افغان چارواکي وايي چې نن سهار [د نومبر پر ۳۰مه] په یوه بمي چاودنه کې د ملي اردو يو جنرال وژل شوی دی.
د هلمند ولایت د عامه اړیکو مسوول زاهد اتل مشال راډیو ته تایید کړه چې د مارجې او ناوې ولسوالیو تر منځ لاره کې په یوه ماین چاودنه کې د ملي اردو د سرحدي ځواکونو د څلورمې پلې لوا قومندان جنرال ظاهرګل مقبل وژل شوی او دوه عسکر یې ټپیان دي.
د مشال راډیو خبریال وايي چې له افغان پوځیانو سره په موټرو کې یو شمېر خبریالان مارجې ته روان وو چې له ډلې یې د شمشاد ټېليویژن خبریال سردار محمد سروري په دې ماین چاودنه کې ټپي شوی دی.
ټپیان په لښکرګاه ښار کې ایمرجنسي روغتون ته انتقال شوي دي.
مارجه کې افغان پوځیانو له ډېره وخته عملیات پيل کړي وو. د نننۍ ماین چاودنې مسوولیت تر دې دمه چا نه دی منلی.
