د لاسرسي ځای

تازه خبر

خبرونه

د بدخشان پر یمګان ولسواۍ وسله والو طالبان برید کړې

د بدخشان سیمه ییز چارواکي وايي چې وسله والو طالبانو په یمګان ولسوالۍ له څو خواوو برید کړې ده.

د بدخشان د امنیت آمر سخي داد حیدري مشالي راډیو ته وویل چې له نن(شنبه) سهار راهیسې د افغان پوځیانو او لسګونه وسله والو مخالفینو تر منځ په دې ولسوالۍ کې جګړه روانه ده؛ خو تلفات یې لا نه دي معلوم.

اخوا د بدخشان د امنیې قومندانۍ ویاند لعل محمد احمدزی د وسله والو طالبانو دا ادعا چې یمګان ولسوالۍ یې نیولې ردوي او وايي چې ځینې سیمې د طالبانو تر ولکې لاندې راغلي دي.

وسله والو طالبانو ادعا کړې چې په یمګان باندې یې حمله کړې او دا ولسوالۍ یې له افغان حکومته نیولې ده.

افغان چارواکي وايي چې سیمې ته یې نور تازه دمي سرتیري استولي دي.

د نننۍ ورځې ټول خبرونه وګورئ

افغان چارواکي وايي، په کابل کې یې د داعش ډلې مهم غړی نیولی دی

غلام ناصر الخراساني

د افغانستان د ولسمشر لومړي مرستیال دفتر وايي‌ چې د ملي امنیت ځواکونو لخوا په پلازمېنه کابل کې د داعش ډلې ځايي مشر نیول شوی دی.

د امرالله صالح دفتر د اپرېل پر ۱۰مه په یوه خبرپاڼه کې ویلي چې غلام ناصر الخراساني په کابل ښار کې په لسګونه ترهګرو بریدونو، وژنو او تښتونو کې لاس درلود.

په خبرپاڼه کې نوموړی د داعشي طالبانو د ډلې مشر بلل شوی دی.

د خبرپاڼې له مخې الخراساني د کابل له لویدیځ څخه د یوه ۱۴ کلن هلک په تښتولو کې هم لاس درلود.

داعش وسله والې ډلې تر اوسه په دې اړه څه نه دې ويلي.

د یونان په پلازمېنه کې مشهور ځايي خبریال وژل شوی

پولیس او ځايي رسنۍ وايي چې پرون ( د اپرېل پر نهمه) پر موټر سایکل سپرو دوو کسانو په دغه خبریال په الېموس سیسمه کې د هغه د کور مخې ته ډزې وکړې او ویې واژه.

د یونان په مرکز اتنز کې د اپرېل پر نهمه یو پېژندل شوی ځايي خبریال پر ډزو ووژل شو.

په یونان غوندې یو هیواد کې چې د اروپايي ټولنې غړیتوب لري، دا د خپل نوعیت یوه نااشنا پېښه ده.

یارغوش کارای واز چې د جنايي پېښو (یا کرایم رېپورټېنګ) یې کاوه د سټار په نوم تلویزون سره یې کارکولو او یو خبري بلاګ یې هم چلاوه.

پولیس او ځايي رسنۍ وايي چې پرون ( د اپرېل پر نهمه) پر موټر سایکل سپرو دوو کسانو په دغه خبریال په الېموس سیسمه کې د هغه د کور مخې ته ډزې وکړې او ویې واژه.

تر اوسه دا خبره نه ده سپینه شوې چې د دغه یوناني خبریال د وژنې محرکات څه وو؟

د یونان د حکومت ویاندې ارېسټو ټلیا پیلوني په یو بیان کې ویلي، د وژنې دې پېښې هغوی ټول لړزولي دي. هغې ویلي د پېښې پلټنه روانه ده او وژونکي به زر ونیول شي.

د اروپايي ټولنې کمېشنرې اورسولا وان ډر لیین هم دا پېښه غندلې او ویلي یې دي چې اروپا د بیان د ازادۍ طرفداره ده او د هغوی لپاره د بیان ازادي تر ټولو مقدسه ده.

په ویانا کې د ایران د اټومي پروګرام په اړه خبرې ګټورې وې: ګډونوال

راتلونکې اوونۍ به یو وارې بیا په همدې موضوع د خبرو د دوام لپاره ټولې خواوې سره راټولېږي.

د اسټریا په مرکز ویانا کې د ایران د اټومي پروګرام د تړون د بیا کتنې لپاره څلور ورځنۍ خبرې پرون په داسې حال کې پای ته ورسېدې چې پکې ګډون کوونکي سفارتکاران وايي، خبرې ګټورې وې.

راتلونکې اوونۍ به یو وارې بیا په همدې موضوع د خبرو د دوام لپاره ټولې خواوې سره راټولېږي.

د اروپايي ټولنې په کوربتوب دا خبرې پر دې متمرکزې دي چې د امریکا او ایران ترمنځ کړکېچ ته د پای ټکی کېښودل شي او دواړه هیوادونه یو وارې بیا د ۲۰۱۵ کال د جوهري تړون منلو ته اماده کړل شي.

