د ولسي جرګې لومړی مرستیال میرزا محمد کټوازی وايي چې د جرګې له ۱۵ تر شلو پوري غړي په کورونا وایرس اخته دي.

دا په داسې حال کې ده چې ټاکل شوې تر راتلونکو څو ورځو پورې حکومت د باور رایې اخیستلو لپاره نوماند وزیران ولسي جرګې ته معرفي کړي خو د وکیلانو د ناروغۍ او غیر حاضرۍ له وجې یې نصاب یا کورم نه پوره کېږي.

تهران کې د چاودنې غږ اورېدل شوی، خو چارواکي یې ردوي

د جولای پر ۱۰مه، د تهران په لویدیځ کې د چاودنې غږ اورېدل شوی خو ایراني چارواکي یې ردوي.

دولتي ټېلېوېژن (ایرېب) او نیمه دولتي مهر خبري اژانس د ټولنیزو شبکو په حواله د چاودنې خبر ورکړی وو.

ایرېب ویلي چې تهران ته نېږدې په وړوکي ښار قدس کې تر چاودنې وروسته برېښنا بنده شوه.

خو ټېلېوېژن په دې اړه نور هېڅ معلومات ورنکړل.

د قدس ولسوالې لیلا واثقي د چاودنې په اړه خبرونه "ګونګوسې" وبللې او وايي، امنیتي چارواکو چاودنه نه ده تایید کړې.

نوموړې ومنله چې په سیمه کې بجلي قطع شوه خو زیاتوي چې تر پېنځو دقیقو وروسته برېښنا بحال شوه.

تر دې شاوخو ۱۰ ورځې مخکې د تهران په سینا اطهر روغتون کې په چاودنه کې شاوخوا ۲۰ کسان وژل شوي ول او تر هغې وروسته د نطنز په اټومي تاسیسیاتو کې هم چاودنه شوې وه خو ایرانیو چارواکو یې په اړه تفصیل نه وو ورکړی.

بغلان کې د پرېوتې الوتکې امریکايي پیلوټ روغ دی: چارواکي

چارواکي وايي الوتکه په بغلان ولایت کې پرېوتې

په افغانستان کې مېشت امریکايي پوځ ویلي، د هوايي ځواک یو پېلوټ د جولای پر نهمه د الوتکې تر پرېوتو ورڅخه روغ وتلی وو.

پوځ د جولای پر ۱۰مه په یوه بیان کې ویلي، د افغان هوايي ځواک اې-۲۹ سوپرټوکانو الوتکې د پرېوتو لامل په اړه پلټنې کوي خو لومړنۍ موندنې ښيي چې په الوتکه کې تخنیکي ستونزه پیدا شوې وه.

د سیمه ییزو چارواکو په خبره، الوتکه د جولای پر نهمه غرمې مهال د بغلان په دوشي ولایت کې پرېوته او پېلوټ یې په پیراشوټ کې ځمکې ته کوز شوی وو چې بګرام هوايي اډې ته استول شوی دی.

د افغانستان د دفاع وزارت هم د جولای ۱۰مې پر سهار په بیان کې ویلي چې الوتکه د روزنیز پرواز پر مهال پرېوتې او پيلوټ یې روغ دی.

د پېښې پر مهال د دوشي په شاوخوا کې د افغان پوځیانو او طالبانو ترمنځ جګړه هم روانه وه.

چین امریکايي بندیزونه په کورنیو چارو کې مداخله بللې

امریکا د چین پر لوړ پوړو چارواکي بندیزونه لګوي

د چین حکومت ویلي، پر لوړ پوړو چارواکو یې امریکايي بندیزونه په کورنیو چارو کې لاسوهنه ده.

دا په داسې حال کې ده چې واشنګټن د چین په سینکیانګ کې د بشري حقونو سرغړونو په تور پر لوړ پوړو چینايي چارواکو بندیزونه لګولي دي.

د چین بهرنیو چارو د وزارت ویاند لیژیان ژاو د جولای پر نهمه خبریالانو ته ویلي دا بندیزونه به دوه اړخیزه اړیکې ډېرې اغېزمنې کړي.

د چین او امریکا ترمنځ اړیکې د کورونا وایرس وبا او په هانګ کانګ کې د چین د ملي امنیت د لانجمن قانون نفاذ پر سر خرابې شوي دي.

