د لاسرسي ځای

تازه خبر

خبرونه

په غزني کې څوارلس وسله وال طالبان وژل شوي دي

د غزني چارواکي وايي، د دغه ولايت په دوو ولسواليو کې د طالبانو پر ضد په عملياتو او يوه نښته کې څلوارلس تنه وسله وال وژل شوي او څلور نور ژوبل دي.

دوی وايي، په وژلو شويو کسانو کې پنځه تنه يې پاکستانيان ښکاري. چارواکي وايي دغه عملیات په ( اب بند ) او مقر ولسوالیو کې ترسره شوي دي. تر اوسه پورې طالبانو د يوې پېښې په اړه څه نه دي ویلي.

تېره ورځ په غزني ښار کې د يوه مقناطيسي ماين د چاودېدو له امله د اندړو د پاڅون پنځه تنه جنګيالي ژوبل شوي وو او د چاودنې مسووليت طالبانو منلی وو.

د نننۍ ورځې ټول خبرونه وګورئ

پېښور کې وسله والو یو ديني عالم وژلی دی

پولیس وايي، پېښه د پېښور په فقیر اباد کې شوې ده.

پوليس وايي، وسله والو په پېښور کې یو دیني عالم ویشتلی دی.

د پېښور د پولیسو یوه چارواکي عالمزېب خان د جنورۍ پر ۱۷مه مشال راډیو ته وویل، دیني عالم شیخ عبدالحميد د جنورۍ پر ۱۶مه ماخوستن مهال په فقیراباد کې له مدرسې کور ته پر لار وو چې موټر سايکل سپرو وسله والو ورباندې ډزې وکړې.

ده وویل، په برید کې د شیخ عبدالحميد ورور شیخ محمد ژوبل دی.

د نوموړي په وینا بریدګر تښتېدلي دي، د پېښې مقدمه یې کښلې او پلټنې يې پيل کړې دي.

پوليسو دا نه دي ويلي چې حمله د ذاتي دښمنۍ په وجه شوې که تر شا يې بله وجه ده.

د حملې ذمه واري هم چا نه ده منلې.

اسټرالیا د ټینس نومیالی لوبغاړی نوواک جوکووېچ هېواد ته ستون کړ

نوواک جوکووېچ د نړۍ پر کچ د ټینس لومړی مقام لرونکی لوبغاړی دی - انځور له ارشیفه

د اسټرالیا یو عدالت له لوري د ټینس د نومیالي لوبغاړي نوواک جوکووېچ د غوښتنلیک تر ردېدو وروسته، حکومت هغه له هېواده وایست.

نوواک جوکووېچ چې د کووېډ-۱۹ واکسین یې نه دی کړی، اسټرالیا ته تر رسېدو وروسته له قانوني ستونزو سره مخامخ شو او ویزه یې لغوه شوه.

جوکووېچ او ورسره پلاوی یې چې یوه توقیف ځای کې ساتل کېدل، د جنورۍ پر ۱۶مه د مېلبرن هوايي ډګر ته ورسول شول او د دوبۍ په لوري یې پرواز وکړ.

تمه وه چې نوموړی د جنورۍ پر ۱۷مه د اسټرالیا د ټینس په اتلولۍ یا اسټرالیین اوپن سیالیو کې ګډون وکړي.

سربیايي نوواک جوکووېچ نهه واره د اسټرالیا د ټینس دا اتلولي ګټلې ده.

د نړۍ د ټینس دغه اتل په یوه بیان کې ویلي چې د اسټرالیايي چارواکو پرېکړې خواشینی کړی دی.

ټېکساس پېښه: برتانیا په پلټنو کې له امریکا سره همکاري کوي

د جنورۍ پر ۱۶مه د ټېکساس ایالت په کولېوېل کې پولیسو له عبادتځای سره نېږدې لارې تړلې وې.

د برتانیا د ترهګرۍ ضد چارواکو تر هغې وروسته له امریکايي چارواکو سره په قضیه کې همکاري پیل کړې چې د امریکا په ټېکساس ایالت کې د یهودانو پر کنیسې (عبادتخانې) د یوشمېر کسانو د یرغمل کوونکي پېژندګلوي وشوه.

هغه سړی ۴۴ کلن وو، ملک فیصل اکرم نومېږي او برتانیوی وګړی وو.

امریکايي ولسمشر جو بایډن د جنورۍ ۱۵مې پېښه ترهګري بللې. پر هغه ورځ د ټېکساس له ډیلس ښار سره نېږدې په کولېوېل سیمه کې یو کس دیهودانو په عبادتځای کې څلور کسان تر شاوخوا ۱۰ ګېنټو یرغمل کړي ول.

وروسته د امریکا د پلټنو وفاقي ادارې (اېف بي ای) کارکوونکي عبادتځای ته ننوتل او د هغه کس په وژلو یې څلورواړه یرغمل شوي کسان روغ رمټ راخوشې کړل.

د برتانیا د بهرنیو چارو وزارت تایید کړې چې یرغمل کوونکی د هغه هېواد وګړی وو.

د برتانیې پولیس وايي، د ترهګرۍ ضد چارواکي په دې لړ کې له خپلو امریکايي همکارانو سره په رابطه کې دي.