امریکا په ۲۰۱۸ کال کې له دې تړونه وتې وه او پر ایران یې بندیزونه لګولي ول خو اوسني ولسمشر جوبایډن یو وارې بیا د ایران سره شوي جوهري تړون ته د ستنېدو په اړه خپله رضامندي ښودلې ده.

د ناروې وزیراعظمه د کورونا مخنیوي لارښوونو پر نه عملي کولو جرمانه شوې

وزیر اعظمې ارنا سولبرګ منلي دي چې د دې دستورې برابرولو نه مخکې يې په دقيقه توګه د ټولنيزې فاصلې ساتلو قوانين نه وو لوستي.

د ناروې وزیر اعظمه ارنا سولبرګ د کورونا وایرس ناروغۍ مخنیوي لپاره له لګول شویو محدويتونو د سرغړونې په تور جرمانه شوې ده.

دا په داسې حال کې ده چې ارنا سولبرګ د خپلې کالیزې د ورځې داسې غونډه جوړه کړې وه چې د چارواکو په خبره پکې د ټولنيزې فاصلې خیال نه وو ساتل شوی.

د پوليسو مشر اولي سيوروډ د اپريل په نهمه وويل چې وزیراعظمه ارنا سولبرګ د خپلې کورنۍ سره په هغه پریکړه کې شامله وه چې په کوم ريسټورنټ کې به په کوم ميز څومره میلمانه د خوړو لپاره بلل کيږي.

پولیس وايي وزير اعظمه يې ۲۳۵۲ امریکايي ډالره جرمانه کړې ده.

د پولیسو مشر اولي په وزیر اعظمې د جرمانې د دفاع کولو پر مهال وويل چې قانون د هر چا لپاره يو دی خو د قانون پر مخکې هر څوک برابر نه دي.

ده ویلي چې دا جرمانه ځکه هم سم کار دی چې د کورونا له کبله په را پیدا شوي حالت کې د ټولنيزو محدويتونو عملي کولو پر مخکې د ولس اعتماد په کلکه بحال کړي.

بلخوا وزیر اعظمې ارنا سولبرګ منلي دي چې د دې دستورې برابرولو نه مخکې يې په دقيقه توګه د ټولنيزې فاصلې ساتلو قوانين نه وو لوستي.

نوموړې له سرکاري ټيلي ويژن اين آر کې سره په خبرو کې ویلي چې، "زه او یا نور چې هره ورځ ولس ته د کورونا وايرس د مخنيوي په لړ کې خبرې کوو نو لازمه ده چې موږ ته د دې قوانينو له هر چا زیات مالومات وي."

په ناروې کې د کورونا له کبله د محدويتونو پر مهال له کوره بهر یوازې د لسو کسانو راغونډيدو اجازت دی خو ارنا سولبرګ په دغه غونډه کې ۱۳ ميلمنو ته بلنه ورکړل شوې وه.

اذربایجان له ترکیې سره ګډ دوه ورځني پوځي مشقونه پیل کړي

دا پوځي مشقونه چې د اپرېل پر اتمه اعلان شول، نيږدې پنځه میاشتې وروسته له هغه پیلېږي چې اذربایجان له ارمينيا سره د ناګورنو قره باغ لانجمنې سیمې پر سر په لنډه جګړه کې بريا ترلاسه کړه.

اذري چارواکو ویلي چې د دې مشقونو هدف د دواړو هېوادونو د وسله والو ځواکونو ترمنځ د تماسونو پیاوړي کول دي.

دا پوځي مشقونه چې د اپرېل پر اتمه اعلان شول، نيږدې پنځه میاشتې وروسته له هغه پیلېږي چې اذربایجان له ارمينيا سره د ناګورنو قره باغ لانجمنې سیمې پر سر په لنډه جګړه کې بريا ترلاسه کړه.

په دې جګړه کې تر شپږ زره زیات کسان ووژل شول چې بالاخره روسيې هم خپل شاوخوا دوه زره سوله ساتې ځواکونه هلته ځای پر ځای کړل.

دا غرييزه سيمه په نړيواله توګه د اذربايجان برخه تسليم شوې خو د ۱۹۹۰مې لسيزې له لومړيو کلونو راهیسې يې کنټرول د ارمني نژاده ځواکونو په لاس کې دی.

د اذربایجان دفاع وزارت په یوه بیان کې ویلي چې د دې پوځي مشقونو هدف د پوځيانو د پرېکړې کولو پر وړتيا لوړولو سربېره د عملياتو د څانګې د قوماندانانو د نوښت او اداري وړتیاوو لوړول دي.

ترکیې د دې پوځي مشقونو په اړه څه نه دې ويلي.

د امريکا ولسمشر جو بايډن په هېواد کې د وسلو قابو کولو نوي اقدامات اعلان کړي

ولسمشر جو بایډن د اپرېل پر اتمه په سپينه ماڼۍ کې د مرستیالې ولسمشرې کاملا هېریس او لوی څارنوال مېریک ګارلېنډ په موجودګۍ کې د وسلو تشدد ولسي روغتيايي کړکېچ وباله.

