پاکستاني چارواکي وايي، د سېشنبې په ورځ یې د خیبر پښتونخوا ټانک سیمې ته نژدې د پاکستانیو طالبانو دوه غړي وژلي دي.
په ډېره اسماعیل خان کې د استخباراتي ادارې یو چارواکي د نوم نه خپرولو په شرط مشال راډیو ته وویل چې د دې وسله والو تعلق د تحریک طالبان پاکستان د عصمت الله شاهین بېټني له ډلې سره وو.
د دې چارواکي په وینا، دا پېښه هغه مهال وشوه چې دوی په دېوانه بابا زیارت کې پر یو مورچه برید وکړ.
د پاکستان پوځ عامه اړیکو څانګې هم په یو خبرپاڼه کې د دې خبرې پخلی کړی دی.
طالبانو لا په دې اړه څه نه دي ویلي.
