د پاکستان حکومت وايي له سوډانه د خپلو ټولو وګړيو د ایستلو لپاره له دوستو هېوادونو مرسته غواړي.
د بهرنیو چارو وزیر بلاول بوټو زرداري ویلي چې د سعودي عرب په شان له دوستو هېوادونو سره په تماس کې دی چې پاکستاني وګړي په خیر خیریت له سوډانه وباسي.
نوموړي د اپرېل پر ۲۵مه په خپور کړي بيان کې ويلي، وزارت یې په سوډان کې د ایسار پاتې پاکستانیانو د ژغورنې او ارام لپاره خپلو هڅو ته دوام ورکوي.
د پاکستان بهرنيو چارو وزارت په دې خبرپاڼه کې دا هم ويلي چې د سوډان له پلازمېنې خرطوم څخه ۲۱۱ نور پاکستانيان سوډان پورټ ښار ته رسېدلي دي.
وزارت پر خپله رسمي ټويټر پاڼه ليکلي چې د اپرېل پر ۲۵مه ۳۷ پاکستانيان د يوې کښتۍ له لارې د سعودي عرب جدې ښار ته ورسېدل.
Evacuation plan for Pakistani nationals in Sudan continues. The ship carrying 37 Pakistani nationals from Port Sudan arrives in Jeddah. They were received by CG in Jeddah, Khalid Majid on arrival at Jeddah Port. We are grateful to Government of KSA for its support & hospitality. pic.twitter.com/7Vf8KaBpT7
— Spokesperson 🇵🇰 MoFA (@ForeignOfficePk) April 26, 2023
د پاکستان سرکاري راډيو د خبر ترمخه له دې سره د هغو پاکستانیانو شمیره، چې له خرطومه په خوندي ډول ایستل شوي، ۷۰۰ ته ورسېده.
دا په داسې حال کې ده چې په سوډان کې د پوځ او چټک ملاتړ ملېشه ځواکونو ترمينځ نښتې دويمه اوونۍ هم دوام لري. د سوډان حکومت غوښتل چې دغه ملېشې په پوځ کې شاملې کړي خو هغوی له دې انکار وکړ چې ورسره د دواړو غاړو ترمینځ نښتې پيل شوې.
رويټرز خبري اژانس د ملګرو ملتونو په حواله ويلي چې تر اوسه په هغه جګړه کې لږ تر لږه ۴۲۷ کسان وژل شوي او بشري بحران يې رامينځته کړی.
د اژانس ترمخه، امريکا، جرمني، جاپان، جنوبي کوريا او ځينو نورو هېوادونو خپل وګړي او چارواکي د سوډان له پلازمېنې، خرطوم څخه ایستلي او یا یې د ايستلو په حال کې دي.