د لاسرسي ځای

تازه خبر

خبرونه

د سوریې پر پوځي تاسیساتو بریدونو کې۱۲وسله وال وژل شوي

د سوریې پر پوځي تاسیساتو د تېرې شپې په هوايي بریدونو کې ۱۲ وسله وال وژل شوي دي.

د سوریې چارواکو ویلي، په بمباریو کې هغه پوځې اډې چې د ایران د سپاه پاسداران له خوا اداره کېدې هدف ګرځول شوي، خو په وینا یې ایراني او یا د حزب الله ملېشو ته په کې زیان نه دی رسېدلی.

د سوریې د بشري حقونو د څار بریتانیا مېشتې ډله وايي چې سوریايي ځواکونه هم په وژل شویو کې نه دي شامل، خو دې ادارې وژل شوي کسان د حکومت پلوي ملېشې بللې چې ممکن د عراق شیعه ملېشې و اوسي.

د سوریې دولتي خبري اژانس ویلي د سوریې د دښتې او عراق د سرحد ترمنځ سیمه کې څو پوستې د امریکا په مشرۍ د نړیوال ایتلاف په هوايي بریدونو کې هدف ګرځول شوي دي.

خو د امریکا د دفاع وزارت ویاند ډګرمن کاني فالکنر په دې اړه ورکړل شوي راپورونه رد کړي او ویلي یې دي، د دوی په مشرۍ ایتلاف د سوریې په ختیځ کې کوم برید نه دی کړی.

تر اوسه روښانه نه ده چې دا حملې د چا له خوا شوې دي.

تر دې مخکې اسرایلو وخت په وخت د سوریې پر هغو پوځي تاسیساتو بریدونه کړي چې د ایران سپاه پاسداران او یا د حزب الله ملېشو کارولې.

د نننۍ ورځې ټول خبرونه وګورئ

پاکستان کې کورونا وايرس ۱۳۵ نور کسان وژلي

د پنجاب په پنډۍ کې له کورونا وایرسه د مړه شوي یوه تن جسد له روغتونه وړل کېږي.

په پاکستان کې په تېرو ۲۴ ساعتونو کې له کورونا وایرسه نور ۱۳۵ کسان مړه شوي دي چې ورسره د مړیو ټوله شمېره ۱۹ زره ۷۵۲ ته ورسېده.

د کورونا وايرس په اړه د پاکستان حکومتي ووبپاڼې د مې پر ۱۸مه لیکلي چې په تېر یو شواروز کې د کورونا وایرس دوه زره ۵۶۶ کیسونه ثبت شوي دي.

دغسې په تېرو ۲۴ ساعتونو کې ۲۹۷۹ کسان له کورونا وایرسه بیرته ښه شوي هم دي.

په پاکستان کې د کورونا وایرس له کبله تراوسه له اته لکه ۹۲ زره زيات کسان له کووېډ-۱۹ څخه رغېدلي هم دي.

بلخوا په پاکستان کې د مې له ۱۶مې د صوبو او ښارونو ترمنځ د سپرلیو موټرو په تګ راتګ بنديز هم ختم شوی دی.

په هغه هېواد کې د کورونا وایرس د کنټرول ملي ‌ادارې (اېن سي او سي) د مې پر۱۵مه اعلان وکړ چې د نویو کېسونو د کمېدو له وجې اوس دوکانونو ته اجازه ورکوي چې د شپې تر اتو بجو پورې پرانیستي پاتې شي او په سرکاري دفترونو کې به نيمايي کسان کار کوي.

ولسمشر غني په لښکرګاه کې یوه څلور لاره د خبریال الیاس داعي په نوم کړه

لښکرګاه کې د داعي په نوم څلور لاری

د افغانستان ولسمشر په هلمند کې د ازادۍ راډیو د وژل شوي خبریال الیاس داعي په نوم د یوې څلور لارې د نومولو منظوري ورکړې ده.

د ولسمشرۍ ماڼۍ د چارو ادارې مطبوعاتي دفتر د مې پر ۱۷مه ویلي، دغه وړاندیز د هلمند خبریالانو کړی وو.

دفتر زیاتوي، ولسمشر غني د مې پر ۱۷مه دغه وړاندیز ومانه چې په لښکرګا کې یوه څلور لاره د داعې په نوم شي.

په هلمند کې د ازادي راډيو خبریال الیاس داعي د پروسږ کال د نومبر پر ۱۲مه په چاودنه کې وژل شوی وو.

د فلسطینیانو او اسراییلو ترمینځ د اوربند ملاتړ کوو: بایډن

د امریکا ولسمشر جو بایډن

سپينې ماڼۍ ویلي، د امریکا ولسمشر جو بایډن له اسراییل وزیراعظم بین یامین نتنیاهو سره د مې پر ۱۷مه په ټلېفوني خبرو کې د اسراییلو او فلسطینانو ترمبنځ د ډزبندی د ملاتړ څرګندونه کړې ده.

