د لاسرسي ځای

تازه خبر

خبرونه

افتاب مسیح ۲۳ کاله وروسته په دار کړل شو

د ملګرو ملتونو او د بشري حقونو ډلو لخوا د غوښتنو باوجود په پاکستان کې نن سهار وختي يو کس ته پانسي ورکړل شوي، چې د پينځلسو کالو په عمر کې د قتل په تور د مرګ سزا ورکړل شوی وه.

آفتاب بهادر مسيح ته په ۱۹۹۲م کال کې د دريو کسانو د قتل په تور د مرګ سزا ورکړل شوی وه خو د بشري حقونو ډلو ريپرايو ويلي دي.

هغه دوه شاهدان چې د بهادر پرضد يې ګواهې ورکړي وه له هغې مودي راهېسي وايي چې په دوی تشدد شوی وو. د بهادر وکيلانو ويلي دي چې په نوموړي هم د جرم منلو لپاره تشدد شوي وو.

په ۱۹۹۲ کال کي په پاکستان کې د ۱۵ کلن لپاره هم د مرګ سزا وه، خو وروسته په ۲۰۰۰ م کال کي ورته د اتلس کلنۍ حد وټاکل شو.

د لاهور ښار د جيل یو چارواکي وایي، بهادرد سېشنبې پر ورځسهار له پانسي نه مخکې جړل او ویل چې بې ګناه دی او په زندان کې یې د خپلې بې ګناهۍ لپاره مقالې هم لیکلې دي.

بلخوا نن چارشنبه سهار د پنجاب صوبې په ساهیوال او فیصل اباد په جیلونو کې هم دوه کسانو ته پانسي ورکړل شوي ده.

په پاکستان کې د بشري حقونو کمیشن وايي چې تر اوسه پورې یو سل درې پنځوس کسانو ته پانسيان ورکړل شوی دي.

د نننۍ ورځې ټول خبرونه وګورئ

د پاکستان بهرنیو چارو وزیر استنبول ته تللی

د پاکستان د بهرنیو چارو وزیر شاه محمود قرېشي. د ارشیف انځور

د پاکستان د بهرنیو چارو وزیر شاه محمود قرېشي د اپرېل پر ۲۳مه په دوه ورځني رسمي سفر استنبول ته ورسېد.

نوموړی هلته د پاکستان، افغانستان او ترکیې په ګډه غونډه کې ګډون کوي.

قریشي به د اپرېل پر ۲۴مه په درې اړخیزه غونډه کې د افغانستان د بهرنیو چارو له وزیر حنیف اتمر او له خپل ترکي سیال مولو چاوشوغلو سره د افغانستان د سولې په بهیر کې پر پرمختګونو وغږېږي.

د افغانستان د بهرنیو چارو وزارت مرستیال ویاند حامد تهذیب د اپرېل پر ۲۲مه مشال راډیو ته وویل، "په پام کې ده په دې غونډه کې د افغانستان د اسلامي دولت او طالبانو ترمنځ د خبرو د بیا پیل، د سولې بهیر د ملاتړ لپاره د اجماع د پیاوړي کولو او په دې برخه کې د پاکستان او ترکیې د ونډې او همداراز د درېواړه هېوادونو ترمنځ د اړیکو پر پیاوړتیا بحث وشي."

ټاکل شوې وه چې د افغانستان سولې هڅو د سمون لپاره د اپرېل پر ۲۴مه نېټه په استنبول کې یوه مهمه غونډه جوړه شي، خو دا غونډه تر هغې وروسته طالبانو پکې له ګډون څخه ډډه وکړه.

ترکيو چارواکو ویلي دي چې د افغانستان د سولې په اړه نړیواله غونډه ښايي تر کمکي اختر وروسته جوړه شي.

امریکا پر خبریال ابصار عالم پر برید اندېښنه ښوولې

ابصار عالم د اپرېل پر ۲۰مه د کور مخې ته په برید کې ژوبل شو - د ارشیف انځور.

د امریکا د بهرنیو چارو وزارت پر پاکستاني خبریال ابصار عالم پر برید "ژوره اندېښنه" ښوولې ده.

د اپرېل پر ۲۲مه د بهرنیو چارو وزارت پر ټوېټر په بیان کې لیکلي، د رسنیو ازادي او د خبریالانو خوندیتوب د باخبره ولس لپاره خورا مهم دي.

پر نومیالي خبریال ابصار عالم د اپرېل پر ۲۰مه په اسلام اباد کې د هغه کور مخې ته برید شوی وو چې پکې هغه ژوبل شو.

د امریکا د بهرنیو چارو وزارت په بیان کې د عالم د ژر ښه کېدو هیله ښوول شوې او له چارواکو غوښتل شوي چې په پېښه کې ککړ کسان ژر تر ژره ونیسي.

د پاکستان د کورنیو چارو وزیر شیخ رشید تر برید وروسته ویلي ول چې د اسلام اباد د پولیسو مشر ته یې امر کړی چې د پېښې پلټنې وکړي او په برید کې ککړ کسان ژر تر ژره ګرفتار کړي.

د رسنیو او د بشري حقونو کورنیو او نړیوالو ادارو او فعالانو هم پر عالم برید غندلی وو.

ابصار عالم د اېسټبلېشمنټ ضد نظرلرونکي په نوم پېژندل کېږي او په ولسي چارو کې د پوځ پر لاسوهنه نیوکې کوي.

دا هغه تور دی چې د پاکستان پوځ په بیا بیا رد کړی او ویلي یې دي چې د هېواد په سیاسي چارو کې هېڅ مداخله نه کوي.