د امریکا خزانې وزارت د جولای پر نهمه په یوه بیان کې وویل چې پر درېو چینايي چارواکو يې امریکا ته پر ورتګ بندیز لګولی او په امریکا کې یې د هغوی شتمنۍ کنګل کړې دي.

په دوی کې په سینکیانګ کې د کمیونسټ ګوند مشر هم شامل دی.

د امریکا بهرنیو چارو وزیر مایک پامپیو هم په هانګ کانګ کې د بشري حقونو او جمهوریت خرابېدونکې وضعې له کبله د چین پر وړاندې د ګامونو پورته کولو اعلان کړی دی.

امریکا د روسیې له لوري طالبانو ته د پیسو ورکولو دعوې څېړي

مارک مېلي او مارک اېسپر وايي د دعوو پلټنې کوي

د امریکا لوړو پوړو دفاعي چارواکو ويلي دي چې که د هغو راپورونو پخلې وشو چې ګوندې روسیې له افغان طالبانو سره تړلیو وسله والو ته په افغانستان کې د امریکايي سرتېرو وژنې پر سر پيسې ورکړي نو امریکا به ورته مناسب غبرګون وښيي.

د امریکا ګډو ځواکونو مشر جنرال مارک مېلي وايي، دفاعي او استخباراتي ادارو لا د هغو راپورونو تصدیق نه دی کړی خو ژمنه يې وکړه چې که دعوې ريښتیا ثابتې شوې نو واشنګټن به اقدام کوي.

د جولای پر نهمه په کانګرس کې د امریکا د ټولو ځواکونو له مشر مشر جنرال مارک مېلي او د دفاع له وزير مارک اېسپر څخه د رسنيو د یادو راپورونو په اړه پوښتنې وشوې.

امریکايي ورځپاڼې نيو يارک ټايمز د جون په پای کې کې د استخباراتي معلوماتو پر اساس په خپل خبر کې ويلي ول چې ولسمشر ډانلډ ټرمپ ته په دې اړه تفصیل ورکړل شوی.

سپینې ماڼۍ هغه مهال ویلي ول چې د معلوماتو تصدیق نه وو شوی نو د غبرګون په اړه یې پرېکړه نه ده کړې.

په واشنګټن کې د روسیې سفارت دا دعوې بې بنسټه بللې وې.

افغان کډوال پاکستان کې د پاتې کېدو موده غځول غواړي

د اسلام اباد په کیمپ کې یو افغان ماشوم له ټایر سره لوبې کوي

په پاکستان کې د افغان کډوالو ستونزو د هوارۍ کمېټۍ له حکومته غوښتنه کړې چې په هغه هېواد کې دې یې د اوسېدو موده وغځوي.

د جولای پر نهمه په پېښور پرېس کلب کې خبري غونډې ته د کميټۍ مشر ارسلا خان خروټي وویل، دا مهال د افغان کډوالو د کارډونو موده کله یو کال او کله شپږ میاشتو غځول کېږي چې له کبله يې کاروباري افغانان له مالي ستونزو سره مخامخ دي.

نوموړي وايي، د کډوالو کېمپونو د ځمکې ملکيت ډېره لويه ستونزه ده چې له کبله یې یو شمېر خلک د کېمپونو کډوال بې دخله کوي نو دې مخنيوې وشي.

دا مهال په پاکستان کې د کډوالو په کېمپونو او بهر تر ۱۴ لاکه زیات راجسټر افغان کډوال مېشت دي.

په پاکستان کې د افغان کډوالو د پاتې کېدو قانوني موده د ۲۰۲۰ز کال د جون پر ۳۰مه پای ته ورسېده.

په هغه هېواد کې د سرحدي او قبایلي چارو وزارت (سیفران) وفاقي کابینې ته د کډوالو د پاتې کېدو مودې غځولو لیک استولی چې لا حکومت نه دی منظور کړی.

خو په اسلام اباد کې د افغانستان سفارت او د ملګرو ملتونو د کډوالو ادارې (یو اېن اېچ سي ار) چارواکي وايي، د پاکستان حکومت د افغانانو د پاتې کېدو مودې غځولو ژمنه کړې.