د چین په پلازمېنه کې د کورونا اومېکرون لومړی ناروغ میندل شوی

بیجینګ او د هېواد په نورو ښارونو کې د اولمپیک لوبو تر پېليدو مخکې د کوورنا وايرس ټيسټونه زيات کړل شوي دي.

د چين په بيجنګ ښار کې د کورونا وايرس نوې بڼې اوميکرون لومړی ناروغ میندل شوی دی.

دا له هغه يوه اوونۍ مخکې ده چې په چين کې د اولمپک ژمنۍ لوبې پيليږي.

د هيډيان ضلعې چارواکو ويلي دي چې د کورونا وایرس په دې نوې بڼه اخته شوي کس د استوګنې ځای او د کار ځای تړل شوي او په زرګونه خلک یې معاینه کړي دي.

بیجینګ او د هېواد په نورو ښارونو کې د اولمپیک لوبو تر پېليدو مخکې د کوورنا وايرس ټيسټونه زيات کړل شوي دي.

په چين کې د اولمپيک ژمنې لوبې د فرورۍ پر څلورمه پېلېږي.

هند د کورونا له کبله په پنځو ریاستونو کې پر سیاسي غونډو بندیز لګولی

هند د نړۍ یو له هغو هیوادونو دی چې کورونا وایرس ډېر ځپلی دی

د هند د ټاکنو کميشن د هېواد په پينځو رياستونو کې د کورونا وايرس ډيريدو له وجې پر سياسي جلسو بنديز غځولی دی.

یاد کمېشن د جنورۍ پر ۱۵مه په تازه لارښوونو کې اجازه ورکړې چې تر ۳۰۰ لږ خلک کولای شي چې په یو بند ځای کې د سیاسي هلو ځلو لپاره راغونډ شي. دا بنديز به د جنورۍ ۲۲مې پوري دوام لري.

دا په داسې حال کې ده چې د هند تر ټولو زيات نفوس لرونکي ریاست اتر پرديش کې په راتلونکې مياشت کې رياستي انتخابات کيږي.

په دې شمالي رياست کې چې بهارتيا جنتا پارټۍ واکمنه ده، دا انتخابات مهم بلل کيږي ځکه چې دا به د ۲۰۲۴ز کال عامو ټول ټاکنو لپاره زمينه برابره کړي.

انتوني بلینکن: امریکایان د افغانانو ملاتړ ته ژمن دي

د ارشیف انځور

د امریکا د بهرنیو چارو وزیر وايي، د امریکا وګړي د افغانانو ملاتړ ته ژمن دي.

انتوني بلینکن د جنورۍ پر ۱۵مه، په خپل ټویټر کې لیکلي چې د افغانستان پر موضوع یې د بشري چارو او د بېړنیو مرستو د همږغۍ لپاره د ملګرو ملتونو د سرمنشي له مرستیال مارټین ګریفیتس او د سره صلیب نړیوالې کمېټې له مشر پیټر ماوریر سره د انټرنیټ له لارې لیده کاته کړي دي.

نوموړي ویلي چې په دې لیدو کتو کې یې له ملګرو ملتونو او سره صلیب سره د امریکا د موجودو هڅو په اړه د همکارۍ پر پیاوړتیا خبرې کړې دي.

د امریکا د بهرنیو چار وزیر له NBC ټلویزیون سره په خپله یوه تازه مرکه کې ویلي وو چې هیواد یې هڅه کوي، د نړیوالې ټولنې په همکارۍ اړمنو افغانانو ته بشري مرستې ورسوي.

بل پلو، د ملګرو ملتونو د بشري مرستو د همږغۍ اداره وايي، په افغانستان کې ۹۵ فیصده وګړي کافي خواړه نه لري. د دې ادارې د اسیا پېسېفیک د څانګې مطبوعاتي مسوول پېیر پرسن د جنورۍ پر ۱۵مه، په ټویټر کې لیکلي، په افغانستان کې زیاتې میندې خپل خواړه هم خپلو ماشومانو ته ورکوي، چې له لوږې وژغورل شي.

ملګرو ملتونو خبرداری ورکړی چې د افغانستان نیمايي وګړي د بېوزلۍ له کبله له لوږې سره مخامخ دي، چې عاجلو بشري مرستو ته اړتیا لري.

طالبانو د ملګرو ملتونو لخوا له امریکا د افغانستان د پانګې د خلاصون غوښتنه وستایله

طالب چارواکي وايي، داسې دریځ نیول د ملګرو ملتونو بې‌پریتوب او د ملتونو د حقوقو په اړه د دغه مهم نړیوال سازمان وقار ته ګټه رسوي.

د ملګرو ملتونو سرمنشي انتونیو ګویتېرېش له واشنګټنه هیله وکړه چې د افغانستان کنګل شوې شتمنۍ ورپرېږدي.

ګویتېرېش د جنورۍ پر ۱۳مه په نیویارک کې په یوه خبري غونډه کې همداراز د ځینو شرایطو له مخې د شاوخوا ۹،۵ میلیارد ډالرو په ارزښت د افغانستان د کنګل شویو اسعارو او شتمنیو د ازادېدو غوښتنه وکړه.

ګویتېرېش وویل، د افغانستان لپاره د نړیوالو مالي مرستو پرېښودنه وغوښتله چې په سرکاري ادارو کې د کارمندانو تنخاګانې ورکړل شي او دولتي ادارې د روغتیا او تعلیم غوندې ضروري خدمات وړاندې کړای شي.