روسیه: نوالني په خپل ملاتړ مظاهرې ستایلې دي

په مسکو کې پولیسو یو مظاهره کوونکی ګرفتار کړی. د ۲۰۲۱ز د اپرېل ۲۱مې انځور.

د روسيې اپوزيشن مشر الېکسیې نوالني د هغه د خوشې کولو لپاره په ټول هېواد کې احتجاجي مظاهرې ستایلې دي او هیله مندي یې ښوولې ده.

نوموړی د مارچ له ۳۱مې راهیسې په زندان کې د نه خوړلو په احتجاج دی او رپورټونه وايي، روغتیايي حالت یې د اندېښنې وړ دی.

نوالني په پښو او ملا کې د درد شکایت کاوه او له ډاکترانو سره یې د لیدو غوښتنې پوره کېدو لپاره د نه خوړلو اعتصاب پیل کړ.

نوالني د اپرېل پر ۲۲مه پر خپله انسټاګرام پاڼه د اپرېل ۲۱مې ولسي احتجاجونه د روسیې ازادي وبلله.

روسيو پولیسو د مظاهرو پر مهال له ۱،۷۰۰ څخه زیات کسان نيولي دي چې پکې لږ تر لږه ۱۰ خبریالان هم شامل دي.

د بښنې نړيوال سازمان ايمنستي انټرنیشنل د مظاهره چيانو او خبریالانو ګرفتاري پر بنیادي ازاديو یو ګوزار بللې.

نوالني چې په جنورۍ کې له جرمني روسیې ته ستون شو نو پولیسو د مسکو پر هوايي ډګر ونیوه او بیا یې زنداني کړ.

په عين حال کې د اروپا پارلېماني شورا پر روسیې غږ کړې چې نوالني دې سمدستي خوشې کړي.

چېک ښايي د روس ګڼ سفارتکاران وباسي

په داسې حال کې چې په مسکو کې د چېک سفارت ته د کار لپاره د ۲۰ کارکوونکو د ستنولو په اړه ټاکلی مهلت ختم شوی، په پراګ کې د روسیې له سفارته د ګڼو کارکوونکو د ایستلو ممکنه وخت رارسېدلی دی.

پراګ له مسکوه غوښتي ول چې هغه چېکي ډېپلوماټان کار ته پرېږدي چې په وروستیو کې د روسیې له لوري د ځواب په توګه ایستل شوي. خو د اپرېل پر ۲۲مه چې د پېښور له وخت سره سم د ماسپښين پر درو بجو د پراګ د ضرب الاجل وخت پای ته ورسېد نو یوازې هغه مهال مسکو په ډاګه وویل چې مهلت ورته د ((منلو وړ نه دی.))

په سمدستي توګه پراګ د خپلو اقداماتو په اړه څه نه دي ویلي خو د چېک جمهوریت د بهرنیو چارو نوي وزیر یعقوب کولهانېک له لېدوفکي ټکی څې زیډ رسنۍ سره په مرکه کې چې د اپرېل پر ۲۱مه ناوخته خپره شوې، ویلي که مسکو ضرب الاجل له پامه وغورځاوه نو له روسي سفارته به شاوخوا ۶۰ کارکوونکي وباسي.

د دواړو هېوادونو ترمنځ ترینګلتیا پر ۲۰۱۴ز کال د چېک جمهوریت د وسلو په یوه زېرمتون کې په چاودنه کې د مسکو د ککړتیا د تور له وجې پیدا شوې.

د اپرېل پر ۱۹مه، چېکي حکومت ۱۸ روسي ډېپلوماټان استخباراتي کارکوونکي وبلل او ورته یې له هېواده د وتلو وویل. د دې په ځواب کې روسیې په مسکو کې له چېکي سفارته ۲۰ کارکوونکي وایستل. چېکی حکومت وايي، د روسیې د دې سطحې اقدام حیرانه کړ چې په وینا یې، په مسکو کې یې د سفارت کار خورا زیات اغېزمن کړی.

د چېک جمهوریت تر تورونو وروسته له یو بله د غچ اخیستو اقدامات، په ۱۹۸۹ز کال کې په چېک جمهوریت کې د کمیونېسټانو د واکمنۍ له ختمېدو راهیسې د پراګ او مسکو ترمنځ تر ټولو لویه لانجه بلل کېږي.

په منځني اروپا کې پروت چېک جمهوریت د ناټو غړی وړوکی هېواد دی چې دې لانجې د مسکو او غرب ترمنځ د زیاتېدونکې ترینګلتیا په مرکز بدل کړی.

پاکستان کې کورونا وبا، ۹۸ نور کسان وژلي

د پاکستان منصوبه بندۍ وزير اسد عمر وايي، په پاکستان کې د وايرس برتانوۍ ډول په تېزۍ سره خپرېږي.

په پاکستان کې کورونا وایرس ناروغۍ په تېر یو شواروز کې نور ۹۸ کسان مړه کړي چې ورسره په دې هېواد کې د دې ناروغۍ له کبله مړو شویو ټوله شمېره ۱۶ زره ۶۹۸ ته ورسېده.

د کورونا په اړه د پاکستان حکومتي ویب پاڼې تر مخه په تېر شواروز کې نور پینځه زره او ۸۵۷ کسانو کورونا شوي دي چې ورسره د ټولو ناروغانو شمېر څه د پاسه اووه لکه او ۷۸ زره ورسېده. خو په دې هېواد کې له شپږو لکو او ۷۶ زرو څخه زیات کسان له کورونا رغېدلي هم دي.