د امريکا ولسمشر جو بايډن په هېواد کې د وسلو د کنټرول لپاره نوي اقدمات اعلان کړي دي.

نوموړي د اپرېل پر اتمه په سپينه ماڼۍ کې د مرستیالې ولسمشرې کاملا هېریس او لوی څارنوال مېریک ګارلېنډ په موجودګۍ کې د وسلو تشدد ولسي روغتيايي کړکېچ وباله.

ده زیاته کړه، "موږ نن د وسلو د کړکېچ د مخنيوي لپاره اقدامات کوو چې دا په اصل کې ولسي روغتيايي کړکېچ دی."

ولسمشر بايډن چې د ډیموکرات ګوند د غړي په توګه پر وسلو د محدودیت د ملاتړ پخوانۍ سابقه لري، دا اعلان د سپينې ماڼۍ په روز ګارډن کې جوړې شوې هغې غونډې ته د وينا پر مهال وکړ چې د وسلو د تشدد د يوشمېر قربانيانو خپلوان هم پکې موجود ول.

هغه زياته کړه چې "د خدای په خاطر دا يوه ساري ناروغي ده او بايد مخه يې ونيول شي".

په امريکا کې قانون ولس ته د سپکو وسلو "توپک او توپنچې" اخيستلو او په کور کې د اېښودلو اجازه ورکوي خو د دې وسلو د استعمال له کبله له لسيزو راهيسي په سکولونو او نورو ولسي ځايونو کې يوشمېر کسانو ته مرګ ژوبله اوښتې ده.

په دا وروستيو کې د امريکا په جنوبي کیرولاينا ايالت کې د ډزو په دا ډول يوه پېښه کې د يوه ډاکټر، د هغه د مېرمنې او دوو لمسيانو په ګډون پنځه کسان ووژل شول.

له دې وروسته تېره مياشت په کولاراډو او جورجيا ايالتونو کې په دوو دا ډول پېښو کې ۱۸ کسان ووژل شول.

په امریکا کې د وسلو کنټرول يوه لانجمنه مسله ده او يوشمېر امريکايان د وسلو کنټرول ته د خپل قانوني حق د سلبولو په سترګه ګوري.

امريکا پريوه پاکستاني وګړي او د هغه پر کمپنۍ بنديزونه ولګول

د امريکا ماليې وزارت وايي چې دوی ځينې داسې کسان يې هم قاچاق کړي چې هغوي ښايي د امريکا ملي امنيت ته ګواښ پېښ کړي.

د امريکا خزانې وزارت د اپرېل پر اوومه نېټه وويل چې پر يوه پاکستاني او د هغه پر کمپنۍ یې له دې امله بندېز لګولی چې په ناقانونه ډول یې له پاکستان او افغانستانه امريکا ته د خلکو په قاچاقولو کې مرسته کوله.

دې وزارت ويلي‌چې د عابد علي خان له خوا چېلدونکی، ټرانزنېشنل کريمينل ارګنایزېش يا ټي سي او داسې يو سازمان دی چې په پراخه کچه انساني قاچاق کوي او له دې لارې زياتې پیسې لاس ته راوړي.

دا سازما په پاکستان کې دی. وزارت وايي دې سازمان ځينې داسې کسان هم امريکا ته بيولي چې ښايي د امريکا ملي امنيت ته ګواښ پېښ کړي. د ماليې وزارت بيان زياتوي چې دغه سازمان لږ تر لږه له ۲۰۱۵ کال راهيسې د لاتيني امريکا له لارې د بهرنيوو وګړيو په قاچاقولو کې مرسته کړې ده.

د بیان ترمخه، د یوه سړي د قاچاقولو بيه اوسطا ۲۰ زره ډالره ده.

وزارت په امريکا کې د عابد علي تر څنګ د هغه د افغان سيکريټري، رېدي حسېن خان ګل او دوه پاکستاني وګړو شکيل کريم محمد او چوهدري اکرام وړايچ شتمنۍ هم کنګل کړې دي.

افغان ځواکونو د غیرمسوله وسله والو قوماندان علیپور قرارګاه نیولې

عبدالغني عليپور

افغان چارواکي وایي د میدان وردګ ولایت په بهسود ولسوالۍ کې یې د ځایي غیر مسوله وسله والو قوماندان عبدالغني عليپور قرارګاه نیولې ده.

د ۲۰۳ تندر قول اردو د پنځمي پلي لوا د رسنیو دفتر د اپرېل په اوومه ماښام مهال په یوه خبرپاڼه کې وويل چې د علیپور قرارګاه د امنیتي او دفاعي ځواکونو د ګډو عملیاتو په نتیجه کې نیول شوې ده.

دغو ځواکونو د اپرېل پر اوومه د بهسود ولسوالۍ په حصه اول کې په همدې هدف ځانګړي عملیات پیل کړي ول. په خبرپاڼه کې په دې اړه نور تفصيل نه دی ورکړل شوی.