د طالبانو ویاند ذبیح‌ الله مجاهد د جنورۍ پر ۱۴مه پر ټویټر لیکلي چې د دوی حکومت د ملګرو ملتونو د سرمنشي لخوا له امریکا د افغانستان د پانګې د خلاصون غوښتنه ستایي.

د مجاهد په وینا، داسې دریځ نیول، د ملګرو ملتونو بې‌پریتوب او د ملتونو د حقوقو په اړه د دغه مهم نړیوال سازمان وقار ته ګټه رسوي.

واشنګټن د افغانستان د مرکزي بانک شاوخوا ۹،۵ میلیارده ډالره شتمنۍ کنګل کړې دي.

امريکا له طالبانو غواړي چې بشري حقونه په ځانګړي ډول د ښځو حقوق رعایت کړي او یو ټول‌ شموله حکومت رامنځته کړي.

خېبر پښتونخوا کې د جنورۍ پر ۱۷مه، د پولیو څاڅکو بهیر پیلېږي

په دې پوليو ضد کمپاين کې به تر ۲۰ زرو زيات د صحت کارکوونکي په کورونو، روغتونونو، صحت بنيادي مرکزونو او بسونو اډو کې ماشومانو ته د ګوزڼ مخنيوي څاڅکي ورکوي.

په خيبر پښتونخوا کې د ۲۰۲۲ز کال لومړی د پوليو مخنيوي کمپاين به د جنورۍ پر ۱۷مه پیلېږي.

په پېښور کې د پوليو مخنيوي ادارې له دفتره د جنورۍ پر ۱۴مه مشال رېډيو ته په رالېږلې شوې خبرپاڼه کې ويل شوي چې په دې کمپاين کې به، ۴۴ لکو څخه زیاتو هغو ماشومانو ته، د ګوزڼ مخنيوي څاڅکي ورکول کېږي چې عمرونه یې له پنځو کالو نه کم وي.

په خبرپاڼه کې راغلي چې په دې پوليو ضد کمپاين کې به تر ۲۰ زرو زيات د صحت کارکوونکي په کورونو، روغتونونو، صحت بنيادي مرکزونو او بسونو اډو کې ماشومانو ته د ګوزڼ مخنيوي څاڅکي ورکوي.

دا په داسې حال کې ده چې پروسږکال په پاکستان کې د پوليو اته کيسونه رپورټ شوي ول چې په کې يو په خېبر پښتونخوا کې و.

اسټرالیا پر نړیوال کچ د ټینس لومړي مقام لرونکي نوواک جوکووېچ ویزه لغوه کړه

جوکووېچ او د هغه د وکیلانو ډلې په سمدستي ډول په دې اړه څه نه دي ویلي.نوموړی د ۲۱مې لویې اتلولۍ د ګټلو په تکل دی.

اسټرالیا پر نړیوال کچ د ټینس په سیالیو کې د لومړي مقام لرونکي نوواک جوکووېچ ویزه لغوه کړې ده چې ورسره ښايي په مېلبرن کې د لویې اتلولۍ په سیالیو کې د خپل اعزاز د دفاع لپاره د هغه سربیايي لوبغاړي هیلې ختمې شي.

دا په داسې حال کې ده چې په مېلبرن کې د ټینس سیالیو پیلېدو ته څو ورځې وخت پاتې دی. د اسټرالیا د مهاجرت چارو وزیر الېکس هاک د جنورۍ پر ۱۴مه په یو بیان کې وویل، د روغتیا او د ښه نظم لپاره او د ولسي ګټې پر اساس د ویزې چارو په اړه د خپلو قانوني اختیاراتو په استعمالولو د جوکووېچ ویزه منسوخوي.

جوکووېچ او د هغه د وکیلانو ډلې په سمدستي ډول په دې اړه څه نه دي ویلي. نوموړی د ۲۱مې لویې اتلولۍ د ګټلو په تکل دی.

د اسټرالیا له قانون سره سم، جوکووېچ د دې پرېکړې پرضد د درخواست دایرولو حق لري. تر اوسه روښانه نه ده چې جوکووېچ به بیا حراستي خونې ته استول کېږي او که نه؟

د قانوني چارو پوهان وايي، هغه کولای شي چې تر هغې مودې چې یې قضیه په عدالتونو کې روانه وي، د لنډمهالی ویزې غوښتنلیک ورکړي. له دې سره به هغه وکولای شي چې ازاد پاتې شي او په سیالیو کې برخه واخلي.

جوکووېچ د واکسین په اړه شکمن دی او د طبي استثنا په ترلاسه کولو مېلبرن ته تللی وو. خو اسټرالیايي حکومت هلته پر ورتلونکو کسانو د کووېډ-۱۹ واکسین لازمي کړي دي.

خیبر پښتونخوا کې افغان کډوالو ته د کووېډ-۱۹ واکسین لګول پیل شوي

د خیبر پښتونخوا روغتیا چارواکي وايي، دا کیمپېن چې د جنورۍ پر ۱۳مه په نوښار کې د کډوالو له کیمپونو پیل شو، به تر مارچ پورې روان وي. انځور- ارشیف

د خیبر پښتونخوا روغتیا ادارې په صوبه کې د افغان کډوالو په ۱۲ کیمپونو کې د کووېډ-۱۹ ناروغۍ واکسیني کیمپېن پیل کړی دی.