دا راز د کورونا نړیوالې شمېرې راټولوونکی امریکايي جان هاپکینز پوهنتون وايي، په ټوله نړۍ کې د کورونا ناروغانو شمېر ۱۴ کروړه، ۳۴ لکه او څه د پاسه ۸۸ زرو ته رسېدلی چې پکې یې څه د پاسه ۳۰ لکه او ۵۵ زره مړه کړي خو له اتو کروړو، ۲۲ لکو او اووه زرو څخه زیات بیرته هم له دې رنځه رغېدلي دی.

هند کې د کووېډ- ۱۹ نویو پېښو جهاني رېکارډ

هند کې د ښخولو او سوځولو په ځایونو کې د مړو د زیاتوالي داسې ښکاري چې د کوېډ- ۱۹ له کبله د خلکو د مړینې شمېر له رسمي شمېره زیات دی.

هند د اپرېل پر ۲۲مه د ۳۱۴،۸۳۵ کسانو د کورونا کېدو خبر ورکړ چې دا د نړۍ پر سطح په ۲۴ ساعتونو کې د مثبتو پېښو تر ټولو لوی شمېر دی.

د وبا دا لویه دویمه څپه د ۱،۳ اربه اوسېدونکو هېواد د جهاني وبا په مرکز بدلوي.

په هند کې په ۲۴ ساعتونو کې کووېډ-۱۹ ناروغۍ ۲،۱۰۴ کسان وژلي چې ورسره په یوه شواروز (شپه او ورځ) کې د مړو شمېر هم رېکارډ کچ ته لوړ شو.

د هېواد په روغتونونو کې اکسیجن په ختمېدو دی او هسپتالونه د ځای نه لرلو له وجې ګڼ ناروغان ستنوي.

ځايي رسنیو د طبي سامانونو د لوټلو او د کورنیو له لوري له مړو څخه د اکسیجن سېلېنډرونو اخیستو او خپلو ناروغانو ته د لګولو د پېښو خبرونه ورکړي.

هند کې د مړیو سوځولو لپاره لرګي نه ملاوېږي
تم شئ

هېڅ میډیايي سرچینه اوس نشته

0:00 0:02:27 0:00

هند چې د نړۍ دویم تر ټولو زیات نفوس لرونکی هېواد دی پکې تر اوسه په وایرس د وړجنو کسانو رسمي شمېر ۱۵،۹ میلیونه ته رسېدلی او د وژلیو رسمي شمېر ۱۸۵،۰۰۰ دی، خو له دې ارقامو ښايي د کړکېچ د اصلي حالت پته و نه لګي.

تر امریکا وروسته په هند کې د کورونا وایرس تر ټولو زیاتې پېښې ثبت شوې دي.

ځايي رسنۍ، رویټرز اژانس او فنانشل ټایمز ورځپاڼه وايي، د هند یو شمېر ښارونه د جسدونو د سوځلو او ښخولو شمېر له کووېډ-۱۹ څخه د مړو شویو له رسمي ارقامو خورا زیات ښيي.

په پلازمېنه دلي کې له هرو درو څخه د یو کس د کووېډ-۱۹ ټېسټ مثبت خېژي چې د وبا د سطحې د لویوالي ښکارندويي کوي.

د هېواد پر سطح د مثبتېدو شرح تر ۲۰ فیصده لږه ټیټه ده.

په نوي دلي کې سخت ټولبند لګېدلی. تر دې مخکې په ځینو نورو ایالتونو او ښارونو کې هم ورته محدودیتونه لګول شوي چې د وایرس د لا زیات خپراوي مخه ونیولای شي.

په شمالي وزیرستان کې دوه تنه په هدفي بریدونو کې وژل شوي

دا راز په شمالي وزیرستان کې سږکال تر اوسه ۱۶ هدفي بریدونه شوي او تیر کال دغه شمېر ۴۶ وو.

پولیسو او ځايي خلکو د اپرېل پر ۲۱مه شپه مشال راډیو ته وویل چې وسله والو د میرامشا تپي سیمه کې ملک محمد ایاز او په میرعلي حیدرخېلو سیمه کې سید غفار په ډزو وژلی دی.

پولیس وايي، بریدګر په تېښه کې بریالي شوي او دوی د نامعلومو کسانو خلاف مقدمې درج کړې دي.

تر دې وړاندې د اپرېل پر ۲۰مه نېټه هم په همځوني سیمه کې یو تن د هدفي برید ښکار شوی وو چې ورسره په شمالي وزیرستان کې په تېرو ۲۴ ساعتونو کې د هدفي بریدونو شمېره درېوو ته ورسېده.

دا راز په شمالي وزیرستان کې سږکال تر اوسه ۱۶ هدفي بریدونه شوي چې پکې د سیمې مشران او ځايي اوسېدونکي په نښه کېږي، پروسږ کال دغه شمېر ۴۶ وو.

پښتون ژغورنه غورځنګ او ځايي خلکو وخت په وخت په احتجاجونو، پرلتونو او جرګو کې له حکومته د هدفي بریدونو مخنیوي غوښتنې کړي دي.

بلخوا په سیمه کې امنیتي چارواکو په وار وار ویلي چې د امنیت ټینګولو لپاره یې کوټلي اقدامات کړي دي.

په ننګرهار کې د ترهګرۍ په تور ۷ کسان نيول شوي

د افغانستان د ننګرهار د رسنیو له دفتره د اپرېل پر ۲۱مه خپره شوې خبرپانه کې ویل شوي چې د ملي امنیت ځواکونو په تېره یوه اوونۍکې د بېلابېلو ترهګریزو بریدونو او جنایي پېښو په تړاو اووه تنه نیولي دي.

خبرپاڼه کاږي چې په نیول شویو کسانو کې یو تن بریدګر داسې هم شامل دی چې غوښتل یې د شینوارو ولسوالۍ په جامع جومات کې ځانمرګی برید تر سره کړي، خو موخې ته تر رسېدو مخکې ونیول شو.