قوماندان علیپور چې په شمشیر هم مشهور دی، شاوخوا درې اوونۍ دمخه منلې وه چې د ده وسله والو د میدان وردګ په بهسود ولسوالۍ کې د افغان پوځ يو هيلي کاپټر ويشتلی او غورځولی وو. په دې پېښه کې د څلورو پیلوټانو په ګډون ۹ تنه پوځيان وژل شوي ول.

ایران او نړیوال قدرتونه د ايټمي تړون په اړه غږېدلي

په ویانا کې د اټومي تړون په اړه غونډه

د ایران د ايټمي لوظنامې بیا ژوندۍ کولو لپاره د نړۍ د ۵ ځواکمنو هیوادونو د استازو او ایراني چارواکو ترمنځ په ویانا کې خبرې شوې دي.

امریکا په ۲۰۱۸ کال کې له لوظنامې د وتلو اعلان کړی وو.

د ایران د مذاکراتي پلاوي مشر عباس عراقچي سرکاري ټیلېویژن ته ویلي چې اپرېل پر شپږمه یې د برتانیې، چین، جرمني او روس له استازو سره رغوونکې خبرې شوې دي.

په ویانا کې د روس استازي میخایل یولي نوف هم ویلي دي چې په بریالیتوب سره یې د خبرو پیل کړی دی.

د امریکا د بهرنیو چارو وزرات ویاند نیډ پرایس
د امریکا د بهرنیو چارو وزرات ویاند نیډ پرایس

د امریکا د بهرنیو چارو وزرات ویاند نیډ پرایس ویلي دي که څه هم دوی له ایرانیانو سره نیغ په نیغه نه ویني خو واشنګټن د اسټریا په پلازمینه کې روان بحثونه ښه بولي او د یو ښه ګام په توګه ورته ګوري.

اروپایي دیپلوماتان د منځګړو په توګه دنده ترسره کوي چې د امریکايي او ایراني چارواکو ترمنځ په غیر مستقیم ډول خبرو ته لاره هواره کړي.

تر دې مخکې د امریکا ولسمشر جو بایډن چمتووالی ښودلی وو چې هغه لوظنامه بیا راژوندۍ کړي چې ولسمشر ډونلډ ټرمپ شاته پریښې وه خو د هغه انتظامیه وايي چې ایران باید د ايټمي پروګرام په اړه کړو ژمنو ته راستون شي.

د افغانستان دفاع وزارت وايي ۶۸ وسله وال یې وژلي

افغان امنیتي چارواکي وايي، دغه عملیات په بدخشان، کندز، فراه، فاریاب او کندهار په ولایتونو کې شوي دي.

د افغانستان دفاع وزارت ادعا کوي چې په تېرو ۲۴ ساعتونو کې یې په څو ولایتونو کې ۶۸ طالبان وژلي او نېژدې همدومره نور یې ژوبل کړي دي.

د افغان ځواکونو عملیات
د افغان ځواکونو عملیات

دغه وزارت نن (د اپرېل پر اوومه) په یوه خبرپاڼه کې ویلي دا کسان په بدخشان، کندز، فراه، فاریاب، او کندهار کې د امنیتي ځواکونو په ځوابي بریدونو او نښتو کې وژل شوي دي.

خبرپاڼه زیاتوي چې امنیتي ځواکونو په تېرو ۲۴ ساعتونو کې څه باندې ۲۰۰ ماینونه هم شنډ کړي دي.

طالبانو تازه په دې اړه څه نه دي ویلي. خو څو ورځې وړاندې یې ويلي ول چې د دفاع وزارت دغه عملیات د قطر د سولې له هوکړې سره په ټکر کې دي او خبرداری یې ورکړ که عمليات ونه درول شول، پر ځوابي اقدام به یې غور وکړي.

دوی دا وضاحت نه دی کړی چې عمليات څنګه او د کومې ځانګړې هوکړې سره په ټکر کې دي ځکه چې تر اوسه افغان حکومت او طالبانو په مذاکراتو کې د لوظنامې کولو کوم پرمختګ نه دی اعلان کړی.

په افغانستان کې دې د خبریالانو وژنه ودرول شي: نی

د انعکاس ټېلېوېژن د یوې کارکوونکې د کورنۍ غړي یې تابوت کور ته وړي - د ۲۰۲۱ز د مارچ درېیمې انځور.

د افغانستان له ازادو رسنیو د ملاتړ اداره نی وایي په دغه هېواد کې دې د ملکي وګړو اوپه تیره بیا د خبریالانو وژنې سمدستې بندې شي.

نی د اپرېل پر پنځمه په یوه خبرپاڼه کې ویلي چې د خبریالانو او د رسنیو د نورو کارکوونکو او د هغوی د کورنیو د غړیو وژل د ملي او نړیوالو قوانینو او اصولو خلاف عمل دی.

د رسنیو د ملاتړ دا ټولنه د طالبانو په ګډون د جګړې پر ټولو ښکیلو لورو غږ کوي چې پر خبریالانو دې له حملو لاس واخلي ترڅو د معلوماتو په ورکولو کې د رسنيوو رول او د بیان ازادي خوندي شي.

