پولیس وايي، د خیبر پښتونخوا د جنوبي ضلعې لکي مروتو په تختيخېلو کې یې له یوه کوره ۱۱ مړي موندلي دي.
د پولیسو مشر طارق حبیب د جنورۍ پر ۱۰مه رسنیو ته وویل چې په وژل شویو کې دوه ښځې، درې سړي او نور ماشومې نجونه او هلکان دي.
دی وايي، ټول کسان د یوې کورنۍ غړي دي چې تر وژلو مخکې ورباندې تشدد شوی دی.
حبیب رسنیو ته وویل چې داسې ښکاري چې هغه کسان دوه ورځې مخکې وژل شوي ول او د کور ور له بهره قفل (تاله) شوی وو.
نوموړي وویل چې داسې ښکاري دا د کورنۍ لانجې پېښه ده ځکه چې د هغه کور یوه ښځه له مېړه څخه تللې وه او د پلار په کور ناسته وه.
د لکي مروت د پولیسو مشر وویل چې لومړۍ پلټنې ښيي چې د مېړه د کورنۍ غړي هلته ورغلي او شپې مهال یې ټول وژلي دي.
پولیس وايي، د پېښې مقدمه یې دایره کړې، پلټنې کوي او د ککړو کسانو د نیولو لپاره یې د هغوی لټون پیل کړی دی.