سپینې ماڼۍ په یو بیان کې وویل چې ولسمشر بایډن د خبرو پر مهال د راکټي حملو پر وړاندې د اسراییل د ځان خوندي کولو د حق په ملاتړ ټینګار وکړ او په غزه کې د حماس او نورو وسله والو ډلو خلاف د اسراییلو د پوځي عملیاتو په پرمختګ یې هم خبرې وکړې.

بیان زیاتوي، ولسمشر بایډن او وزیراعظم نتنیاهو ډزبندی ته د رسیدو په موخه د مصر او نورو ملګرو هېوادونو له هڅو سره د امریکا د یوځایکېدو په باب هم بحث وکړ.

اسراییلو ویلي چې په هوايي بریدونو کې یې په غزه کې د فلسطینیو وسله والو یو لوړ پوړی قومندان وژلی او د ۱۵ کلومیټره اوږد سورنګ ړنګولو ترڅنګ یې د حماس ډلې د مبینه قومندانانو نهه کورونه هم ویجاړ کړي دي.

په غزه کې د وژل شویو فلسطینیانو شمېره له ۲۰۰ زیاته شوې او د اسراییلیو چارواکو ویلي چې په دې هېواد کې ۱۰ تنه وژل شوي دي.

د شهباز شریف نوم ایګزیټ کنټرول لیسټ ته واچول شو

شهباز شریف

پاکستان حکومت د مسلم لیګ نواز ګوند مشر شهباز شریف نوم له هېواده وتلو مخنیوي لیسټ (اي سي ایل) کې اچولی دی.


د کورنیو چارو وزیر شیخ رشید احمد نن (د مې ۱۷ مه) په اسلام اباد کې یوې خبري غونډې ته وویل چې دا اقدام یې د وفاقي کابینې د منظورۍ په رڼا کې کړی دی.

شهباز شریف، چې په قامي اسمبلۍ کې د حزب اختلاف مشر هم دی، د مې په اتمه نېټه هم وفاقي تحقیقاقي ادارې (اېف ای اې) پر لاهور هوايي ډګر له بهر تللو دورلی وو.

نوموړي نن د دغې ګام پرضد په لاهور هايي کورټ کې درخواست جمع کړی چې پکې یې اېف ای اې د عدالت په سپکاوي تورنه کړې ده.

دا په داسې حال کې ده چې د مې په اوومه نېټه لاهور های کورټ شهباز شریف ته د علاج په غرض له هېواده د بهر تللو اجازه ورکړې وه.

خو بلې خوا ته نن د داخله چارو محکمې د لاهور های کورټ دغه فېصله هم په سپریم کورټ کې چیلنج کړې ده.

پاکستان کې له کووېډ-۱۹ نور لسګونه کسان مړه شوي دي

د پنجاب په پنډۍ کې له کورونا وایرسه د مړه شوي یوه تن جسد له روغتونه وړل کېږي.

په پاکستان کې کووېډ-۱۹ناروغۍ په تېر يوه شواروز کې نور ۷۴ کسان مړه کړي چې ورسره په دې هېواد کې له دې ناروغۍ د مړیو ټوله شمېره تر ۱۹،۶۰۰ اوښتې.

د کورونا وايرس په اړه د پاکستان حکومتي ووبپاڼې په وینا، په تېرو ۲۴ ساعتونو کې نورې څه باندې ۳،۲۰۰ تازه پېښې ثبت شوي دي چې ورسره د ټولو ناروغانو شمېر له اته لکه اتيا زرو اوښتی دی. خو په هغه هېواد کې له اووه لکه ۹۲ زره زيات کسان له کووېډ-۱۹ څخه رغېدلي هم دي.

بلخوا په پاکستان کې د مې له ۱۶مې د صوبو او ښارونو ترمنځ د سپرلیو موټرو په تګ راتګ بنديز هم ختم شوی دی.

په هغه هېواد کې د کورونا وایرس د کنټرول ملي ‌ادارې (اېن سي او سي) د مې پر۱۵مه اعلان وکړ چې د نویو کېسونو د کمېدو له وجې اوس دکانونو ته اجازه ورکوي چې د شپې تر اتو بجو پورې پرانیستي پاتې شي او په سرکاري دفترونو کې به نيمايي کسان کار کوي.

کورمه کې د تاوتریخوالي ضد شییعه - سني تړون

کورمه کې د شییعه-سني جرګې برخوال: ۲۰۲۱، ۱۷م مې

په کورمه کې شییعه سني مشرانو ویلي، دوی به هر هغه عمل مخالفت کوي چې په سیمه کې د فساد سبب جوړېږي.

دغو مشرانو په اتوار په داسې حال کې جرګه کړې چې د یوه مذهبي شخصیت په شان کې د سپکاوي ویډیو په ټولنیزو رسنیو تر خپرېدو وروسته د سیمې په خلکو کې غوسه راپارولې او د دې پرضد يې د قانوني کاروايي غوښتنه کړې ده.

