ټاکل شوې ده چې د افغانستان د بشري حقونو لپاره د ملګرو ملتونو ځانګړی راپور ورکوونکی رېچرډ بېنېټ نن (سېپټېمبر نهمه) خپل راپور د دې سازمان د بشري حقونو شورا ته وړاندې کوي.
د ملګرو ملتونو د بشري حقونو د شورا ۵۷ ناسته سېپټمبر نهمه په جينيوا کې پيلېږي او د اکتوبر تر ۱۱مې نېټې پورې به دوام وکړي.
بېنېټ په خپل رپورټ کې د افغانستان د بشري حقونو وضعیت خورا حساس او ترینګلی بللی دی او ويلي يې دي چې د افغانستان کمزوري اقتصاد افغانان لا ډېر بېوزله کړي دي.
په رپورټ کې، چې يوه برخه يې د ملګرو ملتونو د بشري حقونو شورا پر ووبپاڼه خپره شوې، د افغانستان واکمن طالبان د ښځو او نجونو په وړاندې په لا زیاتو محدودوونکو اقداماتو تورن شوي دي.
دا په داسې حال کې ده چې د طالبانو حکومت په وروستیو کې د امر باالمعروف قانون منظور او عملي کړ چې پر افغان نجونو او ښځو د طالبانو د لا زياتو محدوديتونو له کبله ورباندې سختې نيوکې وشوې.
د همدې قانون پر سر د طالبانو د امرباالمعروف او نهی عن المنکر وزارت له ملګرو ملتونو سره د خپلې همکارۍ پرېکون اعلان کړ. خو ملګرو ملتونو ویلي چې په افغانستان کې خپل فعالیت ته دوام ورکوي.
طالبان د ۲۰۲۱ز کال د اګست پر ۱۵مه پر افغانستان واکمن شول او له هغه راهیسې یې تر شپږم ټولګي پورته د نجونو پر تعلیم او کار بندیزونه او محدوديتونو لګولې دي.
د طالبانو حکومت وايي چې د نجونو د زدکړو لپاره پر یوه تګلاره او د مناسب چاپېریال پر جوړولو کار کوي، خو تر اوسه یې دا نه دي ویلي چې په تېرو څه کم درې کلونو کې په دې برخه کې څومره پرمختګ شوی دی.
