افغان ولسمشر محمد اشرف غني وایي افغان پلاوی په وارسا کې د ناټو د غړو هېوادونو له کنفرانس څخه ډک لاس هیواد ته ستون شوی دی.
ښاغلي غني د دوشنبې په ورځ په کابل کې په یوه خبري کانفرانس کې وویل، له وارسا څخه یې ټولې هیلې ترلاسه شوې.
ښاغلي غني همدارنګه وویل نړیوالې ټولنې ژمنه کړې چې د افغانستان امنیتي ځواکونه به په اوسنیو امکاناتو تر 2020 کاله پوري تمویل او تجهیز کړي.
ولسمشر د یوې پوښتنې په ځواب کې وویل، له افغانستان سره د نړیوالو مرستې د هغو اقداماتو په اساس وشوې چې حکومت یې کړي دي.
د ناټو د مشرانو ناسته د جولای په اتمه او نهمه نېټه د پولینډ په پلازمینه وارسا کې ترسره شوه.