سربیا کې د کورونا وبا مخنیوي تکلارې ضد مظاهرې

په سربیا کې د حکومت ضد مظاهرو یو انځور - د ۲۰۲۰ز د جولای نهمه

د سربیا حکومت د کورونا وایرس وبا مخنیوي لپاره یو شمېر نوي اقدامات اعلان کړي خو د جولای پر ۱۱ او ۱۲مه به کرفيو یا ګرځبنديز نه لګوي.

دا تر هغې وروسته ده چې په بلغراد کې د کورونا وايرس وبا مخنيوي په اړه د حکومتي اقداماتو ضد ولس په احتجاج لاس پورې کړ او د جولای نهمې پر شپه یې هم مظاهرې وکړې.

د جولای پر نهمه وزيراعظمې انا برنابیچ وويل، په بلغراد کې به د ودانیو بهر او دننه پر ولسي غونډو بندیز وي او تر ۱۰ زیات کسان به هم نشي غونډې دای.

خو د محدودیتونو د نرمولو پر حکومتي اعلان سربېره پر درېیمه شپه هم په بلغراد کې خلکو احتجاج ته دوام ورکړ.

البته په احتجاج کوونکو کې یو شمېر کسان په دې موخه د سړکونو تر غاړې ناست ول چې ځان په تاوتریخوالي کې له ککړو کسانو بېل کړي.

جنوبي وزیرستان کې د یو ځايي مشر کورونه ړنګ کړل شوي

د جنوبي وزیرستان انګور اډه سیمه کې د ځليخېل وزیر قبایلو لښکر د یوه ځايي وګړي محمد رحمان درې کورونه ړنګ کړي دي.

محمد رحمان جولای پر نهمه مشال راډیو ته وویل چې دغه کورونه او ځمکه يې د پلار نیکه قبضه ده خو لښکر يې ترې د یو حکومتي ټرمینل لپاره اخېستل غواړي او دې يې ورکولو ته اماده نه دی.

نوموړی زیاتوي پوځ، امنیتي ادارې او انتظامیه ویني چې لښکریان له وسله سره راځي او کورونه ړنګوي خو پرضد يې اقدامات نه کوي.

بلخوا د جنوبي وزیرستان پولیسو مشر شوکت علي مشال رادیو ته ویلي دا دوی قامي معامله ده او که چیرې محمد رحمان د دې پرضد پولیسو ته راپور ورکړي، نو پولیس به کاروايي کوي.

سره د دې چې قبایلي ضلعو ته د پاکستان عادي قانون غځول شوی دی، بیا هم د ځايي خلکو په وینا دغلته جرګې او قبایلي لښکرې فعالې دي او په خپله خوښې د خلکو معاملې فیصله کوي.

اوسنۍ وبا د نړۍ ۱۲۱ میلیونه وګړي وږي کولای شي

د ښارونو تړل کېدو د بېوزله کورنیو ماشومان سخت زیانمن کړي.(ارشیف)

د بې وزلۍ ضد نړیوال سازمان اکسفام په نړیواله ټولنه غږ کړی چې د کوروناوایرس جهاني وبا په نتیجه کې د رامنځ ته شوي بحران ختمولو لپاره ګامونه واخلي.

نن (جولایي ۹) اکسفام په یوه راپور کې ویلي چې وبا په لویه کچه خلک بیروزګاره کړي، د خوړو او غلې پیداوار او وېش يې ګډوډ کړی او مرستې کمې شوي دي.

ادارې ویلي دا بحران کېدی شي سږ کال ۱۲۱ میلیونه خلک له لوږې سره مخامخ کړي. په راپور کې ویره ښودل شوې چې له وایرسه به د ورځې په سر د مړو شمېره ۱۲۰۰۰ ته ورسي.

په راپور کې ۱۰ ځایونه په نښه کړل شوي چې د خوړو له سخت کړکېچ سره مخ دي او د وبا په نتیجه کې يې وضع لا په خرابېدو ده.

په دې کې یمن، کانګو، افغانستان، وینزویلا، مغربي افریقايي ساحل، ایتوپیا، جنوبي سوډان، شام او هیټي شامل دي.

د چین ـ امریکا اړیکو ته جدي چیلنجونه دي: وانګ

د چین بهرنیو چارو وزیر وانګ يي ویلي چې د چین او امریکا اړېکې له جدي چیلنجونو سره مخامخ شوي دي.

