اسراییلو پر دې سربېره د مارچ پر ۲۶مه شپې مهال د غزې تړانګې پر جنوبي برخه سخته بمباري کړې چې په سیمه کې د سمدستي اوربند لپاره ورباندې نړیوال فشار دی.
محاصره شوې غزه چې سختو مرستو ته اړتیا لري، له قحطۍ سره مخامخ ده او امریکا ویلي دي چې اوسېدونکو ته یې د فضا له لارې مرستو ورغورځولو ته دوام ورکوي.
په غزه کې رفح یوازینی مرکزي وړوکی ښار دی چې لا ورباندې د اسراییلو ځمکنیو ځواکونو برید نه دی کړی.
هغه ښار ته شاوخوا ۱۵ لکه خلک کډه شوي دي او د اسراییلو د احتمالي ځمکني برید له خطر سره مخامخ دی دی. د همدې له وجې په رفح وړوکي ښار کې مېشت خلک د مصر پولې پر لوري روان دي.
حماس، چې امریکا او اروپايي ټولنه یې ترهګره ډله بولي، د ۲۰۲۳ز کال د اکتوبر پر اوومه پر اسراییلو برید وکړ او شاوخوا ۱،۲۰۰ اسراييلي وګړي يې ووژل او۲۵۰ کسان یې یرغمل کړل.
تر اوسه یوشمېر یرغمل شوي د یو جوړ جاړي له لارې خوشې کړل شوي دي. اسراییلو د حماس د برید په غبرګون کې سختې پوځي کاروايۍ ته دوام ورکړی دی.
په عین حال کې په غزه کې روغتیايي چارواکي وايي، په جګړه کې د وژل شويو فلسطينيانو شمېر تر ۳۲،۰۰۰ اوښتی دی چې ډېری يې ښځې او ماشومان دي.