په افغانستان کې د خبریالانو او د رسنیو د کارکوونکو د وژنو له کبله اندېښنې تر هغې وروسته لا زیاتې شوي چې د مارچ پر دویمه په جلال اباد کې په دوو جلا حملو کې د انعکاس ټېلېوېژن درې کارکوونکې ووژل شوې.

د دې بریدونو ذمه واري وسله والې ډلې داعش منلې وه.

د بې پولې خبریالانو د راپور له مخې، له کله چې تېر کال د امریکا او طالبانو ترمنځ تړون شوی او بین الافغاني خبرې پیل شوي، لږ تر لږه ۱۰ افغان خبریالان او د رسنیو کارکوونکي وژل شوي دي.

ننګرهار: د انعکاس ټيليويژن کارکوونکې وژل شوې
تم شئ

هېڅ میډیايي سرچینه اوس نشته

0:00 0:01:41 0:00

د روس اپوزېشن سياستوال، ناوالني له زندانه روغتون ته انتقال شوی

دا هغه زندان دی چې د روس اپوزیشن مشر الېکسي ناوالني پکې ساتل کېږي

د روس ازويستيا ورځپاڼې د اپرېل پر پنځمه راپور ورکړی چې په زندان کې بندي د کریملن منتقد الېکسي ناوالني د ټوخي او تبې له وجې روغتون ته وړل شوی دی.

ناوالني د اپرېل پر پنځمه په خپله انستاګرام پاڼه ولیکل، له هغه زندانه چې دی پکې ساتل کېږي درې بنديان چې ښايي د نري رنځ يا (ټي بي) پر ناروغۍ اخته وو روغتون ته انتقال شوی دي.

د روس حکومت مخالف سیاستوال الېکسي ناوالني
د روس حکومت مخالف سیاستوال الېکسي ناوالني

نوموړي ليکلي وو چې سخت ټوخی لري او د زندان ډاکټرانو چې دی یې معاینه کړی، ورته ویلي چې تبه یې له ۳۸.۱ درجو لوړه شوې ده.

ناوالني د روسي ولسمشر ولادیمير پوتن تر ټولو مشهور نقاد دی چې دا مهال د مسکو په ۱۰۰ کیلومترۍ کې د اصلاحي مرکز په دويم نمبر کالونۍ کې قېد دی.

۴۴ کلن ناوالنې د جنوري په میاشت کې له جرمني روس ته د بیرته ستنېدو په مهال د مسکو په هوایي ډګر کې ونیول شو.

په بنو کې یو پولیس وژل شوی

د بنو پولیس وايي صدیق الله له کارځايه کور ته روان وو چې ډزې پرې وشوې

د خیبرپښتونخوا د بنو پوليس وايي تیره شپه نامالومه وسله والو د پولیسو يو هېډ کانسټېبل په ډزو وژلی دی.

د بنو پوليسو وياند اصف خان د اپرېل پر پینځمه مشال راډيو ته وويل چې وژل افسر صديق الله نومېده. د هغه په خبره نوموړی بنو ټاون شپ تاڼه کې د ډيوټۍ کولو وروسته کور ته روان وو چې په لاره کې پرې وسله والو ډزې وکړي.

د اصف خان په وينا د حملې وروسته وسله وال په تېښته کې برېالي شوي خو د لټون عمليات روان دي.

تراوسه د حملې ذمه واري چا نه ده منلې.

"افغان ځواکونو ارغنداب له طالبانو بېرته نیولی"

افغان عکسر په ارغنداب کې د عملياتو پر مهال. عکس-ارشېف

افغان امنیتي ځواکونو د کندهار ارغنداب ولسوالي له طالبانو بیرته نیولې ده.

د افغانستان دفاع وزارت د اپرېل پر پنځمه په یو بیان کې ويلي چې د دغې ولسوالۍ د نیولو لپاره د افغان امنیتي ځواکونو د اپریل د څلورمې د عملیاتو پر مهال په لسګونو وسله والو ته مرګ ژوبله اوښتې ده.

ځايي چارواکو هم ارغنداب ولسوالي د طالبانو له منګولو وتل تایید کړې دي.

د دفاع وزارت په بیان کې ادعا کړې چې په ارغنداب او شا وخوا سیمو کې یې د عملیاتو پر مهال لږ تر لږه ۳۷ وسله وال وژل شوي او له ۲۸ زیات ژوبل شوي دي.

د دې بیان ترمخه په دې عملیاتو کې د وسله والو ۹۰ موټر سایکلونه نیول شوي او په لوي مقدار کې وسله تباه شوې ده.

چارواکي وايي چې د حکومتي ځواکونو او وسله والو ترمنځ نښتو کې عامو خلکو ته هم زیان رسېدلی او ځینې یې کورونو پریښودلو ته مجبوره شوي دي خو چارواکو په دې اړه نور تفصیل نه دی ورکړی.

تر اوسه طالبانو په دې اړه څه نه دي ویلي.