د شییعه ګانو تنظیم انجمن حسینه مشر حاجي سردار حسین بیګا مشال رېډیو ته وویل، په سیمه کې ډېر په مشکله امنیت پرځای شوی او د دې قایم ساتلو لپاره به حکومتي اقداماتو مکمل ملاتړ کوي.

په جرګه کې شامل یوبل مشر ملک حاجي سلیم خان اورکزی وايي، چې د کورمې د بدامنۍ اثرات په ټول ملک غورځېږي نو ځکه به د امنیت لپاره ټولې ستونزې د خبرو اترو له لارې حل کوي.

بلخوا د کورمې ضلعي انتظاميۍ مشر ډپټي کمیشنر ډاکټر افاق وزیر مشال رېډیو ته وویل چې څوک هم د قانون خلاف ورزي کوي پرضد به یې سخت اقدامات کېږي.

په کورمه شییعه ګان او سنیان ګډ ژوند کوي او کله نا کله پکې فرقه ییزې پېښې رامنځ ته کېږي.

د امریکا او پاکستان د بهرنیو چارو وزیران پر افغان سوله غږېدلي

د امریکا او پاکستان د بهرنیو چارو وزیرانو د افغانستان د سولې په پروسه باندې خبرې کړې دي.

د پاکستان د بهرنیو چارو وزارت یکشنبه ماښام په دې اړه اعلامیه ورکړې ده.

د اعلامیې له مخې د پاکستان د بهرنیو چارو وزیر شاه محمود قریشي خپل امریکايي سیال انتوني بلېنکن ته ډاډ ورکړی چې هېواد یې د افغانستان د سولې له پروسې کلک ملاتړ کوي.

هغه دا ټینګار هم کړی چې له سیاسي حل لارې سولې ته رسېدل د ټولو ښکېلو افغان خواوو، سیمې او نړیوالې ټولنې ګډ مسولیت دی.

په اعلامیه کې د قریشي په حواله زیاته شوې چې د پوځیانو مسولانه ایستل، د تاوتریخوالي کمښت، دایمي اوربند او د ټول‌شموله سیاسي جوړجاړي د ترلاسه کولو لپاره د شته موقع کارول خورا ارزښت لري.

د ملا عبدالمنان نیازي زوی د هغه ځای ناستی وټاکل شو

د وسله‌والو طالبانو د انشعابي ډلې مخکېنی مرستیال ملا عبدالمنان نیازی

له وسله‌والو طالبانو جلا شوې ډلې د مرستیال ملا عبدالمنان نیازي مړی په یکشنبه په هرات کې خاورو ته وسپارل شو او زوی یې د هغه ځای ناستی وټاکل شو.

د راپورونو له مخې د ملا عبدالمنان نیازي د جنازې په مراسمو کې د یادې ډلې سلګونه پلویانو او غړو محمد خالد نیازی خپل مشر وټاکه.

خالد نیازي ازادي راډیو ته وویل چې د خپل پلار په لار پسې به ځي: "زه هم د حاجي صاحب هیلې پوره کوم. د هغه هیلې او اهداف یو امن افغانستان او ارامه او خوشحاله خلک و."

ملا عبدالمنان نیازی د طالبانو په دوره کې د بلخ او هرات والي پاتې شوی وو. هغه د طالبانو د پخواني مشر ملا اختر منصور تر وژل کېدو وروسته د ملا محمد رسول په مشرۍ د بېلې شوې ډلې مرستیال وټاکل شو.

د هرات والي عبدالوحید قتالي ازادي راډیو ته وویل ملا نیازی تېره چهارشنبه د ادرسکن او ګذرې ولسوالیو ترمنځ په یوه برید کې سخت ټپي شوی و.

دی د درملنې لپاره کابل ته انتقال شوی و چې هم هلته یې ساه ورکړه او مړی یې یکشنبه هرات ته یوړل شو.

اسرايل په تازه حمله کې ۲۶ فلسطینيان وژلي

په غزه کې د اسرايلو په بمبارۍ کې په نښه شوې يوه وداني

اسراييلو په غزه کې د مې پر ۱۶مه د حماس ډلې د يو مشر په کور بمباري کړي چې پکې یې ۲۶ فلسطينیان وژل شوي.

په نښه شوی کور د یحیی سينوار دی. هغه د حماس ډلې د سياسي بيورو مشر دی. معلومه نه ده چې نوموړي ته څه زیان رسېدلی کنه.

دا په داسې حال کې ده چې د ملګرو ملتونو امنيت شورا د جګړې ختمولو پر لارو چارو د بحث لپاره غونډه کوي. بلخوا د اسلامي هېوادونو سازمان (او اي سي) هم د مې پر ۱۶مه، بيړنی انلاين غونډه رابللې چې پر غزه د اسراييل بريدونو درولو غږ وکړي.