خبرپاڼه زیاتوي چې ځانمرګي برید ته چمتو شوی احمد د خیبر قبایلي ضلعې د لواړګي په مدرسه کې ځانمرګي برید ته چمتو شوی و او د جلال اباد ښار د اوومې ناحیې په مربوطاتو کې نیول شوی دی.

کابل کې موټر بم چاودنې اووه کسان ژوبل کړي

چارواکي وايي، د ۱۵مې ناحیې اړوند شهید څلور لارې ته نېږدې دغې چاودنې شاوخوا ودانیو، دوکانونو او موټرو ته یې زیان اړولی دی.

د افغانستان د کورنیو چارو وزارت، د کابل ښار شهید څلور لارې ته نېږدې په یوه ګاډي له چادونې اووه تنه ژوبل شوي او جوختو ودانیو او ولاړو ګاډو ته یې زیانونه رسولي دي.

د ملي امنیت ریاست یوه سرچینه وایي، برید د ملي امنیت د ځانګړو ځواکونو د حمایوي څانګې پر یوه موټر شوی.

سرچینه د پېښې مسوولیت پر طالبانو اچوي، خو دې ډلې په دې اړه تر اوسه څه نه دي ویلي.

له افغانستانه د بهرنیو ځواکونو خوندي وتلو ته کار کوو: مککنزي

په منځني ختیځ کې د امریکايي پوځیانو عمومي قوماندان جنرال فرانک مککنزي

د امریکا د پوځ یو لوړپوړی قوماندان وایي، له افغانستانه د بهرنیو ځواکونو خوندي او منظمو وتلو ته کار کوي.

په منځني ختیځ کې د امریکايي پوځیانو عمومي قوماندان جنرال فرانک مککنزي وايي: "موږ له خپلو کورنیو ادارو او نړیوالو متحدانو سره په ګډه کار کوو، موږ به له افغانستانه په منظم او خوندي ډول د خپلو ځواکونو او نورو متحدانو د پوځیانو وتلو ته هر ډول اقدامات وکړو."

مککنزي وایي، تراوسه یې د افغانستان له کوم ګاونډي سره موافقه نه ده کړې.

جنرال مککنزي دا خبره د اپرېل پر ۲۰مه د کانګرس غړیو د دې پوښتنې په ځواب کې وکړه چې له افغانستانه د امریکايي پوځیانو له وتلو وروسته به ایا امریکا د ترهګرو د ځپلو لپاره په سیمه کې اډه ولري؟

ده وویل، د ځواکونو له وتلو وروسته به په افغانستان کې د ترهګرۍ ضد عملیات سخت وي، خو بې امکانه به نه وي.

پاکستان کې کورونا وبا، ۱۴۷ نور کسان وژلي

په پاکستان کې د کورونا وايرس ضد واکسين لګولو لړۍ دوام لري. ارشېف-عکس

په پاکستان کې په تېرو ۲۴ ساعتونو کې کووېډ-۱۹ ناروغۍ نور يو ۱۴۷کسان وژلي دي.

دا په داسې حال کې ده چې د اپرېل له لومړۍ نېټې څخه تر نن(د اپرېل ۲۱مې ) سهار پورې شاوخوا ۲،۱۰۰ کسان ترې مړه شوي دي.

د دې ناروغۍ په اړه د پاکستان د صحت وزارت ځانګړې ویب پاڼې د اپرېل پر ۲۱مه لیکلي دي چې له دې سره په ملک کې له کورونا څخه د مړه شویو مجموعي شمېر څه باندې ۱۶،۶۰۰ ته رسېدلی دی.

ویب پاڼه لیکي چې په تېرو ۲۴ساعتونو کې نېږدې ۵،۵۰۰ کسان نور په دې ناروغۍ اخته شوي دي.

په پاکستان کې تر اوسه څه باندې۷،۷۲۰۰۰ کسان په کورونا اخته شوي خو تر شپږ لکه ۷۲۰۰۰ زره زیات ورڅخه جوړ شوي هم دي.

بلخوا د پاکستان د منصوبه بندۍ او پرمختګ وزير اسد عمر د اپرېل پر ۲۱مه په اسلام اباد کې رسنيو ته وويل، په ملک کې د کورونا وايرس په مثبتو کيسونو کې د زياتوالي له کبله حکومت د راتلونکې جمعې ورځې څخه به نوي بنديزونه لګوي چې پکې د لويو ښارونو بندول هم شامل دي.

شمالي وزيرستان کې يو تن په هدفي بريد کې وژل شوی

تر دې وړاندې هم په ياده سيمه کې د هدفي بريدونو پېښې رامخې ته شوي دي.

پولیس او د سيمې خلک وايي، د اپرېل پر ۲۰مه وسله والو د پېښور د شبقدر يو اوسېدونکی چې په ياده سيمه کې به يې کباړ راټولولو په ډزو وواژه او په تېښته کې بریالي شول.

پولیس وايي، د وسله والو خلاف يې مقدمه درجولو وروسته پلټنې پيل کړي دي.

تر دې وړاندې هم په ياده سيمه کې د هدفي بريدونو پېښې رامخې ته شوي دي.

سږ کال په شمالي وزيرستان کې د هدفي وژنې دا ۱۴مه پېښه ده چې پکې ځايي مشران او د سيمې اوسېدونکي په نښه کېږي.

د سيمې خلکو بيا بيا احتجاجونه کړي دي او له حکومته يې د امنيت ټينګولو او د هدفي بريدونو د مخنيوي غوښتنې کړي دي.

بلخوا ځايي امنيتي چارواکي وايي، د سيمې امنيت لپاره يې کوټلي اقدامات کړي دي.