د روغتیا په اداره کې د پروژې مشر ډاکتر افتخار علي د جنورۍ پر ۱۳مه مشال رادیو ته وویل، دا کیمپېن چې د جنورۍ پر ۱۳مه په نوښار کې د کډوالو له کیمپونو پیل شو، تر مارچ پورې به روان وي.

د نوموړي په خبره، هر هغه کډوال چې په پاکستان کې رجسټر وي، کولای شي چې واکسین شي. د ملګرو ملتونو د کډوالو اداره (یو اېن اېچ سي ار) وايي، په پاکستان کې شاوخوا ۱۴ لکه رجسټر افغان کډوال دي چې زیاتره یې په خیبر پښتونخوا کې میشت دي.

افتخار البته دا ونه ویل چې ایا حکومت به هغه لکونه کډوال هم واکسینوي چې په پاکستان کې د اوسېدو قانوني اسناد نه لري او که څنګه؟

په همدې حال کې په ډېسېمبر کې د خیبر پښتونخوا د روغتیا ادارې وویل چې د واکسینېدو لپاره یې د شناختي کارډ شرط ختم کړی دی.

هغې ادارې دا اقدام تر هغې وروسته وکړ چې د قبایلي سیمو زیاتره اوسېدونکي، په تېره ښځې، د شناختي کارډ نه لرلو له وجې له واکسینه د پاتې کېدو له ګواښ سره مخامخ شوې.

په جرمني او بلغاریا کې د کورونا وایرس پېښې بیا زیاتې شوې

د جرمني د صحت چارواکو ۸۰ زره ۴۳۰ د کورونا نوي مثبت کېسونه رپورټ کړي دي. انځور- ارشیف

د جنورۍ پر ۱۲مه په جرمني او بلغاریا کې د کورونا وایرس تر ټولو زیاتې مثبتې پېښې ریکارډ شوې دي.

دا په داسې حال کې ده چې د صحت نړیوالې ادارې (ډبلیو اېچ او) په اروپا کې له غربي تر شرقي هېوادونو پورې د کورونا زیات خپرېدونکي اومېکرون بڼې د خپرېدو خبرداری ورکړی دی.

د جرمني د صحت چارواکو ۸۰ زره ۴۳۰ د کورونا نوي مثبت کېسونه رپورټ کړي دي.

دا په هغه هېواد کې د دې وبا له پیل راهیسې په یوه ورځ کې د مثبتو پېښو تر ټولو زیاته شمېره ده چې د تېر کال د نومبر میاشت کې په یوه ورځ کې د ۷۶ زرو مثبتو پېښو له شمېرې هم اوښتې ده او له دې سره د جرمني د مثبتو پېښو شمېره له ۷۶ لکو ۶۱ زرو او ۸۰۰ اوښتې ده.

د جنورۍ پر ۱۲مه د کورونا وایرس له وجې د مړو شمېر هم ۳۸۴ ته لوړ شوی دی چې له دې په جرمني کې د د دې وبا له وجې د مړو شویو کسانو شمېر یو لک ۱۴ زرو ۷۳۵ ته رسېدلی دی.

بلخوا په جنوب شرقي اروپایي هېواد بلغاریه کې د جنورۍ پر ۱۲مه د کورونا اووه زره ۶۲ مثبتې پېښې رپوټ شوي دي.

بلغاریه د اروپایي ټولنې تر ټولو کم واکسین شوی هېواد دی چې د ۶.۹ میلیونه ابادۍ یې له ۲۸ سلنه زیات وګړي په پوره ډول واکسین شوي دي.

کوټه کې د ځوان ډاکټرانو او پوليسو ترمنځ نښته کې ګڼ کسان ژوبل شوي

د ځوان ډاکټرانو سازمان وايي، پولیسو یې مظاهرچيان په ډنډو وهلي چې پکې تر ۱۰ زيات ډاکټران ژوبل شوي او تر ۵۰ پورې یې نيولي دي.

په کوټه کې د احتجاج کوونکو ځوان ډاکټرانو او پوليسو ترمینځ نښته کې ګڼ کسان ژوبل شوي دي.

د مشال راډیو خبريال وايي، د جنورۍ پر ۱۲مه چې کله د ځوان ډاکټرانو سازمان غړي پر انسکمب سړک احتجاج ته راوتل نو پولیسو يې مخنيوي کاوو چې د دواړو خواو ترمینځ اخ وډب پیل شو.

د ځوان ډاکټرانو سازمان مشال رېډيو ته وويل چې پولیسو یې مظاهرچيان په ډنډو وهلي چې پکې تر ۱۰ زيات ډاکټران ژوبل شوي او تر ۵۰ پورې یې نيولي دي.

بلخوا پوليس وايي، مظاهره چیانو ډاکټرانو تر ټاکلي ځایه تېری وکړ او دوی مجبوره شول چې له مخکې تګ څخه يې راوګرځوي.

د ځوان ډاکټرانو سازمان روغتونونو ته د طبي سهولتونو ورکولو، د سرکاري روغتونونو د شخصي کولو د ممکنه پلان مخالفت او د صوبې صحت څانګې د سېکرېټريانو له څوکيو څخه د لیرې کولو غوښتنه کوي.