د دواړو خواوو چارواکو په وينا په غزه کې د وژل شوو فلسطينانو شمېر ۱۷۴ ته رسېدلی دی. همداراز له غزې د وسله والو د راکټونو په ويشتلو کې ۱۰ اسرايلي وګړي هم وژل شوي.

هيچا ته د جمهوري نظام د تخریبولو اجازه نه ورکوو: محب

ډاکټر حمدالله محب

د افغانستان د ملي امنيت شورا سلاکار ډاکټر حمد الله محب په ننګرهار ولايت کې تر خوږياڼو او دره نور ولسوالۍ وروسته ګوشتې ولسوالۍ ته تللی وو.

هغه د مې په ۱۵مه پر ډيورنډ کرښې پرتې، ګوشتې ولسوالۍ کې د قومي سپين ږيرو په يوه غونډه کې وويل چې افغان حکومت به هيچا ته د جمهوري نظام د تخریبولو اجازه ورنه کړي. نوموړي له خلکو وغوښتل چې د خپل حکومت ملاتړ د تېر په څير روان وساتي او د جګړې په سوله ییز ډول ختمولو کې ورسره مرسته وکړي.

هغه زیاته کړه: ((د وسله والو مخالفينو په ليکو کې ډير یې اوس په دې پوه شوي چې جګړه د حل لار نه ده. په عامه پوهاوي‌کې راسره تاسو په ګډه کار وکړئ.))

د نوموړي سره په دې سفر کې د ننګرهار والي ضياالحق امرخېل هم وو. نوموړي پر طالبانو غږ وکړ چې له جګړې لاس واخلي او افغان حکومت سره د سولې مذاکراتو ته کښېني. هغه زیاته کړه: ((له علماوو مې هیله دا ده چې له هر ممبر او له هر مسجد څخه د روانې افغان وژنې خلاف غږ پورته کړي.))

اسرايل وايي "په غزه کې پر وسله والو" بریدونو ته دوام ورکوي

د مې په ۱۴مه په غزه کې يوه ښځه د اسرايلو تر برید وروسته د ویې ښځې غبرګون

د اسرایل وزیراعظم بنیامین نتنیاهو وايي په غزه کې د فلسطینيو وسله والو پر ضد به یې روانه کاروايي تر هغې دوام لري چې تر څو یې اړتیا وي. دا په داسې حال کې ده چې امریکا او ملګرو ملتونو په دواړو خواوو د ارامه کېدلو غږ کړی دی.

نتنیاهو د مې ۱۵مه له هغې وروسته دا خبرداری جاري کړی چې اسراییل په غزه کې د حماس د اعلا چارواکو او قوماندانانو په نښه کولو لپاره یو شمېر هوايي بریدونه وکړل. غزه د اسلامپالې ډلې حماس تر کنټرول لاندې ده.

نتنيانو زیاته کړې چې د حماس پر ضد د اسراییلي کمپاین څخه "زیات منصفانه یا اخلاقي کار بل نشته".

اسراییلو پرون په هوايي بریدونو کې د حماس د یو مشر سیاسي شخصیت کور په نښه کړ او په غزه ښار کې یې یوه دنګه وداني تباه کړه پکې د نړیوالو رسنیو دفترونه هم وو.

فلسطینیان وايي د مې په ۱۰ مه په غزه کې شروع شوې جګړه کې تر اوسه د ۴۱ ماشومانو پشمول ۱۴۵ کسان وژل شوي او ۱،۱۰۰ ژوبل دي. بلخوا اسراییلو د دووو ماشومانو په ګډون د ۱۰ کسانو د وژنې رپورټ ورکړی دی.

د ملګرو ملتونو عمومي منشي انتونیو ګوتېرش په دې شخړه کې د ولسي خلکو په مرګ ژوبله د مایوسۍڅرګندونه کړې او وايي په هغه ودانۍ د اسراییلي برید ډیره خفه کړی چې پکې د رسنیو دفترونه وو.

دا راز د امریکا ولسمشر جو بایډن هم د مې ۱۵ مه له نتنیاهو او فلسطیني ولسمشر محمود عباس سره خبرې کړي دي او په دوی یې د شخړې د ارامه کولو ټینګار کړی دی.

د مې پر ۱۶مه د صوبو او ښارونو ترمنځ ټرانسپورټ بحالېږي

په دې بندیز کې شخصي موټرونه او د بي ار ټي چټک بسونه نه دي شامل.

د پاکستان وفاقي حکومت د صوبو او ښارونو ترمنځ پبلک ټرانسپورټ د مې له ۱۶مې بحالوي.

دا پرېکړه د مې پر ۱۵مه د پلانونو او پرمختیايي چارو وفاقي وزير اسد عمر په مشرۍ کې د کورونا وايرس د څار قامي ادارې ( نيشنل کمانډ اينډ اپرېشن سنټر) غونډه کې وشوه.