له ایران سره د اټومې تړون په اړه پرمختګ شوی خو لا ډېر کار ته اړتیا ده: مورا

په ویانا کې د مذاکراتو مرام هغه اټومي لوظنامه بیا ژوندۍ کول دي چې امریکا ترې په ۲۰۱۸ز کال کې د وتلو اعلان کړی وو.

ایران او د نړۍ ځواکمنو هېوادونو د ۲۰۱۵ز کال د اټومي لوظنامې د ژغورولو لپاره په خبرو کې پرمختګ کړی دی.

د اروپايي ټولنې بهرنیو چارو د کړنلارې ادارې ډپټي سیکرټري جنرل ارنک مورا د اپرېل ۲۰مه په ټویټر په یو بیان کې وویل، پرمختګ شوی دی خو په دغه اړه لا ډېر کار ته اړتیا ده.

نوموړي زیاته کړې خبرې به راروانه اوونۍ بیا پیل شي.

په ویانا کې د اروپايي ټولنې په مشرۍ دا خبرې د ایران، چین، روسیې، فرانس، بریتانیې او جرمني ترمنځ کېږي چې امریکا ورپه کې په غیرمستقیم ډول برخه اخلي.

د امریکا د بهرنیو چارو وزارت ویاند نډ پرایس د خبرو پر مخ وړلو لپاره د کاري ډلې د جوړېدو هرکلی کړی او دا یې منلي چې په دغه اړه لا ډېر کار کول دي.

د ایران سرکاري میډیا د راپورونو ترمخه ددغه هېواد د مذاکراتي ډلې مشر عباس ارقچي ویلي چې د ویانا خبرې پر مخ روانې دي خو که چیرې تهران د غیرمنتطقي غوښتنو، وخت د ضیاع یا غیرمعقول جوړجاړي سره مخ شي نو خبرې به ودروي.

د مذاکراتو مرام هغه اټومي لوظنامه بیا ژوندۍ کول دي چې امریکا ترې په ۲۰۱۸ز کال کې د وتلو اعلان کړی وو.

پر تورخم د خلکو تک راتګ اسانه شوی

تورخم دروازه

د ننګرهار ولایت د تورخم ښارګوټي چارواکي وایي، له تېرې یوې اوونۍ راهیسې چې د تورخم پر لاره د ګنډو لېږدونکو پر تګ راتګ بندیز لګېدلې، ورسره د خلکو په تګ راتګ کې سل سلنه اسانتیا رامنځته شوې ده.

د تورخم ښاروال راحتګل زیارمل د اپرېل پر۲۰مه نېټه مشال راډیو ته وویل چې د ننګرهار د والي ضیاءالحق امرخېل په سپارښتنه په تورخم کې د بېلابېلو ادارو له مسوولینو څخه یوه کمېټه جوړه شوې چې په پوره ژمنتیا په دې برخه کې کار کوي چې هغه چاته به په تورخم لاره د تګ اجازت نه ورکوي چې سوداګریز مالونه د ګنډو په شکل په تورخم اړوي.

د ذکر وړ ده چې د دغو ګنډه لېږدونکو شمېر زرګونو تنو ته رسېده چې عامو خلکو ته یې په تورخم لاره د تګ راتګ پر مهال ګڼې ستونزې رامنځته کړې وې.

پاکستان کې پر ایسټبلشمنټ مخالف خبریال ابصار عالم مرګونی برید

ابصار عالم

پاکستانی نومیاتی خبریال ابصار عالم په سېشنبه د خپل کور مخې ته په ګولۍ ویشتل شوی دی.

ابصار عالم د ایسټبلشمنټ ضد نظرلرونکي په نوم پېژندل کېږي او دی پرله پسې پر پوځي جنرالانو نیوکې کوي چې هغوی په ولسي چارو کې لاسوهنه کوي.

پر ټویټر خپره شوې ویډيو کې ابصار عالم چې په ټپي حالت کې وو، وویل، هر هغه چا چې پر ده یې برید کړی، په دغه ډول چلونو دی له خپلې لارې نه شي اړولی.

دی وايي، ''مرمۍ مې په خېټه کې معده کې نښتې ده، زما پیغام هغو خلکو ته دی چې زه یې ویشتلی یم، نو په دغه ډول کړنو زه نه ډارېږم او نه به هېڅکله به له خپلې لارې واوړم.'' په ویډيو کې دی هسپتال ته وړل کېږي.

د پاکستان کورنیو چارو وزیر شیخ رشید احمد بیګاه په ټویټر لیکلي، په دغه اړه د پلټنو لپاره يي د اسلام اباد د پولیسو مشر ته امر کړی دی او په برید کې ککړ کسان به زر تر زره ونیول شي.

ابصار عالم وړاندې د انګرېزۍ ورځپاڼې 'دې نیشن' اېډیټر او د پاکستان الیکټرونیک میډیا سمبالولو ادارې مشر پاته شوي دي.

ابصار عالم د پاکستان پوځي ایسټیبلشمنټ ډېر سخت منتقید په نامه پېژندل کېږي. په ورستیو کې هغه په یوه ټویټ کې کښلي کله چې دی د پیمرا مشر وو نو څنګه به د استخباراتي ادارو لوړپوړو چارواکو ورته امر کاوه.

په پاکستان کې بیا بیا خبریالیان تر بریدونو لاندې راځي په ۲۰۱۴ز کال کې خبریال حامد میر هم په کراچۍ ښار کې ناڅرګندو وسله والو په ګولیو وویشت.

له افغانستانه د بهرنیو ځواکونو تر وتلو وروسته لویه جرګه رابلل کېږي

د کابینۍ غړو د اپرېل پر ۱۹مه ناوخته د ولسمشر اشرف غني په مشرۍ دا پرېکړه کړې ده.