د بهرنیو چارو وزارت په رسمي ویبپاڼه نوموړي د جولای پر نهمه په یوه وینا کې زیاته کړې چې د چین په اړه د امریکا موجوده پالیسي په ستراتیجیکو بدګمانیو ولاړه ده چې ریښتیا کم لري او له جذباتو ډکه ده.

داسې ښکاري چې وانګ یي دا څرګندونې د اېف بي ای د مشر کرسټیفور رې د هغه بیان په ځواب کې کړي په کوم کې چې نوموړي ویلي وو چې د چین جاسوسي هلې ځلې د امریکا امنیت ته اوږد مهاله خطر دی.

د دواړو هېوادونو خپلمینځي اړېکې د چین په ووهان کې د کورونا وایرس د موندل کېدو وروسته لاندې تلې دي.

اړېکې هغه وخت نورې هم خرابې شوې کله چې د روانې میاشت په پیل کې چین په هانګ کانګ کې د قامي سلامتۍ یو لانجمن قانون لاګو کړ.

کندهار کې موټر بم برید درې پولیس وال وژلي،۲۰ تنه ژوبل

د افغانستان د کندهار ولایت په شاه ولیکوټ ولسوالۍ کې یوې موټر بمې چاودنې نن سهار درې پولیسان وژلي او ۲۰ تنه نور یې ټپيان کړي دي.

په ژوبل کسانو کې د یادې ولسوالۍ د پولسو مشر او ولسي کسان هم شامل دي.

د کندهار د والي ویاند احمد باهر احمدي ویلي چې په دغه بمي چاودنه کې د شاه وليکوټ ولسوالۍ د پولیسو مرکز او نېږدې انتظامي دفتر ودانیو ته هم تاوانونه رسېدلي.

احمدي دا هم ویلي بریدګر خپل هدف ته تر رسېدو وړاندې وژل شوی دی.

د پېښې ذمه واري تر اوسه چا نه ده منلې خو په شاه وليکوټ ولسوالۍ کې طالب جنګیالي فعاله دي.

د طالبانو تاوتریخوالی د افغان سولې بهیر له خطر سره مخامخوي: غني

ولسمشر غني د جولای پر لومړۍ د امنیتي حالاتو ارزونې په موخه لوګر کې ولسي غونډې ته د وینا پر مهال. (ارشیف)

افغان ولسمشر اشرف غني ویلي چې د طالبانو له خوا په تشدد کې ډیروالي د سولې پروسه له جدي خطر سره مخ کړې ده.

د جولای پر شپږمه له طالبانو سره د متوقع خبرو په اړه نړیوالی ټولنې ته د مالوماتو ورکولو پر مهال نوموړي په یو انلاین کانفرانس کې وویل چې د سولې د خبرو لپاره تیارۍ نیول شوي دي، خو روان کال د تشدد کچه د پروسږ کال پرتله لوړه ده.

افغان ولسمشر زیاته کړه، که چیرې طالبان جګړی ته دوام ورکوي نو د افغانستان د سولې بهیر به له جدي چیلنجونو سره مخامخ شي.

طالبانو په افغانستان کې د یوشمېر بریدونو ذمه واري نه ده منلی خو دا مني چې په کلیوالو سیمو کې يې افغان امنیتي ځواکونه په نښه کړي دي.

بلخوا د جولای پر ۷مه په ننګرهار کې په یو ځانمرګي برید کې د پولیسو یو کماندان او د هغه دوه ساتونکي وژل شوي دي.

تراوسه چا د برید ذمه واري نه ده منلی، خو په دغه سیمه کې طالبان او د داعش وسله وال فعالیتونه لري.

امریکا کې د کورونا وایرس پېښې بیا زیاتې شوې

د امریکا په بروکلېن کې د کورونا وایرس یو ناروغ روغتون ته وړل کېږي

په امریکا کې د ساري ناروغیو مخنیوي ادارې یوه مشر انتوني فاوسي د جولای پر شپږمه وویل، په ملک کې د کورونا وایرس حالت ښه نه دی.

نوموړي دا څرګندونې داسې مهال کړې چې په یاد هېواد کې د کورونا نوي کیسونه او د خلکو روغتون کې د داخلولو شمېره زیاته شوې ده.