په غونډه کې د اختر په ورځو کې د کورونا وايرس مخنیوي احتياطي لارښوونو عملي کېدو جاج واخیستل شو. حکومت د اختر ورځو کې ټولبند او د صوبو ترمنځ په تګ راتګ بندیز لګولی وو. په غونډه کې فيصله وشوه چې د مې له ۱۶مې به خلک کولای شي چې د صوبو او ښارونو ترمنځ سفر وکړي.

په غونډه کې دا فيصله هم وشوه چې د مې له ۱۷مې به مارکيټونه او دوکانونهله سهاره د شپي تر اتو بجو پورې خلاص وي. د مې له ۱۷مې به په سرکاري او شخصي دفترونو کې کار د معمول مطابق وي، په دفترو کې به حاضري ۵۰ فيصده وي او ۵۰ فيصده به له کوره کار کوي.

د کورونا وايرس د څار قامي ادارې راتلونکې غونډه به د مې پر ۱۹مه کېږي او د راتلونکې لايحه عمل فيصله به کوي.

له طالبانو د جلا شوې ډلې مرستیال ملا عبدالمنان نیازی ومړ

ملا عبدالمنان نیازی

له طالبانو د یوې جلا شوې ډلې مرستیال، ملا عبدالمنان نیازی د کابل په یوه روغتون کې مړ شوی.

د هرات یوه سیمه يیز چارواکي د مې پر ۱۵مه د نوم نه خپرولو په شرط مشال راډیو سره په خبرو کې د دې خبر تصدیق کړی دی.

د نیازي د کورنۍ غړي هم دا خبر تاییدوي.

عبدالمنان نیازی تېره اوونۍ په یو برید کې له سخت ټپي کیدو وروسته لومړی د هرات حوضوي روغتون او وروسته کابل ته ولېږدول شو.

د هرات د سیمه يیزو چارواکو په وینا، نیازی د نامعلومو وسله والو په برید کې ټپي شوی و.

د ملا محمدرسول په مشرۍ له طالبانو جلا شوې ډلې په ۲۰۱۵ز کال کې خپل موجودیت اعلان کړ.

د افغان جګړې ښکیلې خواوې دې دایمي اوربند ته هڅې روانې وساتي: قریشي

قریشي د مې پر ۱۴مه له خپل افغان سیال محمد حنیف اتمر د اوربند هرکلی هم وکړ. 

د پاکستان د بهرنیو چارو وزیر شاه محمود قریشي وایي، د افغانستان د جګړې ښکیلې خواوې باید دایمي اوربند ته هڅې روانې وساتي.

قرېشي د مې پر ۱۴مه له خپل افغان سیال محمد حنیف اتمر سره د ټیلېفوني خبرو پرمهال د اختر د درې ورځني اوربند هرکلی هم وکړ.

د پاکستان د بهرنیو چارو وزارت د خبرپاڼې له مخې قریشي ویلي: "بین الافغاني خبرو جامع او هر اړخیز سیاسي جوړجاړي ته تاریخي فرصت برابر کړی دی."

پاکستان د سولې په خبرو کې افغان چارواکو ته د همکارۍ ډاډ ورکړی، خو افغان لوری د دوی په خبرو بې باوره دی.

د اختر په لومړۍ ورځ د افغانستان د ملي امنیت سلاکار حمدالله محب ننګرهار کې یوې غونډې ته وویل، پاکستان یې په چارو کې لاسوهنه کوي.

نوموړي دا خبره څو ورځې وروسته تر هغې وکړه چې د پاکستان پوځ مشر قمر جاوېد باجوه او بریتانوي سیال یې کابل ته ګډ سفر درلود چې هدف یې د کابل او اسلام اباد د اړیکو ښه والی بلل شوی دی.

هوايي بمباريو او راکټي بريدونو په غزه کې سلګونه کسانو ته مرګژوبله اړولې

دا په داسې حال کې ده چې د نړيوالو لخوا پر دواړو خواو د پنځه ورځنۍ جګړې د درولو غږونو باجود د مرګونو شمېر مخ په زياتېدو دی.

د اسراییلو او فلسطینیانو ترمنځ د پنځه ورځنۍ جګړې د درولو لپاره د نړیوالو غږونو باجود جګړه دوام لري او د مرګ ژوبلې شمېره مخ په زیاتېدو ده.

راپورونه وايي، اسرایيلو د توپونو او هوايي بريدونو سره په غزه سخته ګوله باري کړې خو بيا هم د فلسطيني وسله والو لخوا د تازه راکټي حملو په درولو کې ناکامه شوی دی.

په غزه کې د صحت چارواکي وايي چې د مې پر ۱۴مه په ۴۰ منټه عملياتو کې ۱۳ فلسطنيان ووژل شول چې پکې يوه مور او د هغې درې بچي هم شامل دي چې د خپل ړنګېدلي کور له ملبې يې مړي راويستل شول.

د اسرایيلي پوځ وياند وايي چې ځواکونو يې په دې جنګ کې ۱۶۰ جنګي جازونه کارولي، د دې ترڅنګ له غزې پټۍ بهر په ټېنکونو او توپخانو سره هم ډزې کوي.