د افغانستان د ارګ ماڼۍ وايي، د کابینې په غونډه کې پرېکړه وشوه چې د بهرنیو ځواکونو له وتلو وروسته دې د افغانستان د دایمي بې طرفۍ غوښتنې په اړه لویه جرګه جوړه شي.

د کابینۍ غړو د اپرېل پر ۱۹مه ناوخته د ولسمشر اشرف غني په مشرۍ دا پرېکړه کړې ده.

دوی په غونډه کې له افغانستانه د بهرنیو ځواکونو د وتلو پر څرنګوالي هم بحث کړی دی.

د ارګ ماڼۍ د بیان له مخې د غونډې ګډونوالو ویلي چې د امریکايي ځواکونو وتل د دواړو هېوادونو د اړیکو د پرېکون په معنی نه ده بلکې د افغانستان او امریکا ترمینځ د اړیکو او همکاریو د نوي څپرکي پیل دی.

د افغان حکومت په کابینه کې همدارز د امریکايي ځواکونو تر وتلو وروسته د دواړو هېوادونو د دوه اړخیزو او څو اړخیزو قراردادونو او تړونونو د پلیکېدو خبره هم یاده شوې ده.

د امریکا د ولسمشر جو بایډن د پرېکړې له مخې د مې له لومړۍ له افغانستانه د پاتې امریکايي ځواکونو وتل پیلېږي چې د سپټمبر تر ۱۱مې به بشپړ شي.

په پېښور کې د طالبانو یو مهم قومندان وژل شوی

د ننګرهار لپاره د وسله والو طالبانو يو مهم نظامي قوماندان نیک محمد رهبر رهبرمل د پېښور حاجي کیمپ سيمه کې وژل شوی

د ننګرهار والي وايي، د وسله والو طالبانو یو مهم نظامي قومندان په پېښور کې وژل شوی.

ضیاالحق امرخیل دا خبره د اپرېل پر ۱۹مه ماښام په یوه بیان کې کړې ده.

هغه زیاته کړې، د ننګرهار لپاره د طالبانو دا نظامي قومندان مولوي نیک محمد رهبرمل و چې د اپرېل پر ۱۹مه ناوخته پرې د پېښور حاجي کمپ سیمه کې برید شوی.

امرخیل دا هم ویلي چې د مولوي نیک محمد په وژنې سربېره بریدګرو د هغه دوه ملګري چې یو یې د ښاري شبکې مسوول عزیزالله مشهور په مصطفی و ټپیان کړي دي.

په افغانستان کې ګڼو رسنی راپور ورکړی چې مولوي نیک محمد د ننګرهار لپاره د طالبانو نظامي قومندان و او عزیزالله هم چې په مصطفی مشهور و په ننګرهار کې د دې ډلې د استخباراتو ښاري شبکه رهبري کوله.

وسله والو طالبانو تر دې دمه دا خبره رد یا تایید کړې نه ده.

لا معلومه نه ده چې پر دغو طالبانو چا برید کړی او نه یې کومې ډلې مسوولیت پر غاړه اخیستی.

د سعودي مدني فعالې ته واڅلاو هاوېل جایزه ورکړل شوه

سعودي مدني فعاله لوزین الحتلول

د سعودي عرب یوې ښځینه مدني فعالې لوزین الحتلول ته د واڅلاو هاوېل بشري حقونو جایزه ورکړل شوه.

دا جایزه ۷۲ زره ډالره ارزښت لري، د اروپايي کونسل د پارلېماني اسمبلۍ لخوا د اپرېل پر ۱۹مه په انلاین غونډه کې د نوموړې په استازیتوب د هغې خور ته ورکړل شوه.

دا غونډه د کورونا وایرس له ویرې تر څو میاشتو پورې ځنډول شوې وه.

د اروپايي کونسل پارلېماني اسمبلي ویلي چې الحتول د سعودي د فیمینیسټ غورځنګ د یوې مشرې په توګه پېژني چې په سعودي حکومتي نظام کې یې پر مېرمنو د بندیزونو د لرې کولو لپاره هلې ځلې کړې دي.

یاده اداره وايي، نوموړې په سعودي نظام کې د نارینه سرپرست نظام د ختمولو، د مېرمنو پر موټرچلونې د بندیز د ختمولو او د سعودي په شاهي نظام کې له تېري سره د مخامخ شوو مېرمنو د لوی محافظت لپاره کمپاینونه کړي دي.

په بیان کې ویل شوي، الحتول د خپل دریځ له وجې ۱۰۰۱ ورځې په زندان کې تېرې کړي او د ۲۰۲۰ز کال په فبرورۍ کې له زندانه واېستل شوه خو لا هم په خپل کور کې نظر بنده او له بندیزونو سره مخامخ ده.

د چیک جمهوریت پخواني ولسمشر واڅلاو هاویل په نوم دا جایزه د ۲۰۱۳ز کال راهیسې هغو کسانو ته ورکول کېږي چې په اروپا او نوره نړۍ کې یې د بشري حقونو د دفاع لپاره مبارزه کړې وي.

د امریکا ملي امنیت سلاکار له خپل روسي سیال سره په دوه اړخېزو مسلو په اړه غږېدلي

د امریکا د ملي امنیت سلاکار جېک سلېوان

د واشنګټن او مسکو ترمنځ د شدیدې ترینګلتیا پرمهال د امریکا د ملي امنیت سلاکار جېک سلېوان د خپل روسي انډول نېکولی پیتروشېف سره په دوه اړخېزو مسلو خبرې کړې دي.