حکومت وايي، د ډاکټرانو جایزه غوښتنې مني خو د روغتونونو شخصي کولو هېڅ پلان نه شته.

ننګرهار کې چاودنې دوه ښځې وژلي

د ننګرهار چارواکي وایي چې د لالپورې ولسوالۍ اړوند فتیح مېنه سیمه کې په یوه کور کې د لاسي بم له چاودنې د یوې کورنۍ دوه ښځې وژل شوي او یوه ټپي شوې ده.

د ننګرهار د اطلاعاتو او کلتور ریاست له لورې د جنورۍ پر ۱۲مه نېټه رسنیو ته په استول شوي پېغام کې ویل شوي چې د پېښې ښکار شوې مېرمنو له غره څخه د خاشاکو پنډ کې لاسي بم راوړی و چې د پنډ د غورځولو پر مهال چاودلی او یاده مرګ ژوبله یې رامنځته کړې ده.

د ننګرهار لالپوري ولسوالي له ډیورنډ کرښې سره جوخت موقعیت لري.

د دې ولسوالۍ په بېګانانو سیمه کې هم د جنورۍ پر ۱۰مه د یوه ښوونځي تر څنګ د هاوان یوه ناچاودلې سرګولوله د جوارو د پولیو خرڅوونکي له ریړې سره چاودلې وه چې د پولۍ خرڅوونکي په ګډون په کې نهه ماشومان وژل شوي وو او څلور یې ټپیان کړي وو.

د هاوان دا سرګولوله هم یو ماشوم د جوارو د پولیو د رانیولو لپاره راوړې وه.

حیات پرېغال له حکومتي مقدمو ازاد

حیات پرېغال

په اسلام اباد کې د انټرنيټي جرمونو د قضيو څېړلو يوه عدالت د جنورۍ پر ۱۱مه د بشري حقونو فعال حيات پرېغال پرضد د حکومت جوړ کړی هغه کیس ختم کړی دی چې نوموړي پکې د غيرقانوني ډلو لپاره پر ان لاين تبليغاتو تورن وو.

پرېغال نن (د جنورۍ په يوولسمه) مشال راډيو ته وويل، چې دا کیس درې نيم کاله مخکې جوړ شوی خو نن د خپل وکيل لطيف اپرېدي په وکالت پر دوی لګېدلي ټول کيسونه ختم کړل شول. هغه زیاته کړه چې دی به خپله مبارزه روانه ساتي.

د يادونې وړ دي چې حيات پرېغال د ۲۰۱۸ز کال د جولای پر پینځمه نېټه په ډېره اسماعيل خان کې امنیتي ادارو بې له خبرولو له خپله کوره وړی وو او د پینډۍ په اډاياله جېل کې یې بندي کړی وو. نوموړی د ۲۰۱۸ز کال د اکتوبر پر ۱۵مه نېټه په ضمانت له جېله راخلاص شو خو نوم یې په اې سي اېل کې واچول شو.

حيات پرېغال د جنوبي وزیرستان د لدې سیمې اوسېدونکی دی. نوموړی د پښتون ژغورنې غورځنګ پخوانی او د ملي جمهوري غورځنګ اوسنی غړی دی.

د ناروې کډوالو کونسل: په ميليونونو افغانان مرستو ته اړتيا لري

په افغانستان کې بې کوره کړل شوي کورنۍ. انځور - ارشیف

د کډوالو لپاره کارکوونکې د ناروې د کډوالو کونسل د ملګرو ملتونو له هغې غوښتنې سره خپل غږ ملګری کړی چې وايي، په افغانستان کې دې د بشري ناورين لا زیاتېدو مخنيوي لپاره پینځه اربه ډالر مرسته وشي.

د دې کونسل مشر يان انګلينډ د جنورۍ پر ۱۱مه په يوه خبرپاڼه کې ويلي چې په ميليونونو افغانان خوراکي توکو او ژمنيو مرستو ته اړتيا لري.

هغه زیاته کړې چې په کابل کې ډيری بې کوره شوي خلک په موقتي سرپناوو کې په ډېر بد يخ کې شپې سبا کوي.

په افغانستان کې طالبانو د اګست پر ۱۵مه حکومت ونيو. تر هغه وروسته اقتصاد خراب شوی او روزګار کم شوی. همداراز د دوی په رسميت نه پيژندو له امله بهرنۍ مرستې ودرېدلې دي.

د کابل مظاهرچیان: د طالبانو له حکومته د تعليم او کار حق غواړو

په کابل کې ښځو د مظاهرې پر مهال. انځور- ارشیف

د جنورۍ پر ۱۱مه په کابل کې ښځو يو ځل بيا د خپلو حقونو لپاره مظاهره کړې ده.

پر ټولنيزو رسنيوو د دې مظاهره چيانو په خپرو شوو ويډيو ګانو کې ښکاري چې دوی د طالبانو له حکومته د تعليم او کار حق غواړي.

طالبانو د اګست په نيمايي کې د افغانستان حکومت تر نيولو وروسته له شپږم ټولګي اخوا د نجونو تعليم بند کړی او په ګڼو وزارتونو کې یې د ښځو د کار مخنیوی کړی دی.