د فلسطين د صحت څانګه وايي چې په ياده جګړه کې د وژل شویو فلسطنيانو شمېر ۱۲۲ ته رسېدلی چې پکې ۳۱ ماشومان او ۲۰ ښځې هم شاملې دي او ۹۰۰ کسان ژوبل شوي دي.

وسله والې ډلې حماس او اسلامک جهاد پخلی کړی چې د هغوی ۲۰ کسان وژل شوي خو اسرایيل بيا دغه شمېر زيات ښايي. په اسرایيلو کې هم د يو شپږ کلن ماشوم او يو پوځي سرتېري په ګډون اووه کسه مړه شوي دي.

د اسرایيلو او فلسطين ترمنځ وروستی تاو تريخوالی د تېرې اوونۍ په اخره کې د بېت المقدس د الاقصی جومات په کمپاونډ کې د نا ارامۍ له وجې رامنځته شوی دی.

دا جومات د مسلمانانو او يهودانو دواړو لپاره مقدس دی.

د هلمند پخوانی والي جنرال عبدالنبي الهام ومړ

د هلمند پخوانی والي جنرال عبدالنبي الهام

د هلمند پخوانی والي جنرال عبدالنبي الهام د کرونا ناروغۍ له کبله ومړ.

دا خبره د هلمند د قبایلو د چارو رییس نوید نظري په خپل فیسبوک لیکلې ده.

ځینو نورو چارواکو او خبریالانو هم د جنرال الهام د مړینې خبر خپور کړی دی.

جنرال عبدالنبي الهام چې پینځه ورځې دمخه د هلمند له ولایته ګواښه کړای شوی وو په کابل کې د کرونا ناروغۍ په خاطر په یوه روغتون کې بستر و.

د سیمه ییزو ارګانونو خپلواکې ادارې د جنرال الهام پر ځای محمد ولي علیزی د هلمند والي ټاکلی دی.

ولس دې په اختر کې د کورونا وایرس مخنیوي لارښوونې عملي کړي: عمران خان

دواړو مشرانو دا خبره د مې پر ۱۳مه د اختر مبارکۍ په جلا جلا پیغامونو کې کړې. ارشیف- انځور

د پاکستان وزیراعظم عمران خان او ولسمشر عارف علوي پر ولس غږ کړی دی چې د اختر په ورځو کې دې د کورونا وایرس ناروغۍ مخنیوي لپاره پر احتیاطي لارښوونو کلک عمل وکړي.

دواړو مشرانو دا خبره د مې پر ۱۳مه د اختر مبارکۍ په جلا جلا پیغامونو کې کړې.

په عین حال کې د وبا په اړه د ارقامو حکومتي ووبپاڼې مې پر ۱۴مه ویلي چې په تېرو ۲۴ ساعتونو کې په پاکستان کې د کورونا وایرس ۲،۵۱۷ تازه پېښې ثبت شوي چې ورسره له تېر کال راهیسې د ټولو پېښو رسمي شمېر ۸۷۳،۲۲۰ ته رسېدلی دی.

ووبپاڼه وايي، کووېډ-۱۹ ناروغۍ په هغه هېواد کې ټول ۱۹،۳۸۴ کسان مړه کړي خو ورڅخه ۷۸۰،۴۳۸ کسان رغېدلي هم دي.

د امریکا د تېلو لویه نللیکه بیا فعاله شوې

دا نللیکه شاوخوا ۹،۰۰۰ کیلیومیټره اوږده ده او په ټیکسس کې د خلیج د تېلو پاکولو له کارخانو څخه نیویارک ته پېټرول، ډیزل او د تېلو نور قسمونه لېږدوي.

دا نللیکه د انټرنېټي برید له وجې له شپږو ورځو راهیسې بنده وه. د نللیکې د بندېدو له وجې د هېواد په ختیځ کې د تېلو رسولو په اړه اندېښنې پیدا شوې وې.

د کلونییل نللیکې چارواکو د مې پر ۱۲مه د فعالیت تر پیلېدو وروسته وویل، لا هم وخت ته اړتیا لري چې د تېلو د رسولو نظام پخواني حالت ته ستون کړي.

دا نللیکه شاوخوا ۹،۰۰۰ کیلیومیټره اوږده ده او په ټیکسس کې د خلیج د تېلو پاکولو له کارخانو څخه نیویارک ته پېټرول، ډیزل او د تېلو نور قسمونه لېږدوي.

امریکايي ولسمشر جو بایډن د مې پر ۱۰مه په مستقیمه توګه پر کرېملېن له تور پورې کولو ډډه وکړه خو ویې ویل چې روسیه یې پر نللیکې د انټرنېټي حملې لپاره تر یوه حده پورې مسووله ده.