دواړو مشرانو د اپرېل پر ۱۹مه د ټیلېفون له لارې د سیمه ییزو او نړیوالو اندېښنو او همدارنګه د دواړو هېوادونو د ولسمشرانو ترمینځ د سرمشریزې د امکان په اړه خبرې وکړې.

د امریکا د ملي امنیت ویاندې اېمیلې هورنې د اپرېل پر ۱۹مه په یو بیان کې وویل، دواړه مشران پر دې خبره سلا شول چې باید له یو بل سره تماسونه جاري وساتل شي.

تر دې وړاندې کرېملین اعلان کړی و چې د روسیې ولسمشر به د روانې اونۍ په اوږدو کې د موسمي بدلون په اړه په هغه سرمشریزه کې برخه واخلي چې د امریکا تر انتظام لاندې په انلاین ډول ترسره کېږي.

په عین حال کې د امریکا ولسمشر جو بایډن پر دوه اړخیزو اړیکو د خبرو لپاره له خپل روسي سیال ولاديمیر پوتین سره د مخامخ لیدو وړاندیز کړی خو پوتین تر اوسه داسې کومه اشاره نه ده ورکړې چې دغه بلنه به ومني او که نه؟

د امریکایي ځواکونو وتل راته د خپلې محاسبې موقع راکړه

د افغانستان ولسمشر محمد اشرف غني

افغان ولسمشر اشرف غني وایي، له افغانستانه د امریکایي ځواکونو وتلو موږ ته د دې موقع راکړه چې له نوې سره د خپلځان محاسبه وکړو او د طالبانو او پاکستان لپاره یې هم د انتخاب وخت ورکړی.

ولسمشر غني دغه څرګندونې په یکشنبه له امریکایي ټي وي چېنل سي‌ اېن ‌اېن سره په مرکه کې وکړې او و یې ‌ویل، ''دا خوښه د پاکستان ده چې د سوله‌ییزې اسیا په کړۍ کې د یوه نړیوال لوبغاړي په توګه خپل کردار ادا کوي که د ګډوډۍ لاره غوره کوي."

ولسمشر غني طالبان هم ورته انتخاب ته راوبلل او زیاته ‌یې کړه، د طالبانو هغه لویه پلمه چې جګړه د دې لپاره کوي چې له افغانستانه نړیوال ځواکونه وباسي، نوره اعتبار نه‌لري. د ده په وینا په افغانستان کې جګړه له مذهبي پلوه نوره پلمه نه لري او سیاسي روغه جوړه یوه وروستۍ چاره ده.

غني وویل، اوس پر طالبانو او د هغوی پر ملاتړو ولاړه ده تړلې چې کومه یوه لاره خپلوي.

که څه هم د افغان ولسمشر د دې څرګندونو په باب د طالبانو او پاکستانيو چارواکو دریځ نه دی راغلی خو د پاکستان د بهرنیو چارو وزیر شاه محمود قریشي په یکشنبه (پرون) په یوه ټویټ کې ولیکل چې له خپل افغان ساري د بهرنیو چارو له وزیر حنیف اتمر سره‌یې په خبرو کې هغه ته ډاډ ورکړی چې هېواد یې په افغانستان کې د روغې جوړې او په استانبول کې د سولې په پروسه کې د پرمختګ ملاتړ کوي.

د امريکا نيمايي بالغ وګړیو ته کورونا واکسين لګول شوی

استرازېنيکا واکسين

د امریکا د ناروغیو مخنیوي اداره وايي، د هېواد د ټولو بالغ وګړو نیمايي ته یې لږ تر لږه د کورونا وایرس ناروغۍ یو واکسين لګولی ده.

ادارې د اپرېل پر ۱۸مه وویل چې په هیواد کې نژدې ۱۳۰ میلیونه یا د ۱۸ کلنو او تر هغه د زیات عمر لرونکو ټولو وکړو نیمايي یا ۵۰.۴ فیصده ته لږ تر لږه د کورونا وایرس د مخنيوي واکسينو یوه ستن لګول شوې ده.

امریکا دا هدف په داسې وخت کې ترلاسه کړی دی چې د دې ناروغۍ تر بلې څپې وړاندې ټول ولس ته واکسین ولګوي.

په امریکا کې تر اوسه نژدې ۸۴ میلیونه کسانو ته د کورونا وایرس مکمل واکسین ورکړل شوي دي. دا شمېره د هېواد د ټولې بالغې ابادۍ درېمه برخه جوړوي.

نوښار: په ډزو کې د يوې کورنۍ ۷ کسان وژل شوي

نوښار

د خیبر پښتونخوا په نوښار کې د روژه ماتي پر مهال د دوو ډلو ترمینځ شويو ډزو کې اووه کسان وژل شوي دي چې پکې دوې ښځې هم دي.

د نوښار ضلعي د پوليسو مشر محمد اقبال خان د اپرېل ۱۸ مې ماخوستن مهال مشال ريډيو ته وويل چې په شیخي کلي سيمه کې د تره زامنو د ټيوب ويل پر نوکرۍ لانجه وه چې د اتوار پر ورځ په خونړۍ جګړه بدله شوه. د ده په خبره دواړو ډلو پر يوه بل ډزې وکړې چې پکې اووه کسان ووژل شول.

نوموړي زیاته کړه چې تر پېښې وروسته تورن کسان تښتېدلي دي چې پوليس يې په لټون بوخت دی.

تر دې وړاندې د اپرېل پر ۱۷مه هم په چارسده کې د روژه ماتي پر مهال د مځکې په شخړه باندې د دوو ډلو ترمنځ ډزې شوې وې چې پکې څلور کسان وژل شوي او پينځه نور ژوبل ول.

