د پاکستان وزیراعظم د شمالي وزیرستان په شیوه سیمه کې د وسله والو لخوا د الوزول شوي سکول د زر تر زره په سرکاري مصرف د بیا جوړولو امر کړی دی.
د پاکستان سرکاري راډیو د مې پر ۱۰مه خبر ورکړی چې وزیراعظم شهباز شریف ویلي چې دوی به داسې هڅې بریالي کېدو ته نه پرېږدي چې د نجونو د تعلیم مخه نیسي. نوموړي زیاته کړې چې پر هغه سکول په برید کې لاس لرونکي دې ونیول شي او سزا دې ورکړل شي.
دا له هغه وروسته ده چې د مې اتمې په شپه ناڅرګندو وسله والو په شېوه سیمه کې د نجونو یو پرایمري سکول بارودي موادو الوزولی وو. د یادې سیمې خلکو مشال راډیو ته ویلي ول چې دا د هغې سیمې یوازینی ښځینه سکول وو چې په سلګونه نجونو پکې زده کړې کولې.
چا تر اوسه د هغې پېښې زمه واري نه ده منلې.
ځايي پولیسو د پېښې په اړه په رسمي توګه څه نه دې ويلي البته د شیوې پولیسو تاڼې یو چارواکي چې له رسنیو سره د خبرو کولو اجازه نه لرله، د نوم نه ښوولو په شرط پېښه تاييد کړې او د مې پر ۹مه يې مشال راډیو ته ویلي وو چې دوی په دې اړه پلټنې پیل کړې دي.
د سکول د ودانۍ مالک بهادر خان پښتين د مې پر ۹مه مشال راډيو ته ویلي وو چې وسله والو ورته څو ځله ګواښونه کړی وو چې پر ټولنيزو رسنيو دې د ښوونځۍ اعلانونه یا نور معلومات دې نه خپروي: "دلته دا يوازېنۍ سکول وو، د خرابو حالاتو له کبله ښځينه استادانې نه راتلې او اوس وران شو چې له وجې يې جينکۍ له زدکړه څخه محرومه شوې."
تر دې وړاندې د ۲۰۲۳ز کال د مې پر ۲۱مه نېټه هم وسلوالو د شمالي وزیرستان میرعلي په حسوخېل او مسکي کې د نجونو دوه سکولونه په بارودو الوځولي ول.
په شمالي وزیرستان او د خيبر پښتونخوا په سوات او نورو قبايلي سيمو کې وسلوالو طالبانو د جینکو په سلګونو سکولونه وران کړي دي.
په دې وروستيو کې په شمالي وزیرستان او نورو قبايلي سيمو کې د وسله والو فعاليتونه زیات شوي دي. ځايي خلکو، سیاسي ګوندونو او پښتون ژغورنې غورځنګ د ناامنيو پر ضد په بېلابېلو وختونو کې احتجاجونه کړي دي. د پاکستان پوځ ويلي چې د وسله والو د بریدونو مخنيوي لپاره هدفي عمليات کوي.
