اېمل ولي خان وايي له عمران خان سره اییني او قانوني چلند کېږي
د عوامي نیشنل ګوند د خیبر پښتونخوا څانګې مشر اېمل ولي خان وايي چې نورې ادارې او عدلیه باید په روان انتخاباتي بهیر کې له لاسوهنې ډډه وکړي او انتخاباتي کمېشن د ټولو چارو مشرۍ او ترسره کولو ته پرېږدي. ټاکل شوې چې په پاکستان کې د فبرورۍ پر اتمه انتخابات وشي او د هغه هېواد د بشري حقونو کمېشن اندېښنه ښوولې ده چې ټول ګوندونه او خواوې د کیمپېن یو ډول موقعې نه لري. کمېشن په خپل وروستي بیان کې په ځانګړي ډول د تحریک انصاف یادونه کړې ده او ویلي یې دي چې د هغه ګوند سیاستوالان له فشار سره مخامخ دي. خو اېمل ولي خان له مشال راډیو سره په خبرو کې وویل چې په پاکستان کې د انتخاباتو پر مهال د یو ډول موقعو تمه نه شي کېدای. ده د تحریک انصاف پر مشر عمران خان انتقاد وکړ او هغه یې د ۲۰۲۳ز کال د مې نهمې د مظاهرو او د دولتي او پوځي تاسیساتو پر زیانمولو تورن کړ او دعوه یې وکړه چې له هغه سره روان چلند اییني او قانوني دی. عمران خان چې د اګست له میاشتې راهیسې بندي دی، پر ځان لګېدلي تورونه ردوي او مقدمې سیاسي بولي. نوموړي داراز په بیا بیا ټینګار کړی دی چې پلویانو یې د ده تر ګرفتارۍ وروسته په مظاهرو کې هېڅ تاوتریخوالی او پر ودانیو بریدونه نه دي کړي. اېمل ولي خان په مرکه کې د چمن د هغه پرلت ستاینه وکړه چې د اکتوبر له ۲۱مې راهیسې روان دی او په شناختي کارډ او تذکرو له کندهار سره د تګ راتګ غوښتنه کوي. د عوامي نیشنل ګوند مخکښ مشر البته زیاته کړه چې له پاکستانه د بې اسناده بهرنیانو، چې لوی اکثریت یې افغانان دي، د ایستلو بهیر ملاتړ کوي. له اېمل ولي خان سره بشپړه ویډیويي مرکه وګورئ.