وسله والو د کابل ولایت په کلکان ولسوالۍ کې د برېښنا ستن الوځولې

د کابل کلکان ولسوالۍ کې الوځول شوې د برېښنا ستن

افغان چارواکي وايي، وسله والو د کابل ولایت په کلکان ولسوالۍ کې له ازبکستانه د درامدېدونکې برېښنا یوه ستن په بم الوځولې ده چې له وجې یې کابل ښار ته د بجلۍ رسد ټکنی شوی.

د افغانستان د برېښنا شرکت د پروان حوزې مشر روح الله ساجد مشال راډیو ته وویل، تېر ماښام شاوخوا اته نیمې بجې وسله والو ستنې ته بارود ایښي ول.

د ده په خبره، د چاودنې له وجې د پلازمېنې په ګډون د اووه ولایتونو برېښنا پرې شوې. د حملې ذمه واري چا نه ده منلې.

روانه اوونۍ هم په کلکان ولسوالۍ کې وسله والو د برېښنا دوه ستنې الوځولې وې چې لا یې هم د رغونې چارې په بشپړه ټوګه پای ته نه دي رسېدلې.

د افغانستان او ایران ولسمشرانو پر افغان سوله او وروستیو پېښو غږېدلي

د افغانستان ولسمشر اشرف غني او یوشمېر نور افغان چارواکي د ایران له ولسمشر حسن روحاني سره د ټیلیفوني خبرو پر مهال

د افغانستان او ایران ولسمشرانو پر افغان سوله او په دې هېواد کې د وروستیو ترهګريزه پېښو په اړه ټیلېفوني خبرې وکړې.

د ارګ په یوه اعلامیه کې چې بېګا خپره شوه راغلي چې د ایران ولسمشر د خپل حکومت او خلکو په استازیتوب د وروستیو ترهګریزو پېښو په اړه خپله غمرازي او خواخوږي وښوده.

د ارګ اعلامیه زیاتوي چې محمد اشرف غني او حسن روحاني په افغانستان کې د سولې پر هڅو، سیمه‌ییزې همکارۍ او د افغانستان او ایران ترمنځ د اړیکو د پراختیا په اړه بحث وکړ.

افغانستان په تېرو څو وروستیو ورځو کې د خونړیو پېښو شاهد و.

تېره شنبه د کابل دشت برچي سیمه کې پر سیدالشهدا ښوونځي موټر بم او پرله‌پسې چاودنو شاوخوا ۸۵ نجونې زده‌کوونکې ووژلې او له ۱۰۰ زیات ټپيان دي.

د کابل د سید الشهدا د ښوونځي د بیارغونې چارې پیل شوي

د کابل د سید الشهدا ښوونځی

د افغانستان د ملي پراختیا شرکت وایي، د افغان ولسمشر محمد اشرف غني د ځانګړي حکم پر بنسټ یې د کابل د سید الشهدا د ښوونځي د بیارغونې چارې پیل کړي.

دغه شرکت پر خپل فیسبوک پاڼه کې لیکلي دي چې د ښوونځي د بیارغونې چارې به ژر بشپړې او د زده کوونکو پر مخ به یو وار بیا پرانیستل شي.

سید الشهدا ښوونځی چې د کابل په دشت برچي سیمه کې موقعیت لري، د روانې شنبې په ورځ پرې موټر بم خونړي حمله وشوه چې له امله یې د ښوونځي له سلو ډېرو زده کوونکو ته مرګ ژوبله واوښته.

د ملي پراختیا شرکت وایي چې اوس مهال د دغه ښوونځي په اتو بلاکونو کار روان دی او ډېر ژر به بشپړ شي.

افغان چارواکي وايي، وسله والو د میدان وردګ نرخ ولسوالۍ نیولې

د هېواد مرکزي او جنوبي ولايتونو ته يو شمېر مهمې لويې لارې له نرخ ولسوالۍ تيرېږي.

افغان چارواکي وايي چې طالبانو له کابله په ۴۰ کلومېټرۍ کې پراته له ستراتژيکي پلوه مهمه ولسوالۍ په داسې حال کې نيولې چې تېره اوونۍ طالبان د اختر لپاره د دريو ورځو په اوربند سلا شول.

د افغانستان کورنيو چارو وزارت وياند طارق ارین نن (د مې پر ۱۲ مه) ویلي دي چې امنيتي او دفاعي ځواکونو د نرخ ولسوالۍ له پوليسو هېډاکواټرو تاکتکي شاتګ وکړ.

دا په داسې حال کې ده چې له جنګ ځپلي افغانستانه امريکايي او نړيوال ځواکونه روان دي.

د دفاع وزارت يو وياند فواد امان ویلي دي:"د کمانډو ځواکونو بيا ځای پر ځای کېدل پر لاره دي چې دارنګ ولسوالۍ بېرته خپلو لاسو ته راوړي."

د هېواد مرکزي او جنوبي ولايتونو ته يو شمېر مهمې لويې لارې له نرخ ولسوالۍ تيرېږي.