د بلوچستان سوداګرانو د کووېډ-۱۹ وبا کنټرول لپاره حکومتي محدودیتونه رد کړل

په پاکستان کې یو روغتیاپال یو کس ته د کووېډ-۱۹ چینايي واکسین لګوي.

د بلوچستان سوداګرانو د کورونا وایرس مخنیوي په موخه محدودیتونه رد کړي.

د سوداګرانو د ټولنې یوه مشر سید امردین اغا د اپرېل پر ۱۷مه مشال راډیو ته وار له مخه ځپل شوي نو ځکه بیا کاروبارونه نشي تړلای.

دا تر هغې وروسته ده چې د بلوچستان حکومت د کووېډ-۱۹ جهاني وبا کنټرول لپاره د اپرېل له ۱۷مې څخه د مې تر لومړۍ نېټې پورې محدودیتونه اعلان کړل.

حکومت ټولو سوداګرانو ته ویلي چې بازارونه او دوکانونه به د مازیګر تر شپږو وروسته تړي.

خو سوداګران وايي، د شپې تر ۱۰ پورې دې ورته د کاروبارونو خلاص ساتلو اجازه ورکړي.

دوی همداراز، د اپرېل پر ۱۷مه د صوبې د نورو ښارونو په څېر په کوټه کې هم دوکانونه خلاص ساتلي ول.

د کووېډ-۱۹ وبا په اړه د حکومتي ووبپاڼې په وینا، په بلوچستان کې د اپرېل تر ۱۸مې د کورونا وایرس د مثبتو پېښو شمېر ۲۰،۸۲۲ ته لوړ شوی چې ورڅخه یې ۲۲۳ کسان مړه شوي او ۱۹،۶۲۹ له ناروغۍ رغېدلي دي.

چېک جمهوریت ۱۸ روسیو ډېپلوماټانو ته د هېواد پرېښودو امر وکړ

د روسیې سفارت وايي، د چېک جمهوریت د بهرنیو چارو وزارت سفیر ورغوښتی وو. د ارشیف انځور

چېک جمهوریت ۱۸ روسیو ډېپلوماټانو ته د هېواد پرېښودو امر کړی دی.

چېکي حکومت تر هغې وروسته پر دې ډېلپوماټانو د جاسوسۍ تور پورې کړ چې استخباراتو په ۲۰۱۴ز کال کې د وسلو په یوه ګودام کې په چاودنه کې د روسیې د پوځي اېجنټانو ککړتیا په ډاګه کړه.

د چېک جمهوریت وزیراعظم اندرې بابیش د اپرېل پر ۱۷مه وویل، دا پرېکړه یې د هېواد استخباراتي او امنیتي ادارو له لوري د ښکاره ثبوتونو پر اساس کړې.

د ده په خبره، په ۲۰۱۴ز کې د زلېن سیمې په وربېتېڅې ښار کې د وسلو په ګودام کې په چاودنه کې د روسیې د پوځي استخباراتو ادارې (جي ار یو) د ککړتیا معقول شکونه موجود دي.

د سلواکیا له پولې سره په چاودنه کې دوه کسان وژل شوي ول.

د وسلو ګودام کې تر چاودنې وروسته اور لګېدلی وو - د ۲۰۱۴ز کال د اکتوبر ۲۰مې انځور.
د وسلو ګودام کې تر چاودنې وروسته اور لګېدلی وو - د ۲۰۱۴ز کال د اکتوبر ۲۰مې انځور.

د چېک جمهوریت د کورنیو چارو وزیر یان هماچېک چې اوسمهال د بهرنیو چارو لندمهاله وزیر هم دی، ویلي دا ډېپلوماټان یې د استخباراتي کارکوونکو په توګه پېژندلي او ورته یې په ۴۸ ساعتونو کې د هېواد پرېښوولو ویلي دي.

په پلازمېنه پراګ کې د روسیې سفارت انټرفیکس خبري اژانس ته ویلي چې د ډېپلوماټانو د ایستلو له پرېکړې خبر دي او د چېک د بهرنیو چارو وزارت روسی سفیر الېکساندر زمېیېفسکي ورغوښتی وو.

د اژانس په خبره، مسکو د روسیې د بهرنیو چارو وزارت له لوري د غبرګون خبرداری ورکړی دی.

د بهرنیو چارو وزارت ویاندې ماریا زخاروفا انټرفیکس اژانس ته ویلي چې "پراګ پوهېږي چې تر دې ډول بې معنا کارونو وروسته څه پېښېږي."

ننګرهار کې د تراوېح لمانځه پر مهال د یوې کورنۍ اته غړي وژل شوي

پېښه د ننګرهار په مرکز جلال اباد کې د تراوېح لمانځه پر مهال شوې

چارواکي وايي، په ننګرهار کې د تراوېح د لمانځه پرمهال د یوې کورنۍ اته غړي وژل شوي.

د دوی په خبره، د اپرېل ۱۷مې پر ماخوستن شاوخوا نهه بجې د جلال اباد ښار نهمې ناحیې اړوند په سراچه علي خان سیمه کې په یوه جومات کې د تراوېح لمونځ روان وو چې وسله وال ورغلل او د حاجي عبدالوهاب په نوم د یوه کس پینځه وروڼه او درې ورېرونه یې وویشتل.

د ننګرهار والي ضیاالحق امرخېل وايي، دا پېښه په سیمه کې د ځمکې پر سر د لانجې له وجې شوې.

دی وايي، امنیتي ادارو ته یې "جدي سپارښتنه" کړې چې په پېښه کې ککړ کسان پیدا کړي او د قانون منګولو ته یې وسپاري.

نور پورته کړئ

ځانګړې پاڼې

له موږ سره اړیکي

XS
SM
MD
LG