په داسې حال کې چې په امریکا کې کورونا وایرس د درې میلیونو په شاوخوا کې خلک نیولي او د جولای تر شپږمې یې تر ۱۳۰ زرو زیات کسان وژلي، ولسمشر ټرمپ د اقتصادي فعالیتونو په بیا پیلولو زور راوړی.

له امریکا وروسته کورونا وایرس برازیل تر ټولو زیات ځپلی، هلته کورونا تر یو اعشاریه شپږ میلیونو زیات کسان نیولي او نږدې ۶۵ زره یې وژلي دي.

هند اوس د کورونا ځپلو په قطار کې په درېم نمبر دی، هلته تر دوشنبې نږدې ۷ لکه کسان کورونا نیولي او ۲۰ زره یې وژلي دي.

عمر داودزی د پاکستان لپاره د افغان ولسمشر ځانګړی استازی شو

محمد عمر داودزی

د افغانستان ولسمشر اشرف غني محمد عمر داودزی د پاکستان لپاره خپل ځانګړی استازی ټاکلی دی.

محمد عمر داودزي د جولای پر شپږمه پر ټویټر پاڼه د خپلې ګومارنې پخلی کړی دی.

نوموړی تر دې وړاندې په پاکستان او ایران کې د افغانستان سفیر هم پاته شوی دی.

دا له هغه څه موده وروسته ده چې پاکستان پخوانی سفیر محمد صادق د افغانستان لپاره خپل ځانګړی استازی ټاکلی وو.

پاکستان عبدالله عبدالله ته د ورتګ رسمي بلنه ورکړه

د افغانستان د ملي مصالحې عالي شورا مشر عبدالله عبدالله

پاکستان د افغانستان ملي مصالحې عالي شورا مشر عبدالله عبدالله ته هغه هېواد ته د ورتګ رسمي بلنه ورکړې ده.

دا خبره د ملي مصالحې عالي شورا په خپله فېس‌بوک پاڼه کې کړې او ویلي یې دي چې دغه بلنلیک پرون په کابل کې د پاکستان سفیر زاهد نصرالله خان ښاغلي عبدالله ته وړاندې کړ.

د خبر له مخې عبدالله یکشنبه په سپېدار ماڼۍ کې په خپل دفتر کې له نصرالله خان سره وکتل او د سولې پر روان بهیر یې خبرې وکړې.

د خبرپاڼې له مخې د پاکستان سفیر وویل چې هېواد یې د افغانستان د سولې د بهیر بشپړ ملاتړ کوي او تل‌پاتې سولې ته د رسېدو لپاره به خپلې مرستې جاري وساتي.

عبدالله ویلي چې په یوه مناسب وخت کې به هغه هېواد ته سفر وکړي.

پاکستان ته د افغانستان د سولې په پروسه کې د یوه مهم لوبغاړي په توګه کتل کېږي.

پاکستان: تېر شواروز د کورونا وایرس ۵۰ نور ناروغان مړه شوي

حیدر اباد: روغتیاپالي د کورونا وایرس ناروغي مالومولو لپاره له خلکو د خولې لنده بل/لوندوالی اخلي. ۲۰۲۰، ۲۳ جون

په پاکستان کې په تېر يوه شواروز کې ۵۰ کسان له کورنا وايرسه مړه شوي دي.

د دې هېواد روغتيا وزارت ويبپاڼې د جولايي پر شپږمه ويلي چې په تېرو ۲۴ ساعتونو کې په ټول هېواد کې درې زره درې سوه ۴۴ نور کسان په کورونا وايرس اخته شوي دي چې ورسره د ناروغانو مجموعي شمېر شاوخوا دوه لاکه ۳۱ زره ته رسېدلی دی. خو حکومت وايي چې تر اوسه پورې تر يو لاکه ۳۱ زره زيات کسان رغېدلي هم دي.وايرس په پاکستان کې پهمجموعي توګه څلور زره اوه سوه ۶۲ کسان وژلي دي.

سرچينې: په اسټريا کې وژل شوی تن د چيچن مشر منتقد وو

مامېخن عمروف

سر چينې وايي هغه روسی پناه غوښتونکې چې د جولای په څلورمه د اسټریا سر ښار ویانا سره نیزدي وژل شوی، پخوانې چيچنایي بيلتون پال او د چيچنیاي مشر رمضان قديرووف منتقد وو.