پاکستان:کورونا وبا ۴۳ نور کسان وژلي دي

په پاکستان کې د کورونا وايرس ضد واکسين لګولو لړۍ دوام لري. ارشېف-عکس

په پاکستان کې کورونا وایرس ناروغۍ په تېرو ۲۴ ساعتونو کې ۴۳ کسان نور وژلي دي.

د دې ناروغۍ په اړه د پاکستان د صحت وزارت ځانګړې ویب پاڼې د اپرېل پر پنځمه لیکلي دي چې له دې سره په ملک کې له کورونا څخه د مړه شویو مجموعي شمېر ۱۴ زره ۸۲۱ ته رسېدلی دی.

ویب پاڼه لیکي چې په تېرو ۲۴ ساعتونو کې څلور زره ۳۲۳ کسان نور په دې ناروغۍ اخته شوي دي.

په پاکستان کې تر اوسه څه باندې شپږ لاکه ۷۸ زره کسان په کورونا اخته شوي خو تر شپږ لاکه اووه زره زیات ورڅخه جوړ شوي هم دي.

له افغانستان سره به په ماين پاکۍ کې مرستې ته دوام ورکوو: راس ويلسن

د فارياب ولايت ۱۲ کلن سميع الله چې د ماين په چاودنه کې يې پښه له لاسه ورکړې. عکس-ارشېف

په کابل کې د امریکا د سفارت شارژدافیر راس ویلسن ډاډ ورکړی چې د ماین پاکۍ په برخه کې به د دوی کلنۍ شل میلیونه ډالره مرسته جاري وي.

ویلسن دا خبره د اپرېل پر څلورمه پر داسې مهال پر ټویټر پاڼه په بیان کې کړې ده چې په نړۍ کې د ماین د خطرونو په اړه د پوهاوي نړیواله ورځ وه.

د افغان حکومت په وینا، یوازې په ۲۰۲۰م کال کې (۱۵۸۲) عام وګړي د ماینونو، ناچاودو توکو او د انسانانو په لاس د جوړو ماینونو په چاودنو کې وژل شوي یا ټپي شوي دي.

د دوی په وینا، د افغانستان په شپاړس سوه کیلوميټره مربع مځکه کې لا هم د ماینونو او ناچاوده مهماتو شتون خطر دی چې د عامو خلکو ژوند ته خطر پېښوي.

بهرني ځواکونه او تنخادار عسکر دې له ليبيا ووځي: چارلس ماييکل

چارلس مايکل. ارشېف-عکس

د اروپايي ټولنې د کونسل مشر چارلس مایکل غږ کړی چې ټول بهرني ځواکونه او تنخادار عسکر دې له لېبیا څخه ووځي.

نوموړي د اپرېل پر څلورمه په طرابلس کې خبري غونډې ته وویل، دا د قرارۍ لپاره شرط دی چې ټول بهرني وسله وال او ځواکونه له لېبیا ووځي.

چارلس مایکل په لېبیا کې د انتقالي حکومت رامنځ ته کېدل تاریخي بللی او د هیواد پر ټولو سیاسي ډلو یې غږ کړی چې له دې موقعې ګټه واخلي چې ارام او سوکاله هیواد جوړ کړي.

دا له هغه وروسته ده چې د ملګرو ملتونو د امنیت شورا هم تېره میاشت د لېبیا په جګړه کې له ښکېلو ټولو غاړو وغوښتل چې انتقالي حکومت ته دې د واک سوله ییز سپارنه باوري کړي.

یادې شورا ویلي چې په لېبیا کې عسکرو لرونکي هیوادونه دې بې له ځنډه خپل عسکر له دې هیواده وباسي.

جنوبي افریقې له پاکستانه دوهمه ۵۰ اووریزه لوبه وګټله

فخر زمان رن اوټ شو

جنوبي افریقې له پاکستانه د درې يو ورځنيوو کرکټ سياليوو د لړۍ دوهمه لوبه وګټله.

د اپرېل پر ۴مه په جوهانسبرګ کې شوې دې سيالۍ کې جنوبي افریقې لومړی بېټينګ وکړ او په ټولو ۵۰ اوورونو کې یې د شپږو لوبغاړو په اوټ‌کېدو ۳۴۱ منډې جوړې کړي.

پاکستان د فخر زمان د ۱۹۳ منډو په مټ د ۹ لوبغاړو په اوټ کېدو ۳۲۴ منډې وکړي او په دې توګه یې دا سیالي د ۱۷ منډو په توپير وبایلله. فخر زمان د لوبې غوره لوبغاړی وګڼل شو.

د دې سیاليوو لومړۍ لوبه پاکستان ګټلې وه. درېيمه به د اپرېل په ۷مه کېږي.

ایران وايي په ویانا کې به امریکا سره خبرې ونکړي 

د ايران د بهرنيو چارو مرستيال وزير عباس عراقچي د اپرېل پر څلورمه هغه راپورونه رد کړل چې تهران او واشنګټن به غير مستقيمې خبرې وکړي.

ایران وايي، په راتلونکې اوونۍ کې په ویانا کې د ۲۰۱۵ز کال اټومې تړون د بحالۍ په اړه پلان شويو خبرو اترو کې به له امريکا سره خبرې نه کوي.