دوی دريځ لري چې په مناسب وخت کې د شريعت چوکاټ په برابرولو سره به د دې اجازه ورکړي. خو د دې چوکاټ تشريح یې نه ده کړې.

قزاقستان: د مظاهره چیانو ضد عملیاتو په ترڅ کې ۸زره کسان نیول شوي

قزاقستان کې پولیسو د مظاهرې یو تن ګډون والی نیولی .

د قزاقستان د کورنیو چارو وزارت وایي، په دې هېواد کې د مظاهره چیانو ضد عملیاتو په ترڅ کې نژدې اته زره کسان نیول شوي دي.

په عین حال کې د قزاقستان ولسمشر قاسم جومارت توقاییف وایي چې په الماتي او نورو ښارونو کې نظم بېرته عادي شوی دی.

د راپورونو له مخې الماتي د پراخو اعتراضونو شاهد و او معترضانو د یوې لنډې مودې لپاره هم د دې ښار هوایي ډګر نیولی و.

ولسمشر توقاییف پرون دوشنبه(د مرغومي ۲۰مه) د ګډو ګټو د تړون د سازمان غونډې ته په وینا کې وویل چې تر اوسه د مړینو دقیق ارقام معلوم نه دی او په دې اړه څېړنه روانه ده.

تر دې یوه ورځ مخکې د قزاقستان د روغتیا وزارت د مړینو شمېر۱۶۴ ښودلی و.

دغه اعتراضونه د جنوري په دوهمه د قزاقستان له لویدیځه د تیلو او ګازو د بیو د لوړېدو پر وړاندې پیل شول چې وروسته د دې هېواد ټولو لویو ښارونو ته پراخ شول.

نیو یارک: اورلګېدنه کې ۱۹ کسان وژل شوي

مرستندویان د جنورۍ پر نهمه په برونکس کې په ودانۍ کې د اور وژلو هڅه کوي.

امریکايي چارواکي وايي، د نهو ماشومانو په ګډون لږترلږه ۱۹ کسان هغه وخت مړه شول، چې د نیو یارک ښار په برونکس سیمه کې یوې لویې ودانۍ اور واخیست.

د هغه ښار د اوروژنې ادارې ویلي، د جنورۍ پر نهمه د دې ۱۹ منزله ودانۍ د اور مړه کولو لپاره ۲۰۰ اوروژونکي لاس په کار شول.

په دې اورلګېدنه کې ۶۳ کسان ټپیان شوي، چې له ډلې یې ۳۲ کسان په روغتونونو کې بستر دي.

چارواکي وايي، د اورلګېدنې د علت په اړه څېړنې کېږي.

پاکستان کې په یو شواروز کې د کورونا وایرس ۱،۶۴۹ پېښې ثبت شوي

په کراچۍ کې لسګونه خلک په قطار کې درېدلي چې د کووېډ-۱۹ واکسیني ستنې ولګوي - انځور له ارشیفه.

په پاکستان کې د کورونا وايرس د نوې بڼې اومېکرون د پېښو تر ثبتېدو وروسته په هغه هېواد کې په ۲۴ ساعتونو کې ۱،۶۴۹ پېښې ثبت شوې دي.

په پاکستان کې یو ځل بیا د کووېډ-۱۹ ناروغانو شمېر په زیاتېدو دی او د کورونا وايرس وبا په اړه د پاکستان حکومتي ووبپاڼې د جنورۍ پر ۱۰مه نېټه ليکلي چې په تېرو ۲۴ ساعتو کې له ناروغۍ څخه درې کسان مړه شوي هم دي، چې ورسره په هغه هېواد کې په ۲۰۲۰ز کال کې د وبا له پیل راهیسې د مړو رسمي شمېر شاوخوا ۲۹،۰۰۰ ته رسېدلی دی.

له حکومتي شمېرو سره سم، په پاکستان کې له تېرو پينځو ورځو راهيسې هره ورځ تر ۱،۰۰۰ زياتې پېښې ثبتېږي، چې ورسره د ۲۰۲۰ز کال د فېبرورۍ راهيسې د ټولو وړجنو کسانو رسمي شمېر شاوخوا تر ۱۳ لکه زیات شوی تر ۱۲ لکه ۵۹ زره پورې کسان له ناروغۍ رغېدلي هم دي.

بلخوا په پاکستان کې د کورونا وايرس واکسيني بهير هم دوام لري.

د کورونا وايرس د څار ملي اداري (نيشنل کمانډ اینډ اپرېشن سېنټر) پر ووبپاڼه راغلي چې د جنورۍ ۱۰مې تر سهاره په ټول هېواد کې تر ۷۳.۸ مېلیونه زيات کسان بشپړ واکسين شوي دي.

د ۲۰۱۷ز کال له سرشمېرنې سره سم، د پاکستان ټوله ابادي شاوخوا ۲۰۸ مېلیونه ده.

امريكا د قازق مظاهرچیانو د ویشتلو امر غندلی

د قازقستان په الماتې ښار کې د څو ورځو تر مظاهرو وروسته د جنورۍ پر ۱۰مه سهار ښار ارام او خالي برېښېده.

د امریکا د بهرنیو چارو وزیر اینتني بلېنکن د قازقستان د ولسمشر هغه امر غندلی چې د حکومت مخالف مظاهره چیان دې "ځای پر ځای ووژل" شي.

