د هند غوره لیګ (انډیین پرېمییر لیګ یا ای پي اېل) په نوم د ۲۰ اووره کرکټ په سیالیو کې سنرایزرز حیدراباد او رایل چیلېنجرز بنګلور لوبډلې یو بل ته مخامخېږي.
د حيدراباد په راجيو ګاندي لوبغالي کې د اپرېل ۲۵مې سیالي د پېښور پر وخت د ماخوستن پر اووه او د کابل پر شپږ نیمو بجو پیلېږي.
تر دې یوه ورځ مخکې دلي کیپېټلز لوبډلې ګجرات ټایټنز ته په څلورو منډو ماتې ورکړه. د دلي په ارون جېټلي لوبغالي کې دلي کیپېټلز لومړی توپوهنه (بیټېنګ) وکړه او په ټاکليو ۲۰ اوورونو کې يې د څلورو لوبغاړو په زيان ۲۲۴ منډې وکړې.
په دلي کیپېټلز لوبډله کې رشاب پنت ۸۸ او اکسر پټېل ۶۶ منډې وکړې.
د ګجرات ټایټنز سنديپ واريير درې لوبغاړي وسوځول.
په ځواب کې د ګجرات ټایټنز لوبډلې په ټاکليو ۲۰ اوورونو کې د اتو لوبغاړو په زيان ۲۲۰ منډې وکړې.
د دلي کیپېټلز رشاب پنت د لوبې غوره لوبغاړی شو. هغه پر ۴۳ توپونو ۸۸ منډې وکړې او دوه توپونه (کېچونه) يې هم ونيول.
ټاکل شوې چې د اپرېل پر ۲۶مه کلکته نايټ رايډرز او پنجاب کېنګز لوبډلې یو بل ته مخامخ شي.
په ای پي اېل کې ټولې ۱۰ لوبډلې برخه اخلي چې پکې د افغانستان په ګډون د یوشمېر هېوادونو لوبغاړي شامل دي.
د هند غوره لیګ سیالۍ د مارچ پر ۲۲مه پیل شوې او ټاکل شوې چې پایلوبه یې د مې پر ۲۶مه نېټه وشي.
