د پاکستان د انرژۍ چارو وزارت وايي، د اسلام اباد او پېښور د بجلۍ وېش شرکتونو یوشمېر برېښناکوټونه یې بحال کړي او هېواد په نورو سیمو کې یې د بحالۍ چارې روانې دي.
وزارت د جنورۍ پر ۲۳مه پر ټوېټر ولیکل چې د لومړنیو معلوماتو له مخې د دوشنبې (ګل) پر سهار ۳۴ دقیقې (منټه) د پاسه اووه بجې د هېواد د برېښنا نظام د جریان دوران (تعدد یا فرېکوېنسي) کم شو چې له کبله یې په پراخه کچه برېښنا قطع شوه.
ابتدائی اطلاعات کے مطابق آج صبح 7:34 پر نیشنل گرڈ کی سسٹم فریکوئنسی کم ہوئ جس سے بجلی کے نظام میں وسیع بریک ڈاؤن ہوا سسٹم کی بحالی پر کام تیزی سےجاری ہے
— Ministry of Energy (@MoWP15) January 23, 2023
وزارت په بیان کې زیاته کړې ده چې د برېښنا بحالولو پر چارو "په چټکۍ کار" روان دی.
د انرژۍ چارو وزارت تر دې وروسته په بل بیان کې وویل چې له وارسکه د برېښناکوټونو بحالېدل پیل شوي دي او په یو ساعت کې یې د اسلام اباد او د پېښور د بجلۍ وېش شرکتونو "یوشمېر برېښناکوټونه" بحال شوي دي.
وارسک سے گرڈ سٹیشنوں کی بحالی کا آغاز کر دیا گیا ہے اور پچھلے ایک گھنٹے میں اسلام آباد سپلائی کمپنی اور پشاور سپلائی کمپنی کے محدود تعداد میں گرڈ بحال کر دئے گئے ہیں
— Ministry of Energy (@MoWP15) January 23, 2023
د پاکستان د اوبو او توانایۍ چارو ادارې چارواکي وايي، د هېواد د بجلۍ په نظام کې د ستونزې له کبله په پېښو، اسلام اباد، لاهور، کراچۍ، کوټې، پښین، ږوب، چمن، قلعه عبدالله او په یوشمېر نورو ځایونو کې بجلي نه شته.
د انرژۍ چارو وزیر خرم دستګیر د پاکستان د اردو ژبې شخصي جیو نیوز ټېلېوېژن ته ویلي دي چې د بجلۍ په نظام کې "لویه ستونزه" نه ده راغلې او په راتلونکو "۱۲ ساعتونو کې" به د ټول هېواد برېښنا بحاله شي.
رویټرز اژانس د نوموړي له خولې ویلي دي چې د برېښنا د جریان دوران یا فرېکوېنسي کمېدو ستونزه د سیند صوبې د جامشورو او دادو د برېښناکوټونو ترمینځ پېښه شوې ده.
دستګیر زیاتوي چې د دې له وجې د پاکستان په ګڼو ښارونو کې روغتونونه، کارخانې او ښوونځي تر ساعتونو پورې له برېښنا بې برخې ول.
د پېښور یوشمېر اوسېدونکو اژانس ته ویلي دي چې د برېښنا نه شتون له وجې د ښار په ځینو ځایونو کې خلکو سهار د څښاک اوبه هم نه لرلې.
د پېښور د لېډي رېډنګ روغتون ویاند محمد عاصم رویټرز اژانس ته ویلي دي چې د برېښنا تر قطع کېدو سمدستي وروسته یې جنرېټرونه چالان کړل او د بیړنیو طبي خدماتو او د انتهايي نګهداشت څانګو او لېبارټریو ته یې بجلي بحال وساتله.
په پاکستان کې تر دې مخکې هم د بجلۍ په نظام کې د خرابۍ له وجې په پراخه کچه د برېښنا قطع کېدو پېښې شوې دي. د ۲۰۲۱ز کال په جنورۍ کې د کراچۍ، اسلام اباد او لاهور په ګډون په یوشمېر ښارونو کې برېښنا قطع شوې وه چې څو ساعته وروسته بحال شوه.