نوموړي د جنورۍ پر نهمه اې بي سي ټېلېوېژن ته په مرکه کې وویل چې د قازقستان د ولسمشر قاسم جومارت توقایېف دا امر په دې اوسنۍ بڼه غلط دی او باید بېرته واخیستل شي.

بلېنکن وویل، امریکا په دې اړه وضاحت غواړي چې قازقستان ولې د خپل کورني تاوتریخوالي قابو کولو لپاره ضرورت درلود چې د روسیې په مشرۍ امنیتي ځواک ور وغواړي.

نوموړي دا څرګندونې پر داسې مهال کړې دي چې د جنورۍ پر شپږمه روسیو رسنیو وویل چې د مسکو په مشرۍ د ګډ امنیتي تړون سازمان په قازقستان کې عملیات پیل کړي دي.

د ګډ امنیتي تړون سازمان یو پوځي اېتلاف دی چې د پخواني شوروي اتحاد یوشمېر هېوادونه یې غړي دي.

د روسیې دولتي خبري اژانسونو ریا نووستي او تاس د جنورۍ پر شپږمه وویل چې د روسیې په مشرۍ د سوله ساتو ځواکونو ټولي د الوتکو له لارې مرکزي اسیايي هېواد ته داخل شوي ول.

د قازقستان ولسمشر قاسم جومارت توقایېف د جنورۍ پینځمې پر ماخوستن د ګډ امنیتي تړون له سازمانه د مداخلې غوښتنه وکړه. په هغه سازمان کې روسیه، قازقستان، ارمېنیا، بېلاروس، قرغیزستان او تاجکستان شامل دي.

په عین وخت کې د قازقستان چارواکو د جنورۍ پر نهمه وویل چې د پرتشدد احتجاج قابو کولو لپاره یې په امنیتي عملیاتو کې نېږدې ۶،۰۰۰ کسان نیولي دي.

په قازقستان کې ۳۰ کاله وړاندې له پخواني شوروي اتحاد څخه د خپلواکۍ راهیسې داسې پراخ احتجاجونه نه دي شوي.

مظاهرې لومړی د جنورۍ پر دویمه د تېلو په بیو کې د زیاتوالي ضد پیل شوې او وروسته خلکو د سیاسي اصلاحاتو غوښتنې هم وکړې.

ننګرهار کې یوې چاودنې نهه ماشومان وژلي، څلور ژوبل

د ننګرهار لالپورۍ کې د پېښې سیمه

د ننګرهار چارواکي وايي چې په لالپوري ولسوالۍ کې د یوې ناچاودلې سرګولولې د چاودنې له امله نهه ماشومان وژل شوي او څلور نور ټپیان شوي دي.

د ننګرهار د رسنیو له دفتره د جنورۍ په لسمه نېټه خپور شوي بیان کې ویل شوي چې چاودنه له غرمې مخکې شا او خوا لس نیمې بجې د جوارو پولۍ خرڅوونکي رېړې سره چې ماشومان ترې راتاو ول، شوې ده.

د پېښې یو عیني شاهد مشال راډیو ته وویل چې په وژل شويو کې پینځه ماشومان د یوې کورنۍ غړي دي.

عیني شاهد زیاتوي چې ناچاودلې سرګولوله یوه ماشوم د پولیو رېړې ترڅنګ چې ماشومان ترې راتاو ول، په کاڼې ټکوله چې وچاودېدله.

د پېښې ټپیان د ننګرهار حوزوي روغتون ته بیول شوي دي.

د ننګرهار د حوزوي روغتون مسوولین د ټپیانو روغتیایي حالت د ډاډ وړ بولي.

د روس او امریکا ترمنځ خبرې نن پېلېږي

د غونډو دا لړۍ له هغه يوه اوونۍ پس پیل شوې چې روس د اوکراين پولې سره نيږدې پوځي سرتیري ځای پر ځاي کړل. 

روسي چارواکو د جنورۍ پر نهمه ويلي چې په جنيوا کې تر خبرو اترو وړاندې د واشنګټن او برسلز لخوا اشارو ناهيلي کړي دي.

انټرفیکس او ریا خبري اژانسونو د روس د بهرنیو چارو مرستیال وزیر سېرګې ریابکفوف له خولې ویلي چې مسکو مذاکراتو ته د تګ په اړه هیله من نه دی.

د ده په وینا، امریکا له روسیې څخه د یو اړخیزه رعایتونو پر ورکولو اصرار کوي.

ریابکوف ویلي چې ((پر هېڅ ریاست ورکولو نه رضا)) کېږي او دا کار هېڅ امکان نه لري.

سپینه ماڼۍ وايي، امکان دی ریابکوف او د امریکايي پلاوي مشره او د بهرنیو چارو مرستیاله وزیره وېنډي شېرمن به د جنورۍ پر نهمه په جنیوا کې د رسمي ماښامنۍ ډوډۍ پر مهال ((لومړني مذاکرات)) پیل کړي او د جنورۍ پر لسمه به بیا ((اصلي غونډه)) ولري.

په جنيوا کې به تر دې ستراتيژيکو او امنيتي خبرو وروسته د جنورۍ پر ۱۲مه د روس او ناټو سازمان د غړیو تر منځ خبرې اترې کيږي.