میدان وردګ چې پکې ياده ولسوالۍ ده، د دې او د ګاوندي ولايت لوګر غټې پټۍ يې د کلونو پورې د طالبانو په کنټرول کې وې يا يې د دې لپاره جګړه کوله او وسله والو به کابل ته د رسېدو او بريدونو لپاره دا لارې کارولې.

نرخ ولسوالۍ پر داسې وخت نيول شوی چې طالبانو او افغان حکومت د وړوکي اختر لپاره درې ورځنی اوربند اعلان کړی.

اروپایي ټولنه د ازاد تګ راتګ لپاره د کورونا وایرس تصدیق پاڼه جوړوي

ارشیف، د کورونا یو شمېر ناروغان

اروپایي ټولنه تمه لري چې تر یوې میاشتې به د کورونا داسې تصدیق پاڼه راوباسي چې لرونکي یې د اي یو ترمنځ ازاد تګ راتګ وکړای شي.

دا تصدیق پاڼې هغو کسانو ته ورکول کېږي چې د کورونا واکسین یې بشپړ کړی وی، مخکې له دې وبا رغېدلی وي او یا یې هم د کورونا معاینه منفي وي.

دې تصدیق پاڼې ته د هغو هېوادونو له خوا هڅې ډېرې شوي چې پر سېلګرۍ صنعت ولاړ دي.

دا کار به وکړای شي چې د اوړي رخصتیو پرمهال د سېلانیانو تګ را تګ اسانه او هغه ملي بندیزونه لېرې کړي چې سفرونه یې سخت کړي دي.

د اروپایي کمېسیون مرستیال ماروس سفچوویچ په سې شنبه د دغې ټولنې د بهرنیو چارو وزیرانو له غونډې وروسته وویل، دا کار یې خپلو وګړو ته یو لومړیتوب دی او د اوړي له رخصتیو مخکې به یې پيل کړي.

د اسراییلو او فلسطينيانو ترمنځ نښتو کې سلګونه کسانو ته مرکژوبله اړولې

اسرایيلو په غزه کې د حماس ځايونه په نښه کړل او دغه وسله والې ډلې پر اسرایيل راکټونه وويشتل.

د فلسطینیانو او اسرايلو ترمنځ نښتې بېګا زیاتې شوې دي.

اسرایيلو په غزه کې د حماس ځايونه په نښه کړل او دغه وسله والې ډلې پر اسرایيلو راکټونه وويشتل.

په غزه کې روغتيايي چارواکو د مې پر ۱۲مه وويل چې دوه ورځې مخکې د شخړې تر زیاتېدو وروسته د ۱۰ ماشومانو په ګډون لږ تر لږه ۳۰ فلسطينيان وژل شوي او ۲۰۰ ټپیان شوي دي.

بلخوا د اسرایيلو پوځ ويلي چې په غزه کې يې د ۱۴۰ هدفونو په نښه کولو سره یې ۲۰ وسله وال وژلي.

په همدې حال کې د غزې وسله والو ډلو حماس او اسلامي جهاد پر اسرايیلو د سلګونو راکټونو په توغولو سره اووه اسرايليان وژلي او ګڼ نور یې ټپیان کړي دي.

وسله والې ډلې، حماس ويلي چې دوی د اسرایيلو له جارحيته د الاقصی جومات ساتنه کوي چې پکې له تېرو څو ورځو راهیسې د اسرایيلي پوليسو او فلسطينيانو ترمنځ په نښتو کې په سلګونو کسان ټپیان شوي.

د پکتیا پخوانی امنیه قوماندان اخترمحمد شاهین ووژل شو

د پکتیا پخوانی امنیه قوماندان اختر محمد شاهین

د پکتیا پخوانی امنیه قوماندان اختر محمد شاهین له درېیو نورو کسانو سره د خوست تڼیو ولسوالۍ اړوند سیمه کې د وسله والو په یوه کمين کې ووژل شو.

د خوست امنیه قوماندان پاسوال محمد داود امین مشال راډیو ته وویل، چې پېښه د تڼیو ولسوالۍ په یوه لیرې پرته سیمه د للمي کوټکي په ژۍ کلي کې شوې ده.

نوموړي وویل، اخترمحمد شاهین سره ناست کسان په کرولا ډوله موټر کې وو، چې د وسله والو له کمین سره مخامخ شوي او په وژل شویو کسانو کې د قومندان شاهین تره او یو ۹ کلن زوی شامل دي.

د محمد داود امین په وینا، چې د وژل شویو جسدونه عدلي طب ته لیږدول شوي او پېښه تر څیړنې لاندې ده.

اخترمحمد شاهین څو کاله په خوست کې د ولایتي ځواکونو قومندان وو، چې بیا وروسته د پکتیا امنیه قوماندان شو.

نوموړي په پکتیا کې د څو میاشتنۍ قوماندانۍ وروسته په خپله له دندې استعفاء ورکړې وه.

نور وښیئ

ځانګړې پاڼې

له موږ سره اړیکي

XS
SM
MD
LG