بهر ميشته چيچنيانو کې یوې سرچينې مشال راډيو ته ويلي چې وژل شوې ماميخن عمرووف د ویانا د انزور په نامه پيژندل کيدو. بلخوا اسټریايي چارواکو د هغه د شناخت په اړه صرف دومره ويلي چې یو ۴۳ کلن روسي پناه غوښتونکی له ویانا بهر د يو بازار د ګاډو د تم ځای سره ويشتل شوی دی.

د ابتدايي مالوماتو له مخه ماميخن په سر ويشتل شوی وو او د امبولانس د راتګ نه مخکې يې ساه ورکړې وه. له دې وژنې څو ساعته پس اسټریايي چارواکو د پيښې د ځايه ۲۰۰ کلوميټره لرې په لينځ ښار کې يو مشکوک کس نيولی او وايي چې روسي وګړی دی.

پوليس وايي د وژنې د سبب معلومولو لپاره يې پلټنې روانې دي.

په ویانا کې د روس سفارت يو ویاند، د روس سر کاري خبري اژانس تاس ته ويلي دي چې تر دا مهال دوی سره چا د دې پيښې په اړه رابطه نه ده کړې.

په نړۍ کې په کورونا وایرس د اختوو شمېر ۱۱.۲ ميليونو ته ورسېد

په ارمينيا کې ناوې او شاوو له کورونا وایرسه د بچ کېدو لپاره ماسکونه اغوستي

د روغتيا نړیوالې ادارې (ډبليو ايچ او) د جولای پر څلورمه د کورونا وايرس وبا په پیښو کې د بېسارې اضافې راپور ورکړی چې په ټوله نړۍ کې په ۲۴ ساعتونو کې ۲۱۲۳۲۶ کيسونه ريکارډ شوي دي.

په دې کې تر ټولو زياتې د مثبتو پېښو شمير په امريکا، برازیل او هند کې دي.

د کورونا وايرس له وجې د مړینې شمېر په ورځ کې شاوخوا 5،000 ده.

خو په برتانیا کې چارواکو د جولای پر څلورمه د رستورانتونو، سینما ګانو او د نورو ځايونو خلاصیدو ته هيله من دي. وزيراعظم بورس جانسن ويلي دي چې دا د خلکو ذمه واري جوړيږي چې قواعد عملي کړي.

د کورونا وایرس په اړه شمېرې ساتونکي ويب سايټ ليکلي چې د جولای تر څلورمې پوې په ټوله نړۍ کې له يولسو ميليونو څخه زيات خلک پر کورونا وايرس اخته شوي، شپږ ميلونه ترې روغ شوي او له پنځه لاکه شپږويشت زرو زيات مړه شوي دي.

کابل کې "درې مهمې نړيوالې غونډې" کېدونکې دي

د افغانستان بهرنيوو چارو وزارت وياند، ګران هېواد

د افغانستان بهرنیو چارو وزارت وایي چې کابل به دا اونۍ د افغان سولې لپاره د سیمه ییزې او نړیوالې اجماع د پیاوړتیا په هدف د درې مهمو ناستو کوربه وي.

د وزارت ویاند ګران هېواد د جولای په څلورمه په يو بيان کې ویلي چې لومړۍ غونډه به د دوشنبې په ورځ د شلو سیمه ییزو او لویو هېوادونو ترمنځ وي، دویمه به د سې شنبې په ورځ وي چې د افغانستان، پاکستان او چین ترمنځ د سټراټیژیک ډیالاګ ترنامه لاندې جوړېږي.

ده زياته کړه چې درېیمه ناسته به د ویډیو کنفرانس له لارې وي او هغه ستر هېوادونه به پکې برخه واخلي چې په تېرو ۱۹ کلونو کې یې له افغانستان سره اقتصادي او امنیتي برخو کې همکاري کړي وي.

د افغانستان د بهرنیو چارو وزارت دیپلوماتیکې هڅې زیاتې کړې چې د طالبانو سره د بین الافغاني خبرو له پیل وړاندې د افغان سولې لپاره سیمه ییزه او نړیواله اجماع لا پیاوړې او ګړندۍ کړي.

نور پورته کړئ

ځانګړې پاڼې

له موږ سره اړیکي

XS
SM
MD
LG