جرمني یو روسی وګړی په دې هېواد کې د یوه برید په ترسره کولو په رسمي توګه تورن کړی دی.
د جرمني فيډرالي څارنوالانو پرون وویل، د برلین یوه عدالت تېره میاشت د ۳۱ کلن محمدعلي سي په نوم دا تورن په تاوتریخوالي او یوې چاودنې ته په تیارۍ نیولو تورن کړ. پر هغه تور دی چې د ۲۰۱۶م کال په اکتوبر میاشت کې یې چاودېدونکي مواد په برلین کې په خپل اپارتمان کې ساتلي وو.
یوې جرمنۍ خبري وېبپاڼې زيت انلاين راپور ورکړی چې تورن د روسیې د داغستان جمهوریت اصلي اوسېدونکی دی او د تېر ۲۰۱۸م کال په اګست میاشت کې ونیول شو خو په رسمي ډول د روان کال په فبرورۍ کې تورن وګرځول شو.
څارنوالانو ويلي چې علي سي د انیس امري په نوم له هغه تيونيسي وګړي سره تماس درلود چې د۲۰۱۶م کال په ډېسېمبر مياشت کې یې په برلین کې د کرسمس پر یوه بازار برید وکړ، خو دی د دې برید له پلانه نه و خبر. امري هغه وخت د پېښې له ځايه تښتېدلی و چې بيا وروسته په اټلي کې د پولیسو په ډزو ووژل شو. د برلین د برید مسولیت چې ۱۲ کسان پکې ووژل شول، داعش وسله والې ډلې منلی و