د ايران د بهرنيو چارو مرستيال وزير عباس عراقچي د اپرېل پر څلورمه هغه راپورونه رد کړل چې تهران او واشنګټن به غير مستقيمې خبرې وکړي.

نوموړي وويل دوي به په ویانا کې له امريکا سره مستقیمې یا غیر مستقیمې خبرې ونه کړي.

د ایران د پلاوي مشر عراقچي وويل چې د تهران تګلاره څرګنده او ساده ده. د ده په وینا، امريکا باید په اټومې موافقې ورګده شي او ورسره سم پر ایران بندیزونه لرې کړي.

د بريتانيا، چین، فرانسې، جرمني، روسیې او د ایران سفارتکاران به د اپرېل پر شپږمه د اروپايي اتحادیې په ملاتړ په خبرو اترو کې برخه واخلي.

شپږ هېوادونو په دې موافقې کې پاتې دي، چې ايران بايد اټومې بنديزونه عملي کړي او د دې په بدل کې به د امريکا او نړيوال بنديزونه لرې کړل شي.

د امريکا پخوانی ولسمشر ډونلد ټرمپ په ۲۰۱۸ز کال کې په يو اړخيزه توګه له اټومي موافقې ووت، او پر تهران يې اقتصادي بندیزونه ولګول.

ایران د دې په غبرګون کې د تړون څخه په ورو ورو خپلې ژمنې کمې کړې.

د امريکا ولسمشر جوبایډن د تړون د بیا رغونې اشاره ورکړې خو د هغه اداره وايي ایران باید لومړی خپلو اټومي ژمنو ته ستون شي.

په سومالیا کې ځانمرګي لږ تر لږه ۱۰ تنه وژلي 

چارواکي وايي، دغسې پرون سهار الشباب وسله والې ډلې له موغادیشو سره نېږدې د پوځ پر دوو اډو هم حمله کړې وه. (انځور: ارشیف)

د سومالیا په سرښار موغادیشو کې پرون ناوخته په ځان وژونکي برید کې لږ تر لږه ۱۰ تنه وژل شوي دي.

د پولیسو ویاند صادق دودېشې ویلي چې وسله والو حمله له هټیو او یوې چایخانې سره نېږدې کړې ده. د ده په خبره، هغه ځای ته زیاتره ځوانان ورځي.

چارواکي وايي، دغسې د مارچ پر درېیمه سهار الشباب وسله والې ډلې له موغادیشو سره نېږدې د پوځ پر دوو اډو هم حمله کړې وه.

د پوځ یو قومندان محمد بیهي ویلي ، اودیګل او بریری ښارګوټو کې د پوځي اډو بهر په نښتو کې پوځ ۷۶ وسله وال وژلي او ۱۰ یې نیولي دي.

تراوسه الشباب وسله والې ډلې له په دې اړه څه نه دې ویلي.

روسیې له امریکا سره د خلايي همکاریو موافقه تر ۲۰۳۰مه وغځوله

روسیې او امریکا د فضايي همکاریو موافقه په ۱۹۹۲ز کال کې لاسلیک کړې وه چې په تیرو وختنو کې څلور وارې غځول شوې ده.

د روسیې حکومت له امریکا سره د خلايي همکاریو موافقه تر ۲۰۳۰ز کال پورې وغځوله.

د روسیې حکومت په یوه اعلامیه کې وویل، چې وزیراعظم میخایل میشوستین د اپرېل پر درېیمه دا موافقه منظور کړه او د دې پر غځولو یې لاسلیک وکړ.

روسیې او امریکا د فضايي همکاریو موافقه په ۱۹۹۲ز کال کې لاسلیک کړې وه چې په تیرو وختنو کې څلور وارې غځول شوې ده.

د دې موافقې موخه د د امریکا د ناسا او روسیې د کاسموس ترمنځ د خلايي چارو اړوندو پروژو او څېړنو ته لار برابرول دي.

د روسیې او امریکا ترمنځ دوه اړخیزې همکارۍ هغه مهال هم دوام درلوده چې مسکو د اوکراین کریمیا ټاپو وزمه له ځان سره یو ځای کړه او واشنګټن پر روسیې بندیزونه ولګول.

تایوان: د اورګاډي حادثه کې لسګونه کسان مړه او ژوبل شوي

د تایوان د ریل ګاډي انتظامیه وايي چې دا ریل ګاډی په هوالین سیمه کې له ټرک سره تر جنګیدو وروسته له پټلۍ واوښت.

په تایوان کې له پټلۍ څخه د ریل ګاډي اوښتو پېښه کې ۵۰ کسان وژل شوي او ۱۷۵ نور ټپیان شوي دي.

دا په یاد هېواد کې په تیرو څو لسیزو کې د اورګاډي تر ټولو بده پېښه ده. د اپریل پر درېیمه، مرستندويه کارکونکو د رېل ګاډي له پټلۍ څخه د اوښتو ډبو د ملبې لرې کولو کار پيل کړ.