په اروپا کې د همکارۍ او امنيت سازمان غونډه به د جنورۍ پر ۱۳مه په ویانا کې کيږي چې پکې به روس امریکا او اوکراين برخه اخلي.

د سپینې ماڼۍ یو چارواکي د جنورۍ پر اتمه په واشنګټن کې خبریالانو ته وويل چې په دې خبرو اترو کې به څه پخې ژمنې نه وي خو زیاته يې کړه چې امریکايي چارواکي په دې اند دي چې ممکنه ده له روس سره د پرمختګونو لارې چارې پیدا شي.

د غونډو دا لړۍ له هغه يوه اوونۍ پس پیل شوې چې روس د اوکراين پولې سره نيږدې پوځي سرتیري ځای پر ځاي کړل.

د روسي سرتيرو ځای پر ځای کيدو هغه اندیښنې زیاتې کړې چې ګواکې مسکو پر اوکراين د يو بل يرغل تیاري کوي ، خو مسکو وايي دا اراده نه لري.

د طالبانو یو لوړپوړی پلاوی ایران ته تللی دی

ایران چې له افغانستان سره شااوخوا ۹۰۰ کیلومتره ګډ سرحد لري، د نړۍ د نورو هېوادونو په څېر یې تر اوسه د طالبانو حکومت په رسمیت نه دی پېژندلی.

د طالبانو د حکومت د بهرنیو چارو سرپرست وزیر امیرخان متقي په مشرۍ یو پلاوی په یوه رسمي سفر تهران ته تللی دی.

د طالبانو د حکومت مرستیال ویاند احمدالله وثیق د جنورۍ پر اتمه مشال راډیو ته وویل چې دا پلاوی به د افغانستان او ایران د اړېکو د لا پیاوړتیا، تجارت، صنعت او همداراز د سرحدونو او نورو موضوعاتو په اړه له ایراني چارواکو سره خبرې وکړي.

ایران چې له افغانستان سره شااوخوا ۹۰۰ کیلومتره ګډ سرحد لري، د نړۍ د نورو هېوادونو په څېر یې تر اوسه د طالبانو حکومت په رسمیت نه دی پېژندلی.

د ایران د بهرنیو چارو وزارت ویاند سعید خطیب زاده تېره اوونۍ خبریالانو ته ویلي وو چې ایران تر اوسه هغه ټکي ته نه دی رسېدلی چې د طالبانو حکومت دې په رسمیت وپېژني.

طالبان د ۲۰۲۱ز کال د اګست پر ۱۵مه پر افغانستان واکمن شول خو تر اوسه د نړۍ يوه هېواد هم په رسميت نه دي پېژندلي.

په میرعلي کې وسله والو یو پولیس وژلی

د دغه بريد ذمه واري چا نه ده منلې. دا په شمالي وزيرستان کې په روان ۲۰۲۲ز کال کې لومړی هدفي بريد وو.

د شمالي وزيرستان په ميرلي کې وسله والو په بريد کې يو پوليس وژلی دی.

د شمالي وزیرستان د پولیسو مشر عقیق حسین د جنورۍ پر اتمه مشال راډيو ته وویل چې په میرلي بازار کې وسله والو پر پوليس سرتېري غني خان ډزي وکړې او په موقع يې وواژی.

وژل شوی پوليس سرتيری د سپين وام شميري سيمي اوسيدونکی وو.

پوليسو د نامعلومه کسانو پرضد مقدمه درج کړې او پلټني يې پيل کړې دي. د پوليسو مشر وايي، د ترهګرۍ ضد پوليسو خپلو عملياتو ته دوام ورکړی دی.

د دغه بريد ذمه واري چا نه ده منلې. دا په شمالي وزيرستان کې په روان ۲۰۲۲ز کال کې لومړی هدفي بريد وو.

تېر ۲۰۲۱ز کال کې ۶۳ هدفي بریدونه شوي ول، چی له ۷۰ زیات ځايي مشران، ځوانان او سرکاري اهلکاران پکې وژل شوي ول.

د ترکمنستان د بهرنیو چارو وزارت معین پر ټاپي پروژې خبرو لپاره کابل ته تللی

د ټاپي پروژه انځور- ارشیف

د ترکمنستان د بهرنیو چارو وزارت مرستیال د یو تخنیکي پلاوي په مشرۍ د ټاپي پروژې د بحث لپاره لومړی هرات او نن (د جنورۍ اتمه) کابل ته تللی دی.

د هرات د سوداګرۍ او صنایع خونې په یو خبرپاڼه کې ویلي چې یاد پلاوي له دوی سره د ټاپي پروژې د کار پر چټکتیا خبرې کړې دي.

په کابل کې د دې پلاوي د لیدنو او خبرو په اړه تفصیل لا مخې ته نه دی راغلی.

د ټاپي پروژه په ۲۰۱۸ز کال کې د افغانستان، ترکمنستان، پاکستان او هند مشرانو له خوا پرانیستل شوه.

د دې پروژې له لارې به ګېس او برېښنا له ترکمنستانه افغانستان، بیا پاکستان او له هغه ځایه هند ته انتقال شي.

نور وښیئ

ځانګړې پاڼې

له موږ سره اړیکي

XS
SM
MD
LG