په بلوچستان کې د ترهګرۍ ضد پولیس ځواک (سي ټي ډي) دعوه کړې ده چې د هغې صوبې په کوټه او بارکان سيمو کې یې د عملیاتو پر مهال ۱۴ مشکوک وسلوال وژلي دي.
کاونټر ټېرريزم ډيپارټمېنټ (سي ټي ډي) د فبرورۍ پر ۱۸مه د مشال راډیو په ګډون ګڼو رسنیو ته په استولي بیان کې دعوه کړې ده چې د فبرورۍ پر ۱۷مه یې د کوټې په درخشان سیمه کې د کاروايي پر مهال اته وسلوال وژلي دي.
د بیان ترمخې، په هغه پېښه کې درې امنیتي سرتېري هم ژوبل شوي دي.
بیان دعوه کوي چې په بارکان کې یې هم د عملیاتو پر مهال شپږ مشکوکه وسلوال وژلي دي.
پولیسو دا نه دې ويلي چې وژل شوي کسان څوک ول او نه یې هم د ثبوت په توګه د هغوی مړي یا انځورونه له رسنیو سره شریک کړي دي.
مشال راډیو د پولیسو دا دعوې نه شي تصدیقولای.
کومې وسلوالې ډلې هم د سي ټي ډي د دعوو په اړه لا څه نه دي ويلي.
تر دې وړاندې هم سي ټي ډي د بلوچستان په ځینو سيمو کې د ځينو کسانو د وژلو دعوې کړې وې او هغوی یې مشکوک ترهګر بللي ول خو وروسته پر ځینو پېښو سياسي ګوندونو او د بشري حقونو فعالانو نيوکې وکړې او تورونه یې پورې کړل چې وژل شوي کسان "بې ګناه" ول او پرضد یې مظاهرې او پرلتونه وهلي ول.
