د طالبانو حکومت د لوړو زده کړو وزارت یو سلاکار مولوي عبدالجبار وايي چې پوهنتونونه د نجونو زده کوونکو منلو ته تیار دي خو د طالبانو د مشر ملا هبت الله اخوندزاده فرمان ته انتظار باسي، ځکه چې د نوموړي په وینا، په دې اړه وروستۍ پرېکړه د هغه په لاس کې ده.
مولوي عبدالجبار د اګست پر ۱۲مه له اسوشيېټېډ پریس اژانس سره په خبرو کې دا و نه ویل چې دا پرېکړه به څه وخت وشي خو زیاته یې کړه چې د طالبانو مشر چې کله د نجونو پر مخ د پوهنتونونو د پرانیستو امر وکړي، پر هم هغه ورځ به عملي شي.
هغه دا یادونه هم کړې چې د طالبانو ټول مشران، ان وزیران یې، د نجونو د تعلیم او تحصیل پلویان دي.
د طالبانو د لوړو زده کړو وزارت سلاکار دا څرګندونې پر داسې مهال کړې دي چې د اګست پر ۱۵مه یې پر افغانستان د واکمنېدو دوه کاله پوره کېږي.
طالبانو پر افغانستان تر واکمنېدو وروسته تر شپږم ټولګي پورته د نجونو ټول ښوونځي وتړل او بیا یې د ۲۰۲۲ز کال د ډېسېمبر په پای کې پوهنتونونو ته د نجونو پر تګ هم بندیز ولګاوه. خو په دې ټوله موده کې طالبانو وار وار ټینګار کړی چې دا کار موقتي دی او وايي چې د نجونو د تعلیم لپاره یوه تګلاره جوړوي.
