د لاسرسي ځای

تازه خبر

امریکا: ایران په یمن کې حوثي یاغیانو ته توغندي ورکوي


ځېنو لوړپوړو امریکايي چارواکیو پر ایران تور پورې کړی چې یمنیو یاغیانو ته یې توغندي ورکړي چې روانه اوونۍ یې پر امریکايي بحري بېړیو یو شمېر بریدونه کړي.

د سېنېټ پوځي خدماتو کمېټۍ مشر جان مکېن بېګا وویل، ښايي ایران یاغیانو ته توغندي ورکړي وي. تر دې مخکې د امریکا دفاع وزارت نوموړي ته پر امریکايي بېړیو د ناکامو بریدونو په اړه معلومات ورکړل.

مکېن د پېنټاګان هغه اقدام تایید کړ چې د بریدونو په ځواب کې یې د حوثي یاغیانو تر استعمال لاندې د ګرځنده راډرانونو پر اهدافو کروز توغندي ورولي.

ده وویل، ((د امریکا بحري ځواک قوي پیغام ورکړی)) چې تېری به و نه زغمي. د امریکا بهرنیو چارو وزارت ویاند جان کېربي هم روانه اوونۍ وویل چې (حوثي یاغیانو ته توغندي ایران ورکړي ول.)

ده البته دا هم وویل چې ممکنه ده حوثیانو ځینې توغندي د یمني حکومت له پوځه هم تر لاسه کړي وي. ایران په ښکاره د اهل تشیع حوثیانو ملګری دی خو هغوی ته له وسلو ورکولو انکار کوي.

د مشال ځانګړې پاڼې

XS
SM
MD
LG