د پاکستان پوځ مشر جنرال راحیل شریف د ترهګرۍ په تور د شپږو زندانیانو د اعدامولو رسمي کاغذونه یا وارنټونه لاسلیک کړي.
د پوځ عامه اړیکو دفتر ای اېس پي ار بېګا په یوه لنډ بیان کې دا کسان ((خطرناکه ترهګر)) بللي او ویلي یې دي چې دوی ته پوځي عدالتونو پخوا د مرګ سزا اورولې وه.
ای اېس پي ار د دې کسانو نومونه نه دي په ډاګه کړي. بلې خوا ته د پاکستان کورنیو چارو وزارت د ۱۷ داسې بندیانو نومونه خپاره کړي چې ورته به د مرګ سزا ورکول کېږي.
په دوی کې د عقیل چې د ډاکتر عثمان په نوم هم پېژندل کېږي، کامران، احسان عظیم، عمر ندیم، زاهد، اخلاص احمد چې د روسي په نوم هم یادېږي، ارشد محمود، غلام سرور، زبیر احمد، عطاالله، محمد اعظم، محمد بهرام خان، شفقت حسین، محمد علي، ارشد محمود، جلال او عبدالرزاق شامل دي.