له متاثره کسانو سره د خپګان شریکولو په موخه به په تایوان کې درې ورځې بېرغونه نیم ځوړند وي.

د تایوان د رېل ګاډي انتظامیه وايي چې دا رېل ګاډی په هوالین سیمه کې له ټرک سره تر جنګېدو وروسته له پټلۍ واوښت. اور ګاډی له تايي پي څخه ختیځې سيمې تايي تونګ ته روان و.

ټاکل شوې وه چې ولسمشر څايي اینګ وین به د اپریل پر درېیمه له ټپیانو سره د لیدو لپاره د پېښې ځای ته ولاړ شي.

واشنګټن کې د کانګرېس ودانۍ یو ساتونکی وژل شوی

په واشنګټن کې د برید ځای د ۲۰۲۱ز کال د اپرېل پردویمه

د امریکا په پلازمېنه واشنګټن ډي سي کې د کانګرېس ودانۍ پر امنیت ساتونکو د موټر خېژولو برید کې یو پولیس وژل شوی دی.

پولیسو موټر چلوونکی په ډزو وژلی دی. د دوی په وینا، د هغه چاړه هم په لاس کې وه او پولیسو ته یې ګواښ کړی و.

د کېپیټل هیل ماڼۍ د پولیسو مشر
د کېپیټل هیل ماڼۍ د پولیسو مشر

پولیس وايي، په سمدستي توګه داسې نه ښکاري چې دا "له ترهګرۍ سره تړلې پېښه" وه.

د وژل شوي مشکوک بریدګر ورور واشنګټن پوسټ ورځپاڼې ته ویلي چې ورور یې په نشو او وهم اخته و.

د ده په وینا، کورنۍ د هغه د ذهني روغتیا په اړه اندېښنه درلوده.

د کانګرېس غړو د دې برید پر وخت غونډه نه درلوده.
په روان (۲۰۲۱ز) کال کې دا دویم پولیس دی چې د کانګریس ودانۍ د امنیت ساتلو پر مهال وژل شوی دی.

د افغان مرکچي پلاوي ښځینه غړو د امریکا کانګرېس له یو شمېر غړو سره لیدلي

د امریکا کانګرس

د افغان حکومت د مرکچي پلاوي ښځینه غړو د امریکا د کانګرېس له یوشمېر غړو سره د سولې پر بهیر او په دې بهیر کې د مېرمنو پر ونډه خبرې کړې دي.

د مرکچي پلاوي یوه غړې فوزیه کوفي وایي، دوی د امريکا له کانګرېس غړو او سیاستوالو د داسې سولې د ملاتړ غوښتنه کړې چې جمهوري ارزښتونه پکې خوندي وي.

نوموړې د اپرېل پر دویمه مشال راډیو ته وویل: "تر ډېره د ټاکنو او ولسواکۍ د اصولو او ارزښتونو پر خوندیتوب خبرې وشوې، دويمه موضوع د سولې په بهیر کې د ښځو حقونه او د ښځو د حقونو د دفاع مسله وه. د سولې ترڅنګ په افغانستان کې د ښځو او بشري حقونو ملاتړ هم مهم دی."

افغان مېرمنو تر دې وړاندې اندېښنه ښودلې وه چې سیاست ته د طالبانو په راتګ یې ممکن یوشمېر لاسته راوړنې له منځه ولاړې شي.

طالبانو بیا ویلي،" د اسلامي اصولو په چوکاټ کې" د ښځو ټولو حقونو ته ژمن دي.

ایران او نړیوال قدرتونه د اټومي تړون په اړه غونډه کوي

د اټومي انرژۍ نړیوال سازمان غونډه. ارشیف-انځور

ایران او د نړۍ د ځواکمنو هیوادونو استازي به د اپرېل پر شپږمه له ایران سره د اټومي تړون په اړه په ویانا کې غونډه کوي.

اروپايي ټولنې په یوه بیان کې ویلي دا پرېکړه د اپرېل پر دوهمه نېټه د غو استازو په ان لاین یا د انټرنېټ پرلیکه غونډه کې کړې ده.

بیان زیاتوي چې ایران او په دې تړون کې شامل هیوادونه دې ته تیار دي چې تړون ته د امریکا د بیرته راتګ هرکلی وکړي.

د ایران سرکاری رسنیو د دې هېواد د بهرنیو چارو د مرستیال وزیر عباس عراقچي له خولې ویلي چې دې تړون ته د امریکا ستنېدل، هیڅ خبرو اترو ته ضرورت نه لري.

ده ویلي چې د دې لپاره لاره ډېره څرګنده ده.

د امریکا ولسمشر جوبایډن اشاره ورکړې چې دی د دې تړون بیا ژوندي کولو ته تیار دی خو د هغه اداره ټینګار کوي چې ایران باید لومړی خپلو اټومي ژمنو ته ستون شي.

ایران په دې ژمنو کې زیاتره د امریکا د بندیزونو په غبرګون کې ځنډولې دي.

نور پورته کړئ

ځانګړې پاڼې

له موږ سره اړیکي

XS
SM
MD
LG